ନୂଆଦିଲ୍ଲୀ,୬।୮: ଭାତରକୁ ଆମେରିକାର ଆଉ ଏକ ବଡ଼ ଝଟକା। ଆମେରିକା ରାଷ୍ଟ୍ରପତି ଡୋନାଲ୍ଡୋ ଟ୍ରମ୍ପ ଯାହା ଧମକ ଦେଇଥିଲେ, ଶେଷରେ ତାହା ହିଁ କଲେ। ଭାରତ ଉପରେ ୨୫% ଅତିରିକ୍ତ ଟାରିଫ୍ ଲଗାଇବା ନେଇ ଆଜି ଘୋଷଣା କରିଛନ୍ତି ଟ୍ରମ୍ପ। ଏହା ସହ ଏବେ ଭାରତ ଉପରେ ଆମେରିକାର ଟାରିଫ୍ ୫୦%କୁ ବୃଦ୍ଧି ଘଟିଛି। ରୁଷଠାରୁ ତେଲ କିଣୁଥିବାରୁ ଟ୍ରମ୍ପ ଭାରତ ଉପରେ ଏହି ଅତିରିକ୍ତ ଶୁଳ୍କ ଲଗାଇଛନ୍ତି।
ଗତ କିଛି ଦିନ ହେବ ଆମେରିକା ଓ ଭାରତ ମଧ୍ୟରେ ବାଣିଜ୍ୟିକ ବିବାଦ ଦେଖିବାକୁ ମିଳିଥିଲା। ପୂର୍ବରୁ ଆମେରିକା ରାଷ୍ଟ୍ରପତି ଟ୍ରମ୍ପ ଓ ତାଙ୍କ ପ୍ରଶାସନ ଭାରତ ଉପରେ ରୁଷଠାରୁ ତେଲ କିଣୁଥିବା ନେଇ ଅସନ୍ତେଷ ପ୍ରକାଶ କରିଥିଲେ। ଏନେଇ ଟ୍ରମ୍ପ ମଙ୍ଗଳବାର ସୋସିଆଲ ମିଡିଆ ପ୍ଲାଟଫର୍ମ ‘ଟ୍ରୁଥ ସୋସିଆଲ’ରେ ଘୋଷଣା କରିଥିଲେ। ୨୪ ଘଣ୍ଟା ପୂରଣ ନହେଉଣୁ ଟ୍ରମ୍ପ ଭାରତ ଉପରେ ଲଗାଇଦେଲେ ୨୫% ଅତିରିକ୍ତ ଟାରିଫ୍।
ଟ୍ରମ୍ପଙ୍କ ଦ୍ବାରା ସାଇନ୍ କରାଯାଇଥିବା ନୂଆ ନିର୍ଦେଶ ଅନୁସାରେ, ଏହି ଟାରିଫ୍ ୨୧ ଦିନ ଭିତରେ ଲାଗୁ କରାଯିବ, ଅର୍ଥାତ ୨୭ ଅଗଷ୍ଟ ୨୦୨୫ ରୁ ଭାରତରୁ ଆମେରିକା ପଠାଯାଉଥିବା ସାମଗ୍ରୀ ଉପରେ ଏହା ଲାଗୁ ହେବ। ଯେଉଁ ସାମଗ୍ରୀଗୁଡ଼ିକ ଅଗଷ୍ଟ ୨୭ ପୂର୍ବରୁ ବାହାରି ସାରିଛି ଏବଂ ସେପ୍ଟେମ୍ବର ୧୭ ପୂର୍ବରୁ ଆମେରିକାରେ ପହଞ୍ଚିଛନ୍ତି, ସେଗୁଡ଼ିକୁ ଶୁଳ୍କରୁ ମୁକ୍ତ କରାଯିବ। ଟ୍ରମ୍ପ ସ୍ପଷ୍ଟ କରିଛନ୍ତି ଏହି ସବୁ ଟାରିଫ୍ ଅନ୍ୟ ସବୁ ଶୁଳ୍କ ଓ ଟ୍ୟାକ୍ସର ଅତିରିକ୍ତ ହେବ। ତେବେ ଏଥିରେ କିଛି ଖାସ୍ ମାମଲାରେ ଛାଡ ମଧ୍ୟ ଦିଆଯିବ। ଏହା ସହ ଟ୍ରମ୍ପ ଚେତାବନୀ ଦେଇଛନ୍ତି, ଯଦି କୌଣସି ଦେଶ ସିଧାସଳଖ ଭାବରେ ରୁଷଠାରୁ ତେଳ କିଣେ ତେବେ ତା ଉପରେ ଆମେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିବୁ।
