ନୂଆଦିଲ୍ଲୀ: କାନାଡାର ଭାଙ୍କୌଭର ସହରରେ ଶନିବାର ରାତିରେ ଏକ ଭୟଙ୍କର ଦୁର୍ଘଟଣା ଘଟିଛି। ଲାପୁ-ଲାପୁ ଡେ ଉତ୍ସବ ପାଳନ ପାଇଁ ଜମା ହୋଇଥିବା ଲୋକଙ୍କ ଭିଡରେ ଧସେଇ ପଶିଛି ଏକ କଳା ଏସୟୁଭି। ଯାହା ଫଳରେ ଅନେକ ଲୋକ ମୃତାହତ ହୋଇଛନ୍ତି। ଭାଙ୍କୌଭର ପୋଲିସ ଅନୁସାରେ, ଏହି ଘଟଣା ରାତି ପ୍ରାୟ ୮ଟା ୧୪ ମନିଟରେ ଇଷ୍ଟ ୪୩ ଆଭେନ୍ୟୁ ଓ ଫ୍ରେଜର ଷ୍ଟ୍ରିଟ ନିକଟରେ ଘଟିଛି। ପୋଲିସ ଗାଡ଼ି ଚଳାଉଥିବା ୩୦ ବର୍ଷୀୟ ବ୍ୟକ୍ତିଙ୍କୁ ଗିରଫ କରିଛି।
ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଘଟଣାସ୍ଥଳରେ ଅନେକ ମୃତଦେହ ରାସ୍ତାରେ ପଡ଼ିଥିବା ଓ ଆହତମାନଙ୍କୁ ସାହାଯ୍ୟ କରାଯାଉଥିବା ଦୃଶ୍ୟ ଦେଖାଯାଇଛି। ଗାଡ଼ିଟି ଏକ ଟ୍ରକ ସହ ଧକ୍କା ହେବା ପରେ ଅଟକି ଯାଇଥିଲା, ଯାହାର ବନେଟ ମଧ୍ୟ ଭାଙ୍ଗି ନଷ୍ଟ ହୋଇଯାଇଛି। ପୋଲିସ ଏହି ଘଟଣାକୁ ଏକ "ମାସ କାଜୁଆଲଟି ଇନସିଡେଂଟ" ଭାବେ ବର୍ଣ୍ଣନା କରିଛି ଓ ଏହାର ତଦନ୍ତ ମେଜର କ୍ରାଇମ ସେକ୍ସନ ଦ୍ୱାରା କରାଯାଉଛି।
ଲାପୁ ଲାପୁ ଡେ ଉତ୍ସବ ଫିଲିପାଇନ୍ସର ପ୍ରଥମ ଜାତୀୟ ବୀର ଦାତୁ ଲାପୁ-ଲାପୁଙ୍କ ସମ୍ମାନ ଉଦେଶ୍ୟରେ ପାଳନ କରାଯାଏ। ଯିଏ ୧୫୨୧ ମସିହାରେ ମାକଟାନ ଯୁଦ୍ଧରେ ସ୍ପେନୀୟ ଔପନିବେଶିକମାନଙ୍କ ବିରୁଦ୍ଧରେ ଲଢ଼ିଥିଲେ। ଏହି ଉତ୍ସବ ବ୍ରିଟିଶ କଲମ୍ବିଆରେ ୨୦୨୩ ମସିହା ଠାରୁ ଆନୁଷ୍ଠାନିକ ଭାବେ ପାଳନ କରାଯାଉଛି। ତେବେ କାନାଡାରେ ରହୁଥିବା ଫିଲିପିନୋ ଲୋକମାନେ ପ୍ରତିବର୍ଷ ଏହି ଉତ୍ସବକୁ ଧୁମଧାମରେ ପାଳନ କରିଥାନ୍ତି।
ଭାଙ୍କୌଭରର ମେୟର କେନ ସିମ ଏହି ଘଟଣାକୁ "ଭୟଙ୍କର" ବୋଲି ବର୍ଣ୍ଣନା କରି କହିଛନ୍ତି, "ଆମେ ଶୀଘ୍ର ଅଧିକ ସୂଚନା ପ୍ରଦାନ କରିବୁ। କିନ୍ତୁ ଏବେ ପୋଲିସ ଅନେକ ମୃତ୍ୟୁ ଓ ଆହତଙ୍କ ଖବର ନିଶ୍ଚିତ କରିଛି। ଆମର ସମବେଦନା ଏହି ଘଟଣାରେ ପ୍ରଭାବିତ ସମସ୍ତଙ୍କ ସହ ଓ ଫିଲିପିନୋ ସମୁଦାୟଙ୍କ ପାଇଁ ରହିଛି।" କାନାଡାର ପ୍ରଧାନମନ୍ତ୍ରୀ ମାର୍କ କାର୍ନେ ମଧ୍ୟ ଏହି ଘଟଣାରେ ଗଭୀର ଦୁଃଖ ପ୍ରକାଶ କରି ଶୋକସନ୍ତପ୍ତ ପରିବାର ଓ ଫିଲିପିନୋ ସମୁଦାୟଙ୍କୁ ସମବେଦନା ଜଣାଇଛନ୍ତି।
ପୋଲିସ ଏପର୍ଯ୍ୟନ୍ତ ମୃତ୍ୟୁ ଓ ଆହତଙ୍କ ସଂଖ୍ୟା ସ୍ପଷ୍ଟ କରିନାହାନ୍ତି। ତେବେ ଏହି ଦୁର୍ଘଟଣାରେ ୯ରୁ ଅଧିକ ଲୋକଙ୍କ ମୃତ୍ୟୁ ହୋଇଛି ବୋଲି ଜଣାପଡିଛି। ସ୍ଥାନୀୟ ସୂଚନା ଅନୁସାରେ, ଏହି ଘଟଣା ଆତଙ୍କବାଦୀ ଆକ୍ରମଣ ନୁହେଁ ବୋଲି ପୋଲିସ ନିଶ୍ଚିତ କରିଛି। ତେବେ ଏ ମାମଲାରେ ତଦନ୍ତ ଜାରି ରହିଛି ଏବଂ ପୋଲିସ ସୂଚନା ପାଇଁ ୬୦୪-୭୧୭-୨୫୦୦ ନମ୍ବରରେ ଯୋଗାଯୋଗ କରିବାକୁ ଅନୁରୋଧ କରିଛି।
ଏହି ଘଟଣା ଫିଲିପିନୋ ସମୁଦାୟ ଓ ଭାଙ୍କୌଭରର ବାସିନ୍ଦାଙ୍କ ମଧ୍ୟରେ ଗଭୀର ଶୋକ ଓ ଆତଙ୍କ ସୃଷ୍ଟି କରିଛି। ସମସ୍ତେ ଏକଜୁଟ ହୋଇ ପୀଡ଼ିତମାନଙ୍କୁ ସମର୍ଥନ ଓ ସାହାଯ୍ୟ ପ୍ରଦାନ କରୁଛନ୍ତି।
