ଫିରିଙ୍ଗିଆ,୧୩/୧୧ : ବିଦ୍ୟୁତ ବିଭାଗର ଅବହେଳା ପାଇଁ ଦୀର୍ଘ ଦେଢ ମାସ ହେବ ଅନ୍ଧାରରେ ରହିଛନ୍ତି ଗୋଟିଏ ଗାଁର ତିରିଶ ପରିବାର I କରେଣ୍ଟ ନ ଥାଇ ମଧ୍ୟ ଆସୁଛି ବିଦ୍ୟୁତ ବିଲ୍ I ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ କାଶିନିପଦର ପଞ୍ଚାୟତର ଅନ୍ତର୍ଗତ ବାଲିପଦର ଓ କାଲିମୁଣ୍ଡା ଗ୍ରାମରେ I ଦୀର୍ଘ ଦେଢ଼ ମାସ ଧରି ବିଦ୍ୟୁତ ସେବା ବନ୍ଦ ଥିବା ଯୋଗୁଁ ଗ୍ରାମବାସୀ ରାତ୍ରି ସମୟରେ ନାହିଁ ନ ଥିବା ସମସ୍ୟାର ସମ୍ମୁଖିନ ହେଉଥିବା ଦେଖିବାକୁ ମିଳିଛି। 

ବାଲିପଦର କାଲିମୁଣ୍ଡାଠାରେ ଥିବା ୧୦କେଭି ବିଦ୍ୟୁତ୍ ଟ୍ରାନ୍ସଫର୍ମର ଅକ୍ଟୋବର ଆଠ ତାରିଖଠାରୁ କୌଣସି କାରଣରୁ ପୋଡ଼ି ଯାଇଥିବାରୁ ଏକ ମାସରୁ ଊର୍ଦ୍ଧ୍ଵ ହେବ ବିଦ୍ୟୁତ୍ ସେବା ଠପ୍ ହେଇ ଯାଇଛି। ଗ୍ରାମର ତିରିଶ ପରିବାର ଉକ୍ତ ବିଦ୍ୟୁତ ଟ୍ରାନ୍ସଫର୍ମର ଉପରେ ନିର୍ଭର କରିଥାନ୍ତି । ବିଦ୍ୟୁତ ସେବା ବନ୍ଦ ରହିଥିବା ଯୋଗୁଁ ଗାଁରେ ରାତ୍ର ସମୟରେ ଘନ ଅନ୍ଧାର ହୋଇ ରହୁଥିବାବେଳେ ଏକ ପ୍ରକାରେ ଗ୍ରାମବାସୀଙ୍କ ମନରେ କୋକୁଆ ଭୟ ସୃଷ୍ଟି ହେଉଥିବା ଗ୍ରାମବାସୀ କହିଛନ୍ତି। ଅନ୍ୟପଟେ ଗାଁର ଛାତ୍ରଛାତ୍ରୀମାନଙ୍କ ପାଠ ପଢ଼ାରେ ମଧ୍ୟ ବାଧା ସୃଷ୍ଟି ହେଉଥିବା ଦେଖିବାକୁ ମିଳିଛି। ଏ ସଂକ୍ରାନ୍ତରେ ବିଦ୍ୟୁତ ବିଭାଗକୁ ଏବଂ ଫିରିଙ୍ଗିଆ ସବଡିଭିଜନର କନିଷ୍ଠଯନ୍ତ୍ରୀଙ୍କ ପାଖରେ ଗ୍ରାମବାସୀ ବାରମ୍ବାର  ଅଭିଯୋଗ କରିଲେ ମଧ୍ୟ କର୍ଣ୍ଣାପାତ କରୁନ ଥିବା କହିଛନ୍ତି। ଯଥାଶୀଘ୍ର ବିଦ୍ୟୁତ ବିଭାଗ ଏଥିପ୍ରତି ଦୃଷ୍ଟି ଆକର୍ଷଣ କରି ତୁରନ୍ତ ସମସ୍ୟାର ସମାଧାନ କରିବା ପାଇଁ ଗ୍ରାମବାସୀ ଦାବି କରିଛନ୍ତି। 

ସେପଟେ ଦାୟିତ୍ୱରେ ଥିବା ବିଦ୍ୟୁତ ବିଭାଗ କନିଷ୍ଠଯନ୍ତ୍ରୀ ସତ୍ୟବ୍ରତ ସାହୁଙ୍କୁ ପଚାରିବାରୁ ସେହି ଗାଁରେ ଗତ ବର୍ଷ ଠିକ୍ ଏହିଭଳି ବିଦ୍ୟୁତ ଟ୍ରାନ୍ସଫର୍ମର ପୋଡିଯିବାରୁ ନୂତନ ଟ୍ରାନ୍ସଫର୍ମର ଲଗାଯାଇଥିଲା I ଗାଁର କିଛି କଂଜୁମର କରେଣ୍ଟକୁ ଠିକ ଭାବେ ବ୍ୟବହାର କରୁନଥିବାରୁ ଟ୍ରାନ୍ସଫର୍ମର ପୋଡି ଯାଇଥିବା କହିଥିବାବେଳେ ଗାଁର କିଛି କଂଜୁମରଙ୍କ ବିଦ୍ୟୁତ ବିଲ ବକେୟା ଥିବାରୁ ନୂତନ ଟ୍ରାନ୍ସଫର୍ମର ଲାଗିପାରୁନାହିଁ I ବିଦ୍ୟୁତ ବିଲ୍ ପୈଠ କଲେ ଟ୍ରାନ୍ସଫରମର ଲାଗିବ ବୋଲି କହିଛନ୍ତି I ସେପଟେ ଯନ୍ତ୍ରୀଙ୍କ ବୟାନ ଶୁଣିଲା ପରେ ଯେଉଁ କଂଜୁମରମାନେ ବିଲ୍ ପୈଠ କରୁନାହାନ୍ତି ସେମାନଙ୍କ କରେଣ୍ଟ କଟାଯାଇ ସେମାନଙ୍କ ପାଇଁ ସମସ୍ତେ କହିକି ଅସୁବିଧାର ସମୁଖୀନ ହେବେ ବୋଲି ମତ ଦେଇଛନ୍ତି I ଅନ୍ୟପଟେ ଆଗାମୀ କିଛିଦିନ ମଧ୍ୟରେ ବିଦ୍ୟୁତ ଟ୍ରାନ୍ସଫର୍ମର ଲଗାନଗଲେ ଗ୍ରାମବାସୀ ଆନ୍ଦୋଳନ କରିବେ ବୋଲି ମଧ୍ୟ୍ୟ କହିଛନ୍ତି I