ନୂଆଦିଲ୍ଲୀ: ନିକଟରେ ରାଜ୍ୟ ପରିବହନ ପ୍ରାଧିକରଣ (ଏସ୍ଟିଏ) ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଥିଲା । ଯେଉଁଥିରେ କୁହାଯାଇଥିଲା ଯେ, କୌଣସି ଗାଡ଼ି ବିନା ପରମିଟ୍, ଫିଟ୍ନେସ୍ କିମ୍ବା ଇନ୍ସ୍ୟୁରାନ୍ସ, ଟ୍ୟାକ୍ସରେ ଚାଲୁଥିବ ତା’ ବିରୋଧରେ ଚାଲାଣ କଟାଯିବ । ଭାରତରେ ଟ୍ରାଫିକ ନିୟମ ଉଲ୍ଲଂଘନ କରିବା କେବଳ ଜରିମାନାରେ ସୀମିତ ନୁହେଁ, ବରଂ ଏହା ଡ୍ରାଇଭିଂ ଲାଇସେନ୍ସ ରଦ୍ଦ ହେବାର କାରଣ ମଧ୍ୟ ହୋଇପାରେ । ବାରମ୍ବାର ନିୟମ ଉଲ୍ଲଂଘନ କରୁଥିବା ଚାଳକଙ୍କ ପାଇଁ ସରକାର କଡ଼ା ନିୟମ ଲାଗୁ କରିଛନ୍ତି । ତେବେ କେତେ ଚାଲାଣ କଟିବା ପରେ ଡ୍ରାଇଭିଂ ଲାଇସେନ୍ସ ରଦ୍ଦ ହୁଏ କି ? ଆସନ୍ତୁ ଜାଣିବା ଏ ବିଷୟରେ ।
ଭାରତରେ ଟ୍ରାଫିକ ନିୟମ ରାଜ୍ୟ ଅନୁଯାୟୀ କିଛି ଭିନ୍ନ ହୋଇପାରେ । ତେବେ ସାଧାରଣତଃ କେତେକ ରାଜ୍ୟରେ ୫ଟିରୁ ଅଧିକ ଚାଲାଣ କଟିବା ପରେ ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇପାରେ । ଯେପରିକି ଉତ୍ତର ପ୍ରଦେଶରେ ୫ଟିରୁ ଅଧିକ ଚାଲାଣ ବକେୟା ଥିଲେ ଡ୍ରାଇଭିଂ ଲାଇସେନ୍ସ ରଦ୍ଦ କରାଯିବା ସହ ଗାଡ଼ିକୁ ବ୍ଲାକଲିଷ୍ଟ କରାଯାଇପାରେ । ଅନ୍ୟପକ୍ଷେ, ଗୁରୁତର ଉଲ୍ଲଂଘନ ଯେପରିକି ନିଶାସେବନ କରି ଗାଡ଼ି ଚାଳନା, ବିନା ଲାଇସେନ୍ସରେ ଗାଡ଼ି ଚାଳନା ବା ନାବାଳକଙ୍କ ଦ୍ୱାରା ଗାଡ଼ି ଚାଳନା କରିବା ପରି ଘଟଣାରେ ପ୍ରଥମ ଉଲ୍ଲଂଘନରେ ହିଁ ଲାଇସେନ୍ସ ରଦ୍ଦ ହୋଇପାରେ । ମୋଟର ଯାନ ଆଇନ, ୧୯୮୮ ଅନୁଯାୟୀ, କିଛି ଉଲ୍ଲଂଘନଗୁଡ଼ିକ ଗୁରୁତର ଭାବେ ବିବେଚନା କରାଯାଇ ଲାଇସେନ୍ସ ରଦ୍ଦ କରାଯାଇପାରେ ।
କେଉଁ ନିୟମ ଉଲଙ୍ଘନ ପାଇଁ କେତେ ଜୋରିମାନା ଓ କେଉଁ କେଉଁ ଦଣ୍ଡ ?
