ପୁରୀ,୨୬/୬ : ରଥଯାତ୍ରାକୁ ଶୃଙ୍ଖଳିତ କରିବା ନିମନ୍ତେ ଶ୍ରୀମନ୍ଦିର ପ୍ରଶାସନ ପ୍ରସ୍ତୁତ କରିଛି ବ୍ୟବସ୍ଥାବଳୀ । ଏହାକୁ ଉଲ୍ଲଂଘନ କଲେ କାର୍ଯ୍ୟାନୁଷ୍ଠାନ ଚେତାବନୀ ଦିଆଯାଇଛି । ସୂଚନା ମୁତାବକ, ରଥଯାତ୍ରାରେ ନିର୍ଦ୍ଧାରିତ ନୀତି ନିର୍ଘଣ୍ଟ ଅନୁଯାୟୀ ଶ୍ରୀଜିଉଙ୍କ ନୀତି ଯେପରି ସମ୍ପାଦନ ହେବ, ସେଥିପାଇଁ ସମସ୍ତ ପାଳିଆ ସେବକ, ନିଯୋଗ ସଭାପତି, ସମ୍ପାଦକ, ବଦଳ ପାଳିଆ ଏବଂ କର୍ତ୍ତବ୍ୟରତ କର୍ମଚାରୀ ସଜାଗ ରହିବେ । ୨୭ ତାରିଖ ଶ୍ରୀଗୁଣ୍ଡିଚା ଦିନ ପ୍ରତ୍ୟୁଷରୁ ମୁଖ୍ୟ ପ୍ରଶାସକ, ଉପମୁଖ୍ୟ ପ୍ରଶାସକ ତଥା ଜିଲ୍ଲାପାଳ, ଆରକ୍ଷୀ ଅଧୀକ୍ଷକ, ଶ୍ରୀମନ୍ଦିର ପ୍ରଶାସକ, ଅନ୍ୟାନ୍ୟ ଅଧିକାରୀ, ପରିଚାଳନା କମିଟିର ସମସ୍ତ ସଦସ୍ୟ ଓ ସଂପୃକ୍ତ ନିଯୋଗମାନଙ୍କର ସଭାପତି ଓ ସମ୍ପାଦକ ଶ୍ରୀମନ୍ଦିରରେ ଉପସ୍ଥିତ ରହି ଶ୍ରୀଜିଉଙ୍କ ନୀତି ତ୍ୱରାନ୍ୱିତ କରିବେ। ଶ୍ରୀଗୁଣ୍ଡିଚା ଦିନ କୌଣସି ଦର୍ଶନାର୍ଥୀ କିମ୍ବା ଅନଧିକୃତ ବ୍ୟକ୍ତି ଶ୍ରୀମନ୍ଦିର ଜଗମୋହନ କିମ୍ବା ନାଟମଣ୍ଡପ ମଧ୍ୟକୁ ପ୍ରବେଶ କରିପାରିବେ ନାହିଁ । ଏଥି ନିମନ୍ତେ କର୍ତ୍ତବ୍ୟରତ ଅଧିକାରୀ ଓ କର୍ମଚାରୀ ଦୃଷ୍ଟି ଦେବେ ।
ପ୍ରାତଃ ୪ ଘଟିକା ପୂର୍ବରୁ ରଥରେ ଚାରମାଳ ବନ୍ଧା ଓ ଫୁଲ ସଜ୍ଜା ସରିବ । ଫୁଲ ସଜ୍ଜା ଯୋଗୁଁ ଶ୍ରୀଜିଉଙ୍କ ଦର୍ଶନ ଯେପରି ଅବରୋଧ ସୃଷ୍ଟି ନ କରିବ ସେଥିପ୍ରତି ଦୃଷ୍ଟି ଦିଆଯିବ । ଅନଧିକୃତ ବ୍ୟକ୍ତିମାନେ ରଥ ଆରୋହଣ କରିବା ବା ଶ୍ରୀବିଗ୍ରହମାନଙ୍କୁ ସ୍ପର୍ଶ କରିବା ସମ୍ପୂର୍ଣ୍ଣ ନିଷେଧ । ରଥ ଉପରେ ଯେପରି କୌଣସି ଅନଧିକୃତ ବ୍ୟକ୍ତି ନ ଚଢ଼ନ୍ତି କିମ୍ବା ନ ରହନ୍ତି ସେଥିପ୍ରତି ଦଇତାପତି ନିଯୋଗ ସଭାପତି, ସଂପାଦକ, ବାଡ଼ଗ୍ରାହୀ ସେବକ, ଶୋଧ ଦଳ, କର୍ଭବ୍ୟରତ ସରକାରୀ ପୁଲିସ୍ ଓ ଶ୍ରୀମନ୍ଦିର ପୁଲିସ ଦୃଷ୍ଟି ଦେବେ ।
ରଥାରୂଢ଼ ଶ୍ରୀବିଗ୍ରହମାନଙ୍କର ସ୍ପଷ୍ଟ ଦର୍ଶନ ନିମନ୍ତେ ଠାକୁରଙ୍କର ସେବାପୂଜା ନଥିବା ସମୟରେ କୌଣସି ସେବକ ଶ୍ରୀବିଗ୍ରହମାନଙ୍କର ଉଭୟ ଭୁଜ ମଧ୍ୟରେ ବା ସମ୍ମୁଖରେ ଛିଡ଼ା ହେବେ ନାହିଁ । ଶ୍ରୀବିଗ୍ରହମାନଙ୍କ ଭୁଜ ଉପରେ ଭରା ଦେଇ କୌଣସି ସମୟରେ ଛିଡ଼ା ହୋଇ ରହିବା କିମ୍ବା ଶ୍ରୀଜିଉଙ୍କୁ ପିଠି କରି ବସିବା ସମ୍ପୂର୍ଣ୍ଣ ନିଷେଧ । ଏହା କାର୍ଯ୍ୟକାରୀ କରିବା ପାଇଁ ଦଇତାପତି ନିଯୋଗର ସଭାପତି, ସମ୍ପାଦକ ଓ ବାଡ଼ଗ୍ରାହୀମାନଙ୍କ ଉପରେ ଦାୟିତ୍ୱ ନ୍ୟସ୍ତ ରହିବ ବୋଲି ଶ୍ରୀମନ୍ଦିର ବ୍ୟବସ୍ଥାବଳୀରେ ବିଶେଷ ସୂଚନା ଜାରି ହୋଇଛି ।
