ନୂଆଦିଲ୍ଲୀ ୧୧/୦୧: ପ୍ରତିଦିନ ଗାଧୋଇବା ଦ୍ୱାରା ତ୍ୱଚା ସଫା ରହିବା ସହ ଶରୀର ସୁସ୍ଥ ରହିଥାଏ। ସେଥିପାଇଁ କୁହାଯାଏ, ନିୟମିତ ଗାଧୋଇଲେ ଶରୀରର ଅଧା ରୋଗ ଦୂର ହୋଇଥାଏ। ତେଣୁ ଅଧିକାଂଶ ଲୋକ ଦିନରେ ଥରେ କି ଦୁଇଥର ସ୍ନାନ କରନ୍ତି। ହେଲେ କେହି କେବେ ପୂରା ଜୀବନରେ କେବଳ ଦୁଇଥର ଗାଧୋଇଥିବା କଥା ଶୁଣି ନଥିବେ। ହେଲେ ଫ୍ରାନ୍ସର ରାଜା ଚତୁର୍ଦ୍ଦଶ ଲୁଇ ତାଙ୍କ ଜୀବନକାଳରେ ମାତ୍ର ଦୁଇଥର ଗାଧୋଇଥିଲେ। ରାଜାଙ୍କର ନ ଗାଧୋଇବା ପଛର କାରଣ ହେଉଛି, ସେ ଗାଧୋଇବାକୁ ଭୟ କରୁଥିଲେ। ଏପରି ସ୍ଥିତିରେ ସେ ଶରୀରର ଦୁର୍ଗନ୍ଧ ଦୂର କରିବାକୁ ଅତର ବ୍ୟବହାର କରୁଥିଲେ।
ପିତାଙ୍କ ଅକାଳ ବିୟୋଗ ପରେ କିଙ୍ଗ ଲୁଇ ମାତ୍ର ଚାରି ବର୍ଷ ବୟସରେ ରାଜାଗାଦିରେ ବସିଲେ। ତେବେ ୧୭ ଶତାବ୍ଦୀରେ ଫ୍ରାନ୍ସରେ ପ୍ରତିଦିନ ଗାଧୋଇଲେ ଗମ୍ଭୀର ରୋଗ ବ୍ୟାପୁଥିବା ଗୁଜବ ବ୍ୟାପିଯାଇଥିଲା। କେବଳ ସେତିକି ନୁହେଁ ଯିଏ ଯେତେ କମ୍ ଗାଧୋଇବ ସେ ସେତେ ନୀରୋଗ ରହିବ ବୋଲି କୁହାଯାଉଥିଲା। ଖାସ୍ ଏହି କାରଣରୁ ରାଜା ଗାଧୋଇବାକୁ ଡରୁଥିଲେ। ତେବେ ଶରୀରରୁ ଦୁର୍ଗନ୍ଧ ଦୂର କରିବାକୁ ପ୍ରତିଦିନ ସେ ନୂଆ ନୂଆ ସୁଗନ୍ଧଯୁକ୍ତ ଅତର ଲଗାଉଥିଲେ। ରାଜାଙ୍କ ରାଜ ଦରବାରରେ ସବୁଦିନ ଅତର ସିଞ୍ଚନ କରାଯାଉଥିଲା। ଖାସ୍ ଏହି କାରଣରୁ ତାଙ୍କ ରାଜପ୍ରସାଦର ନାଁ ମଧ୍ୟ ‘ଦ ପରଫ୍ୟୁମ୍ କୋର୍ଟ’ ରଖାଯାଇଥିଲା।
