ଲକ୍ଷ୍ମୀପୁର,୧୬/୦୫(ଆପ୍ର): କୋରାପୁଟ ଜିଲ୍ଲା ଲକ୍ଷ୍ମୀପୁର ଥାନା ଅନ୍ତର୍ଗତ ଓଡ଼ିଆପେଣ୍ଠ ପଞ୍ଚାୟତର ପରଡିଗୁଡ଼ା ଗାଁରେ ଅଭାବନୀୟ ଘଟଣା ଘଟିଛି। ବଜ୍ରାଘାତ ଆଈମାଆଙ୍କ ସହିତ ନାତୁଣୀ ମୃତ ହୋଇଥିବା ବେଳେ ସ୍ଵାମୀ ହିଙ୍ଗୁ ମାଣ୍ଡିଙ୍ଗା ଗୁରୁତର ଆହତ ହୋଇଛନ୍ତି।
ମିଳିଥିବା ସୂଚନା ଅନୁଯାୟୀ ଆଈ ବୁରୁଦି ମାଣ୍ଡିଙ୍ଗା (୭୦) ଓ ନାତୁଣୀ କଷା ମାଣ୍ଡିଙ୍ଗା (୧୬ ) ଓ ପରଡିଗୁଡା କୁମ୍ଭାର ସାହିର ଅମ୍ବିକା କାଶୀ (୩୫)ଙ୍କର ମୃତ୍ୟୁ ହୋଇଥିବା ନେଇ ସୂଚନା ମିଳିଛି।
ଖବର ମୁତାବକ, ପରଡିଗୁଡ଼ା ଗ୍ରାମ ଠାରୁ କିଛି ଦୂରରେ ଥିବା ସର୍ଗି ପଦର ନଦୀ ପାଖରେ ରହିଥିବା ନିଜ ବିଲ ପାଖରେ ବିଲରେ ଖରା ଧାନ ଜଗିବା ପାଇଁ ଏକ ଡାଳରେ ନିର୍ମିତ କୁଡ଼ିଆ ନିର୍ମାଣ କରି ରହି ଆସୁଥିଲେ। କୁଡ଼ିଆରେ ବର୍ଷା ଘଡଘଡି ହେଉଥିବାରୁ ଏହି କୁଡ଼ିଆରେ ୯ଜଣ ବସିଥିଲେ। ଶୁକ୍ରବାର ଦିନ ମଧ୍ୟାହ୍ନ ସମୟରେ ଦିନ ପାଖାପାଖି ୧.୩୦ ସମୟରେ ବର୍ଷା ସହିତ ଘଡଘଡି ବିଜୁଳି ମାରି ବଜ୍ରପାତ ହୋଇଥିଲା। ଏହି ବଜ୍ରପାତରେ ତିନି ଜଣଙ୍କ ମୃତ୍ୟୁ ହୋଇଥିବା ବେଳେ ୬ଜଣ ଆହତ ହୋଇଛନ୍ତି। ଆହତ୬ଜଣଙ୍କୁ ଲକ୍ଷ୍ମୀପୁର ମେଡିକାଲରେ ଚିକିତ୍ସା ଚାଲିଛି।
ଏହି ଖବର ପାଇ ଲକ୍ଷ୍ମୀପୁର ଥାନା ଆଇଆଇସି ସୁଜ୍ଞାନୀ ସାହୁ, ପୋଲିସ ସହିତ ଘଟଣା ସ୍ଥଳରେ ପହଞ୍ଚି ସ୍ଥିତି ଯାଞ୍ଚ କରିଥିଲେ। ଏବଂପୂର୍ବତନ ବିଧାୟକ କୈଳାଶ ଚନ୍ଦ୍ର କୁଲେସିକା ଓ ବ୍ଲକ ଅଧ୍ୟକ୍ଷା ଶୁଆଇ କୁଲେସିକା ମଧ୍ୟ ପହଞ୍ଚି ଥିଲେ। ଡାକ୍ତରୀ ଟିମ ମଧ୍ୟ ଘଟଣା ସ୍ଥଳରେ ପହଞ୍ଚି ତଦନ୍ତ କରିଥିଲେ। ଖବର ଲେଖା ହେବା ପର୍ଯ୍ୟନ୍ତ ଶବ ବ୍ୟବଚ୍ଛେଦ ହୋଇନଥିବା ଜଣାପଡିଛି।
