ନୂଆଦିଲ୍ଲୀ ୧୭/୦୮: ଭାରତରେ ବୁଲାକୁକୁରଙ୍କୁ ଧରି ଆଶ୍ରୟଗୃହରେ ରଖିବାକୁ ସୁପ୍ରିମକୋର୍ଟ ନିକଟରେ ଦେଇଥିବା ନିର୍ଦ୍ଦେଶକୁ ନେଇ ଏବେ ବିତର୍କ ଚାଲିଛି । ଅନେକ ପଶୁପ୍ରେମୀ ଏହାକୁ ବିରୋଧ କରୁଛନ୍ତି । ତେବେ ଜାଣି ଆଶ୍ଚର୍ଯ୍ୟ ହେବେ ଯେ ନେଦରଲ୍ୟାଣ୍ଡସ୍ରେ ବୁଲାକୁକୁରଙ୍କ ସ୍ୱତନ୍ତ୍ର ଭାବେ ଯତ୍ନ ନିଆଯାଇଥାଏ । ବୁଲାକୁକୁରଙ୍କ ସୁରକ୍ଷା ଲାଗି ସେଠାରେ ଏକ ସମର୍ପିତ ପୁଲିସ ଟିମ୍ ବି ରହିଛି । ସେହି ଟିମ୍ ବୁଲାକୁକୁରଙ୍କୁ ଧରି ଟୀକାକରଣ, ବନ୍ଧ୍ୟାକରଣ କରାଇଥାଏ । ପରେ ଆଶ୍ରୟଗୃହରେ ଛାଡି଼ଥାଏ । ଆବଶ୍ୟକସ୍ଥଳେ ଏପରି କୁକୁରଙ୍କ ବିରୋଧରେ ହେଉଥିବା ଅପରାଧର ତଦନ୍ତ କରେ । ବିଶେଷ ଭାବେ ତାଲିମପ୍ରାପ୍ତ ଏହାର ଅଧିକାରୀମାନେ କ୍ରୂରତା ମାମଲାରେ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରି କୁକୁରମାନଙ୍କୁ କ୍ଷତି ପହଞ୍ଚିବା ସ୍ଥିତିରୁ ଉଦ୍ଧାର କରିଥାନ୍ତି ।
ସେହିପରି ଦେଶରେ ବୁଲାକୁକୁରଙ୍କ ଲାଗି ଥିବା ଆଶ୍ରୟଗୃହରେ ଆରାମଦାୟକ ରହଣୀ, ଖାଦ୍ୟ ସହ ଅନ୍ୟ ସବୁ ପ୍ରକାର ବ୍ୟବସ୍ଥା ରହିଛି । ସେଠାରେ କୁକୁରଙ୍କୁ ଚବିଶ ଘଣ୍ଟିଆ ମେଡିକାଲ୍ ସୁବିଧା ବି ମିଳେ । ଅନ୍ୟପଟେ କୁକୁର କିଣିବା ନେଇ ଦେଶରେ କଡ଼ା ନିୟମ ରହିଛି । ନେଦରଲ୍ୟାଣ୍ଡସ୍ରେ କୁକୁର କିଣିଲେ ବିପୁଳ ପରିମାଣରେ ଟିକସ ହେବାକୁ ହୋଇଥାଏ । ସେଥିଯୋଗୁ ଲୋକେ ଆଶ୍ରୟ ଗୃହରୁ କୁକୁର ପୋଷ୍ୟ କରିବାକୁ ଅଧିକ ପସନ୍ଦ କରିଥାନ୍ତି । ସେଠାରେ ଜନ୍ମରୁ ୭ ସପ୍ତାହ ମଧ୍ୟରେ ସବୁ କୁକୁର ଶରୀରରେ ମାଇକ୍ରୋଚିପ୍ ଲଗାଯାଇଥାଏ । ୮ ସପ୍ତାହ ମଧ୍ୟରେ ଏକ ରାଷ୍ଟ୍ରୀୟ ଡାଟାବେସ୍ରେ ସେଗୁଡି଼କର ପଞ୍ଜୀକରଣ କରାଇବା ଅନିବାର୍ଯ୍ୟ ହୋଇଥାଏ । ଏହାଦ୍ୱାରା କୁକୁର ସହ ଜଡ଼ିତ ସମସ୍ତ ତଥ୍ୟ ଏକ ଡାଟାବେସ୍ରେ ରହିଥାଏ । କୁକୁର ହଜିଗଲେ ଏହି ମାଇକ୍ରୋଚିପ୍ ଜରିଆରେ ତାକୁ ଟ୍ରାକ୍ କରାଯାଇ ସହଜରେ ଖୋଜିହୁଏ ।
