ଭୁବନେଶ୍ୱର, ୧୮/୦୪: ଅଚାନକ ରାଜଧାନୀରେ ବଦଳିଲା ପାଗ । ଦିନରେ ସୃଷ୍ଟି ହେଲା ରାତିର ଭ୍ରମ । ଆକାଶରେ ମାଡ଼ି ଆସିଲା କଳାହାଣ୍ଡିଆ ମେଘ । ଘଡ଼ଘଡ଼ି ସାଙ୍ଗକୁ ସୁ ସୁ ପବନ । ଚାରିଆଡ ଅନ୍ଧାର । ଜଳମୟ ରାସ୍ତାଘାଟ । ସକାଳୁ ସକାଳୁ ରାଜଧାନୀ ଭୁବନେଶ୍ୱର ସମେତ କଟକରେ ଆରମ୍ଭ ହୋଇଛି କାଳବୈଶାଖୀ ବର୍ଷା।
ଶୁକ୍ରବାର ସକାଳୁ ପାଖା ପାଖି ୯ଟା ବେଳକୁ ଧିରେ ଧିରେ ପାଗରେ ପରିବର୍ତ୍ତନ ଦେଖିବାକୁ ମିଳିଥିଲା । ଏହାର କିଛି ସମୟ ମଧ୍ୟରେ ଚାହୁଁଚାହୁଁ ମାଡ଼ି ଆସିଥିଲା କଳା ହାଣ୍ଡିଆ ମେଘ । ଆକାଶରେ କଳା ବାଦଲ ଖେଳିଯାଇଥିଲା । ତା ସାଙ୍ଗକୁ ଘଡ଼ଘଡ଼ି ଆଉ ବିଜୁଳି ମଧ୍ୟ ମାରିଥିଲା । ଆଉ ଏହାର କିଛି ମହୂର୍ତ୍ତ ମଧ୍ୟରେ ଆରମ୍ଭ ହୋଇଯାଇଥିଲା ବର୍ଷା । ଭୀଷଣ ବର୍ଷା ସାଙ୍ଗକୁ ତୀବ୍ର ବେଗରେ ପବନ ମଧ୍ୟ ବହିଥିଲା । ଏହାର ପ୍ରଭାବରେ ଅନେକ ଗଛଡାଳ ଭାଙ୍ଗି ଯାଇଥିବା ବେଳେ କିଛି ସ୍ଥାନରେ ଦୋକାନ ଘର ମଧ୍ୟ ଭାଙ୍ଗି ଯାଇଥିଲା । ରାସ୍ତାଘାଟରେ ଗାଡ଼ି ମଧ୍ୟ ଓଲଟି ଯାଇଥିଲା ।
ତେଣୁ ଆସନ୍ତା ୨୪ ଘଣ୍ଟା ପାଇଁ ୧୫ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ପାଣିପାଗ ବିଭାଗ । ଟ୍ୱିନ୍ ସିଟିରେ ଘଣ୍ଟାଏ ପାଇଁ କାଳବୈଶାଖୀ ପାଇଁ ଆଲର୍ଟ ଜାରି କରାଯାଇଛି ।
