ପାତ୍ରପୁର, ୧୭/୦୫ : ଯବାନଙ୍କ ମନୋବଳ ବୃଦ୍ଧି ପାଇଁ ରାଜ୍ୟ ସରକାରଙ୍କ ସହ ଜିଲ୍ଲା ଓ ବ୍ଲକ ସଦର ମହକୁମାରେ ତ୍ରିରଙ୍ଗା ବାଇକ୍ ଶୋଭାଯାତ୍ରା ଅନୁଷ୍ଠିତ ହେଉଛି। ଏହି କ୍ରମରେ ଶନିବାର ଗଞ୍ଜାମ ଜିଲ୍ଲା ଚିକିଟି ନିର୍ବାଚନମଣ୍ଡଳୀ ରାଷ୍ଟ୍ରୀୟ ସୁରକ୍ଷା ନାଗରିକ ସମାଜ ତରଫରୁ ସ୍ୱତନ୍ତ୍ର ଭାବେ ଏହି କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ଚିକିଟି ବ୍ଲକ କରବାଲୁଆ ଠାରୁ ଆରମ୍ଭ ହୋଇ ଏହି ଶୋଭାଯାତ୍ରା ଚିକିଟିପେଣ୍ଠ, ଚିକିଟି ଗଡ଼, ଧାନଘର, ମହିସାନପୁର, କେଲୁଆ ଦେଇ ପାତ୍ରପୁର ଠାରେ ଶେଷ ହୋଇଥିଲା।
ଏହି ଶୋଭାଯାତ୍ରାରେ ଚିକିଟି ବିଧାୟକ ମନୋରଞ୍ଜନ ଦ୍ୟାନ ସାମନ୍ତରାଙ୍କ ସହ ତାଙ୍କ ପତ୍ନୀ ମୀନା ଦ୍ୟାନ ସାମନ୍ତରା ଯୋଗ ଦେଇଥିଲେ। ଚିକିଟି ବିଧାୟକ ତାଙ୍କ ପତ୍ନୀଙ୍କୁ ବାଇକ୍ ପଛରେ ବସାଇ ସମର୍ଥକଙ୍କ ଗହଣରେ ତ୍ରିରଙ୍ଗା ଶୋଭାଯାତ୍ରାରେ ବୁଲିଥିଲେ। ଭାରତ ମାତା କି ଜୟ ଓ ବନ୍ଦେ ମାତରଂ ଧ୍ୱନିରେ ଚିକିଟି ନିର୍ବାଚନ ମଣ୍ଡଳୀ କମ୍ପି ଉଠିଥିଲା। କେ.ନୂଆଗାଁ ଥାନା ଆଇଆଇସି କିଶୋର ସାସମଲ ଓ ଜରଡ଼ା ଥାନା ଆଇଆଇସି ଟୁନା ସାସମଲ ଉଭୟେ ନିଜ ପୋଲିସ ଟିମ୍ ସହ ଉପସ୍ଥିତ ରହି ଉଭୟ ସୁରକ୍ଷା ଓ ଟ୍ରାଫିକ ବ୍ୟବସ୍ଥା ବୁଝିଥିଲେ।
