ଖମାର,୧୧/୫ : ପାଳଲହଡ଼ା ବ୍ଲକ ଖମାର ଥାନା ବିରାଳମୁଣ୍ଡା ଗ୍ରାମ ବୁଲାଣି ନିକଟ ରାସ୍ତା କଡ଼ରେ ଥିବା ଶାଳ ଗଛରେ ଏକ ଟ୍ରକ ଭାରସାମ୍ୟ ହରାଇ ପିଟି ହୋଇଯାଇଛି । ଫଳରେ ଘଟଣାସ୍ଥଳରେ ଗାଡ଼ି ଚାଳକଙ୍କ ମୃତ୍ୟୁ ହୋଇଥିବା ବେଳେ ଗାଡ଼ିରେ ଥିବା ହେଲ୍ପର ଗୁରୁତର ହୋଇଥିବା ଖମାର ପୋଲିସ ପକ୍ଷରୁ ସୂଚନା ମିଳିଛି।
ପ୍ରକାଶ ଯେ, ପାଳଲହଡ଼ା ବ୍ଲକ ଝାରବେଡା ପଞ୍ଚାୟତ ରାଇପାଳ ଗ୍ରାମର ଗିରିଧାରୀ ବାରିକଙ୍କ ପୁଅ ହର୍ଷ (୩୨) ଶନିବାର ଅପରାହ୍ନରେ ଢେଙ୍କାନାଳ ଜିଲ୍ଲା ଭୂଷଣ ଟାଟା କମ୍ପାନୀରେ ଆଇରନ ଖୋଲାକରୀ ନିଜ ଘର ରାଇପାଳ ଗ୍ରାମକୁ ଆସୁଥିଲେ। ରାତି ପ୍ରାୟ ୧୧ଟା ସମୟରେ ଖମାରଠାରୁ ନୁଥୁରିପସି ଛକ ଦେଇ ଚୋର ଘାଟି ଦେଇ ରାଇପାଳ ଯାଉଥିଲେ । ଏହି ସମୟରେ ବିରାଳମୁଣ୍ଡା ଗ୍ରାମ ନିକଟ ବୁଲାଣି ପାଖ ରାସ୍ତାକଡ଼ରେ ଥିବା ଏକ ଶାଳ ଗଛରେ ଭାରସାମ୍ୟ ହରାଇ ପିଟି ଦେଇଥିଲେ । ଫଳରେ ଗାଡ଼ି ଚାଳକ ହର୍ଷଙ୍କ ଛାତିରେ ଷ୍ଟିୟରିଙ୍ଗ ଚାପି ହବା ସହ ଗୋଡ଼ରେ ଗଛ ଚାପି ହୋଇଯିବାରୁ ଘଟଣାସ୍ଥଳରେ ହିଁ ହର୍ଷଙ୍କ ମୃତ୍ୟୁ ହୋଇଥିଲା। ଅନ୍ୟପଟେ ଗାଡ଼ିରେ ଥିବା ସେଇ ରାଇପାଳ ଗ୍ରାମର ମନୋଜ ନହରା ଛାତି ଏବଂ ମୁଣ୍ଡରେ ଆଘାତ ଲାଗି ଗୁରୁତର ହୋଇଥିବା ପରିବାର ଲୋକ କହିଛନ୍ତି। ଗୁରୁତର ମନୋଜ ନହରାକୁ କେନ୍ଦୁଝର ସରକାରୀ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ଖମାର ଥାନା ଅଧିକାରୀ ଅରୁଣ କୁମାର ପଣ୍ଡା କହିଛନ୍ତି। ମୃତ ହର୍ଷଙ୍କ ଦୁଇ ନାବାଳକ ପୁଅ ଝିଅ ଥିବା ପରିବାର ଲୋକ କହିଛନ୍ତି।
ଦୁର୍ଘଟଣାର ଖବରପାଇ ବିରାଳମୁଣ୍ଡା ଗ୍ରାମର କିଛି ଲୋକ ଘଟଣାସ୍ଥଳରେ ପହଁଚି ଟ୍ରକରେ ଚାପି ହୋଇ ରହିଥିବା ଡ୍ରାଇଭରକୁ ବାହାର କରିବାକୁ ଚେଷ୍ଟା କରି ବିଫଳ ହବାରୁ ପ୍ରଥମେ ଖମାର ପୋଲିସ ପରେ ସ୍ଥାନୀୟ ଦମକଳ ବିଭାଗକୁ ଫୋନରେ ଜଣାଇଥିଲେ। ଦମକଳବାହିନୀ ଆସିବା ପରେ ଉଭୟ ଖମାର ପୋଲିସ ଓ ଦମକଳ ବିଭାଗ ମିଶି ଡ୍ରାଇଭରକୁ ଉଦ୍ଧାର କରିଥିବା ଥାନା ଅଧିକାରୀ ଶ୍ରୀ ପଣ୍ଡା କହିଛନ୍ତି। ଏହାକୁ ନେଇ ଖମାର ଥାନା ପୋଲିସ ଏକ ମାମଲା ରୁଜୁ କରି ଶବ ବ୍ୟବଛେଦ ଲାଗି ପଠାଇଥିବା କହିଛି।
