ବାଲେଶ୍ୱର, ୨୧/୦୬: ଗରିବ ଓ ମେଧାବୀ ଛାତ୍ରଛାତ୍ରୀଙ୍କୁ ପାଠ ମନସ୍କ କରିବା ସହ ଉଚ୍ଚଶିକ୍ଷା ପାଇଁ ଉଭୟ କେନ୍ଦ୍ର ଏବଂ ରାଜ୍ୟ ସରକାର ବିଭିନ୍ନ ଯୋଜନାରେ ଛାତ୍ରବୃତ୍ତି ପ୍ରଦାନ କରୁଛନ୍ତି । ଛାତ୍ରବୃତ୍ତି ଯୋଗୁ ଛାତ୍ରଛାତ୍ରୀ ପାଠ ପଢ଼ା ଲକ୍ଷ୍ୟକୁ ପୂରଣ କରିପାରୁଛନ୍ତି । ମାତ୍ର ସଚେତନତା ଅଭାବରୁ ବହୁ ଛାତ୍ରଛାତ୍ରୀ ଛାତ୍ରବୃତ୍ତି ପାଇବାରୁ ବଞ୍ଚିତ ହେଉଛନ୍ତି । ଅନେକ ସମୟରେ ଇଚ୍ଛା ଥିଲେ ବି ପାଠ ପଢ଼ାରୁ ବଞ୍ଚିତ ହେଉଛନ୍ତି । ସାଧରଣତଃ ସ୍କୁଲଠାରୁ ଆରମ୍ଭ କରି କଲେଜ ଛାତ୍ରଛାତ୍ରୀଙ୍କ ପାଇଁ ସରକାର ଛାତ୍ରବୃତ୍ତିର ବ୍ୟବସ୍ଥା କରିଛନ୍ତି । ଏହା ବ୍ୟତୀତ ଯେଉଁମାନେ ଉଚ୍ଚ ଶିକ୍ଷା ଗ୍ରହଣ କରିବେ ସେମାନଙ୍କ ପାଇଁ ମଧ୍ୟ ସ୍ୱତନ୍ତ୍ର ଛାତ୍ରବୃତ୍ତି ଅଛି । ଆମ ରାଜ୍ୟରେ ବିଜୁ ଯୁବ ଶସକ୍ତିକରଣ ଯୋଜନା, ଜୁନିୟର ମେରିଟ ସ୍କଲାରସିପ, ଗୋପବନ୍ଧୁ ଶିକ୍ଷା ସହାୟତା ଯେଜନା, ସିନିୟର ମେରିଟ ସ୍କଲାରସିପ୍, ନିର୍ମାଣ ଶ୍ରମିକ କଲ୍ୟାଣ ଯୋଜନା, ପୋଷ୍ଟ ମ୍ୟାଟ୍ରିକ ସ୍କଲାରସିପ୍, ଇ-ମେଧାବୃତ୍ତି, ସହିଦ ମାଧୋ ସିଂ, ଏନଆରଟିଏସ୍ ସ୍କଲାରସିପ୍ ଦିଆଯାଉଛି । ଏହିସବୁ ଛାତ୍ରବୃତ୍ତି ପାଇ ଜିଲ୍ଲାରେ ହଜାର ହଜାର ଗରିବ ଛାତ୍ରଛାତ୍ରୀ ଉପକୃତ ହେଉଛନ୍ତି । ଏହା ସତ୍ତେ୍ୱ ପ୍ରଚାରପ୍ରସାର ଅଭାବରୁ ବହୁ ଛାତ୍ରଛାତ୍ରୀ ଏହାର ସୁବିଧା ନେଇପାରୁନାହାନ୍ତି ।
ତଥ୍ୟ ମୁତାବକ ଜିଲ୍ଲାରେ ଏସ୍/ଏସ୍ଟି ବିଭାଗ ପକ୍ଷରୁ ମୋଟ୍ ୪୦ ହଷ୍ଟେଲ ଅଛି । ଗଣଶିକ୍ଷାବିଭାଗ ଅଧୀନରେ ୫ ହଷ୍ଟେଲ ଚାଲୁଛି । ଛାତ୍ରବୃତ୍ତି ପାଉଥିବା ଛାତ୍ରଛାତ୍ରୀଙ୍କ ମଧ୍ୟରୁ ୬୦ ପ୍ରତିଶତ ଗରିବ କିମ୍ବା ମଧ୍ୟବିତ ଶ୍ରେଣୀର । ସେମାନଙ୍କ ପାଠପଢ଼ା ପାଇଁ ଏହି ଛାତ୍ରବୃତ୍ତି ହିଁ ଏକ ମାଧ୍ୟମ ପାଲଟିଛି । ଅଧିକାଂଶ ସମୟରେ ଛାତ୍ରଛାତ୍ରୀ ଜାଣିବା ପୂର୍ବରୁ ଛାତ୍ରବୃତ୍ତି ଆବେଦନ ତାରିଖ ଶେଷ ହୋଇଯାଉଛି । ଆଉ କେଉଁଠି ଛାତ୍ରଛାତ୍ରୀ ଆବେଦନ କରୁଥିଲେ ହେଁ ପ୍ରଚାରପ୍ରସାର ଅଭାବରୁ ଆବଶ୍ୟକ କାଗଜପତ୍ର ମଧ୍ୟ ଦାଖଲ କରିପାରୁନାହାନ୍ତି । ଆଉ କିଛି କ୍ଷେତ୍ରରେ ଜନସେବା କେନ୍ଦ୍ରର କର୍ତ୍ତୃପକ୍ଷ ଛାତ୍ରଛାତ୍ରୀଙ୍କୁ ଭୁଲ ପ୍ରମାଣପତ୍ର ଦେଉଛନ୍ତି । ପରବର୍ତ୍ତୀ ସମୟରେ ଯାଞ୍ଚବେଳେ ନାକଚ ହେବାରୁ ଛାତ୍ରଛାତ୍ରୀଙ୍କୁ ନିରାଶ ବେହାକୁ ପଡ଼ୁଛି । ଏଭଳି କ୍ଷେତ୍ରରେ ଜିଲ୍ଲା ପ୍ରଶାସନ, ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ସ୍କୁଲ, କଲେଜରେ ସଚେତନତାର ଆବଶ୍ୟକତା ରହିଛି । ସଚେତନତା ପ୍ରକ୍ରିୟାକୁ ଅଧିକ ତ୍ୱରାନ୍ୱିତ କରାଗଲେ ଏଭଳି ସମସ୍ୟା ଉପୁଜିବନି ବୋଲି ଛାତ୍ରଛାତ୍ରୀ ସେମାନଙ୍କ ପ୍ରତିକ୍ରିୟାରେ କହିଛନ୍ତି । ଅନେକ ସମୟରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ପ୍ରଦତ୍ତ ଛାତ୍ରବୃତ୍ତି ଠିକ୍ ସମୟରେ ମିଳୁନି । ଯାହାକି ଛାତ୍ରଛାତ୍ରୀଙ୍କ ପାଇଁ ଆଉ ଏକ ସମସ୍ୟା ପାଲଟିଛି ।
ଚଳିତବର୍ଷ ସ୍କୁଲ, କଲେଜ ଖୋଲି ସାରିଥିଲେ ହେଁ ଏଯାଏଁ ଜିଲ୍ଲାର ଛାତ୍ରଛାତ୍ରୀଙ୍କୁ ଛାତ୍ରବୃତ୍ତି ମିଳିନି । ଯାହାକୁ ନେଇ ଛାତ୍ରଛାତ୍ରୀ, ଅଭିଭାବକ ଅସନ୍ତୋଷ ବ୍ୟକ୍ତ କରିଛନ୍ତି । ଏସବୁ ସତ୍ତେ୍ୱ ଜିଲ୍ଲାରେ ୧ ଲକ୍ଷ ୩୫ ହଜାର ଛାତ୍ରଛାତ୍ରୀଙ୍କୁ ୨୦୨୪-୨୫ରେ ଛାତ୍ରବୃତ୍ତି ମିଳିଛି । ଯେଉଁଥିରେ ପ୍ରି ମାଟ୍ରିକ(ନବମ, ଦଶମ ଛାତ୍ରଛାତ୍ରୀ), ମାଧୋ ସିଂ(ନବମ, ଦଶମ, ଏକାଦଶ ଶ୍ରେଣୀର ଛାତ୍ରଛାତ୍ରୀ), ପୋଷ୍ଟ ମାଟ୍ରିକ(ଏକାଦଶ ଶ୍ରେଣୀର ଛାତ୍ରଛାତ୍ରର) ଛାତ୍ରବୃତ୍ି ଅଛି । ଏହା ବ୍ୟତୀତ ଉଚ୍ଚ ଶିକ୍ଷା ବିଭାଗର ଗୋପବନ୍ଧୁ ଶିକ୍ଷା ସହାୟତା ଯୋଜନାରେ ମଧ୍ୟ ଛାତ୍ରଛାତ୍ରୀଙ୍କୁ ଛାତ୍ରବୃତ୍ତି ମିଳୁଛି । ମୋଟ ଛାତ୍ରବୃତ୍ତି ପାଇଥିବା ଛାତ୍ରଛାତ୍ରୀଙ୍କ ମଧ୍ୟରୁ ୯ ହଜାର ୪୯୪ ଏସ୍ଟି, ୧୯ ହଜାର ୧୪୭ ଏସ୍ସି, ୩୬ ହଜାର ୮୬୩ ଓବିସି/ଏସ୍ସିବିସି, ୨ ହଜାର ୮୯୬ ଇସିବି ଛାତ୍ରଛାତ୍ରୀ ଅଛନ୍ତି । ଛାତ୍ରବୃତ୍ତି ନେଇ ଅଧିକ ସଚେତନ କରାଗଲେ ଆହୁରି ବହୁ ଛାତ୍ରଛାତ୍ରୀ ଉପକୃତ ହୋଇପାରନ୍ତେ । ଏନେଇ ଡିବ୍ଲ୍ୟୁଓ ବିଦ୍ୟୁତଲତା ମହାପାତ୍ରଙ୍କ ସହ ଆଲୋଚନା କରାଯାଇଥିଲା । ତାଙ୍କ କହିବା କଥା ଓଏସ୍ଏସ୍ପି ପୋର୍ଟାଲରେ ଛାତ୍ରଛାତ୍ରୀଙ୍କ ଛାତ୍ରବୃତ୍ତି ନେଇ ସମସ୍ତ ତଥ୍ୟ ରହିଛି । ସେମାନେ ସେଥିରେ ନିଜେ ଆବେଦନ କରିପାରିବେ । ଛାତ୍ରଛାତ୍ରୀଙ୍କ ଆବେଦନ ପରେ ଆମେ ସେହି ତଥ୍ୟ ବିଭାଗୀୟ ଅଧିକାରୀଙ୍କୁ ପଠାଇଦେଉ । ସେମାନେ ଛାତ୍ରଛାତ୍ରୀଙ୍କ ବ୍ୟାଙ୍କ ଅକାଉଣ୍ଟକୁ ଛାତ୍ରବୃତ୍ତି ପଠାନ୍ତି । ଆମେ କେବଳ ଏକ ମ
