ପୋଲସରା ୨୫।୫ ପୋଲସରା ଥାନା ଅନ୍ତର୍ଗତ ମଥୁରା ଗ୍ରାମରୁ ଚୋରି ହୋଇଥିବା ଏକ ଟ୍ରାକ୍ଟରକୁ ପୋଲିସ ପୁରୀ ଜିଲା ପିପିଲିରୁ ଜବତ କରିଛି। ପୋଲସରା ଥାନା ମଥୁରା ଆଡୁଆ ସାହିର କାହ୍ନୁଚରଣ ସ୍ବାଇଁ ତାଙ୍କର ଟ୍ରାକ୍ଟରଟି ଘର ନିକଟରେ ରଖିଥିଲେ। ଗତ ୨୨ ତାରିଖ ରାତିରେ କେହି ଦୁର୍ବୃତ୍ତ ଚୋରାଇ ନେଇଯାଇଥିଲେ। ଏଥିନେଇ ପୋଲସରା ଥାନାରେ ଏକ ମାମଲା ରୁଜୁ ହୋଇଥିଲା।
ଏହାକୁ ନେଇ ପୋଲସରା ଥାନା ଆଇଆଇସି କୌସିକ ମାଝୀଙ୍କ ନେତୃତ୍ୱରେ ସ୍ବତନ୍ତ୍ର ସ୍କାଡ୍ ଗଠନ କରି ଜିଲା ଓ ଜିଲା ବାହାରେ ବିଭିନ୍ନ ସ୍ଥାନରେ ଚଢ଼ାଉ କରି ପୁରୀ ଜିଲା ପିପିଲିଠାରେ ରାସ୍ତାକଡ଼ରୁ ଜବତ କରାଯାଇଥିଲା। ଏହି ଗାଡ଼ିକୁ ସେଠାରୁ ଆଣି ରବିବାର କାହ୍ନୁଙ୍କୁ ହସ୍ତାନ୍ତର କରାଯାଇଛି। ଅଭିଯୁକ୍ତମାନଙ୍କୁ ଗିରଫ କରିବା ଲାଗି ଚଢ଼ାଉ ଚାଲିଥିବା ସହ ଘଟଣାର ଅଧିକ ତଦନ୍ତ ଚାଲିଥିବାର ଥାନାଧିକାରୀ ମାଝୀ କହିଛନ୍ତି।