ବିନା ଲାଇସେନ୍ସରେ ଗାଡ଼ି ଚାଳନା: ୫ ହଜାର ଟଙ୍କା ଜରିମାନା ଓ ୩ ମାସ ଜେଲ ଦଣ୍ଡ ସହ ଲାଇସେନ୍ସ ରଦ୍ଦ
ନିଶାସେବନ କରି ଗାଡ଼ି ଚାଳନା: ପ୍ରଥମ ଥର ପାଇଁ ୧୦ ହଜାର ଟଙ୍କା ଜରିମାନା ଓ ୬ ମାସ ଜେଲ୍ ଏବଂ ଦ୍ୱିତୀୟ ଥର ପାଇଁ ୧୫ ହଜାର ଟଙ୍କା ଜରିମାନା ଓ ୨ ବର୍ଷ ଜେଲ୍
ବିନା ହେଲମେଟରେ ଦୁଇଚକିଆ ଗାଡ଼ି ଚାଳନା: ୧ ହଜାର ଟଙ୍କା ଜରିମାନା ଓ ୩ ମାସ ପାଇଁ ଲାଇସେନ୍ସ ନିଲମ୍ବନ
ନାବାଳକଙ୍କ ଦ୍ୱାରା ଗାଡ଼ି ଚାଳନା: ୨୫ ହଜାର ଟଙ୍କା ଜରିମାନା ଓ ୩ ବର୍ଷ ଜେଲ୍, ଗାଡ଼ି ରେଜିଷ୍ଟ୍ରେସନ ରଦ୍ଦ ଏବଂ ୨୫ ବର୍ଷ ବୟସ ପର୍ଯ୍ୟନ୍ତ ଲାଇସେନ୍ସ ପାଇଁ ଅଯୋଗ୍ୟତା
ଓଭରସ୍ପିଡିଂ ବା ରେସିଂ: ୫ ହଜାର ଟଙ୍କା ଜରିମାନା ଏବଂ ବାରମ୍ବାର ଉଲ୍ଲଂଘନ ହେଲେ ଲାଇସେନ୍ସ ରଦ୍ଦ
ଯଦି ଚାଲାଣର ଜରିମାନା ୯୦ ଦିନ ମଧ୍ୟରେ ଜମା କରାନଯାଏ, ତେବେ ଏହି ମାମଲା କୋର୍ଟକୁ ଯାଇପାରେ । କୋର୍ଟ ଜରିମାନା ଆଦାୟ ପାଇଁ ନିର୍ଦ୍ଦେଶ ଜାରି କରିପାରନ୍ତି ଏବଂ ଏହା ପରେ ପୁଲିସ ଆପଣଙ୍କ ଉପରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିପାରେ । ଏହା ବ୍ୟତୀତ, ବକେୟା ଚାଲାଣର ସଂଖ୍ୟା ଅଧିକ ହେଲେ ଡ୍ରାଇଭିଂ ଲାଇସେନ୍ସ ରଦ୍ଦ ହେବା ସହ ଗାଡ଼ି ଜବତ ହୋଇପାରେ । ଏଠି ପ୍ରଶ୍ନ ଉଠୁଛି ପୁନର୍ବାର ଲାଇସେନ୍ସ କେମିତି ପାଇପାରିବେ ? ଯଦି ଆପଣଙ୍କ ଲାଇସେନ୍ସ ରଦ୍ଦ ହୋଇଯାଏ, ତେବେ ଆପଣଙ୍କୁ ପୁନଃ ଆବେଦନ କରିବାକୁ ପଡ଼ିପାରେ । ଏଥିପାଇଁ https://parivahan.gov.in/ ଜାତୀୟ ପରିବହନ ପୋର୍ଟାଲରେ ଯାଇ ଅନଲାଇନ ସେବା ମାଧ୍ୟମରେ ଆବେଦନ କରିବାକୁ ହେବ ।
ନିୟମ ଅନୁସାରେ, ଆପଣଙ୍କୁ କୋର୍ଟରେ ଅନୁରୋଧ କରିବାକୁ ପଡ଼ିପାରେ ବା ନୂଆ ଡ୍ରାଇଭିଂ ଟେଷ୍ଟ ଦେବାକୁ ହୋଇପାରେ । ଏବେ ଜାଣିବା କେମିତି ଲାଇସେନ୍ସ ରଦ୍ଦ ହେବାରୁ ରୋକିହେବ । ଟ୍ରାଫିକ ନିୟମ ଯଥାସମ୍ଭବ ପାଳନ କରନ୍ତୁ । ହେଲମେଟ୍, ସିଟବେଲ୍ଟ, ବୈଧ ଲାଇସେନ୍ସ, ଇନସୁରାନ୍ସ ଓ ପିୟୁସି ସାର୍ଟିଫିକେଟ ସବୁବେଳେ ସାଙ୍ଗରେ ରଖନ୍ତୁ । ଚାଲାଣ କଟିବା ପରେ ୯୦ ଦିନ ମଧ୍ୟରେ ଜରିମାନା ଜମା କରନ୍ତୁ । ଆହୁରି ସହଜ ଉପାୟ ହେଉଛି, ଡିଜିଲକର ବା ଏମ୍-ପରିବହନ ଆପ୍ରେ ଡିଜିଟାଲ ଡକ୍ୟୁମେଣ୍ଟ ରଖନ୍ତୁ, ଯାହାକୁ ମଧ୍ୟ ବୈଧ ବିବେଚନା କରାଯାଏ ।
