ନୂଆଦିଲ୍ଲୀ, ୨୫।୫: ପଶ୍ଚିମ ଏସିଆରେ ଇରାନ ଏବଂ ଆମେରିକା ମଧ୍ୟରେ ଲାଗି ରହିଥିବା ଉତ୍ତେଜନାପୂର୍ଣ୍ଣ ପରିସ୍ଥିତି ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ ଏବଂ ଚୀନ୍କୁ କଡ଼ା ଚେତାବନୀ ଦେଇଛନ୍ତି । ଟ୍ରମ୍ପ ସ୍ପଷ୍ଟ ଭାବେ କହିଛନ୍ତି ଯେ, ଯଦି ଏହି ଦୁଇ ମହାଶକ୍ତି ଦେଶ ଇରାନ ସହିତ ଚାଲିଥିବା ଯୁଦ୍ଧରେ ପ୍ରବେଶ କରନ୍ତି କିମ୍ବା ତେହେରାନକୁ ସାମରିକ ସହାୟତା ଯୋଗାନ୍ତି, ତେବେ ଏହାର ପରିଣାମ ସେମାନଙ୍କ ପାଇଁ ଅତ୍ୟନ୍ତ ଭୟଙ୍କର ହେବ । ମଧ୍ୟପ୍ରାଚ୍ୟର ବର୍ଦ୍ଧିତ ଉତ୍ତେଜନାକୁ ନେଇ ରାଷ୍ଟ୍ରପତି ଟ୍ରମ୍ପ ତାଙ୍କର ଅଫିସିଆଲ୍ ସୋସିଆଲ ମିଡିଆ ପ୍ଲାଟଫର୍ମ 'ଟ୍ରୁଥ୍ ସୋସିଆଲ୍'ରେ ଏକ ପୋଷ୍ଟ ସେୟାର କରିଛନ୍ତି । ସେଥିରେ ସେ ଦାବି କରିଛନ୍ତି ଯେ ଚୀନ୍ ରାଷ୍ଟ୍ରପତି ସୀ ଜିନପିଙ୍ଗ୍ ବେଜିଂରେ ହୋଇଥିବା ସେମାନଙ୍କର ସାକ୍ଷାତ ସମୟରେ ତାଙ୍କୁ ସ୍ପଷ୍ଟ ପ୍ରତିଶ୍ରୁତି ଦେଇଥିଲେ ।
ଟ୍ରମ୍ପଙ୍କ ଅନୁଯାୟୀ, ଜିନପିଙ୍ଗ୍ କହିଥିଲେ ଯେ ଚୀନ୍ କୌଣସି ପରିସ୍ଥିତିରେ ଇରାନକୁ ଅସ୍ତ୍ରଶସ୍ତ୍ର ବିକ୍ରି କରିବ ନାହିଁ କିମ୍ବା ଯୋଗାଇବ ନାହିଁ । ଏହି ପ୍ରତିଶ୍ରୁତି କେବଳ ସରକାରୀ ସ୍ତରରେ ନୁହେଁ, ବରଂ ଚୀନ୍ର ସମସ୍ତ ବେସରକାରୀ ଏବଂ ବାଣିଜ୍ୟିକ କମ୍ପାନୀଗୁଡ଼ିକ ପାଇଁ ମଧ୍ୟ ପ୍ରଯୁଜ୍ୟ ବୋଲି ଜିନପିଙ୍ଗ୍ କହିଥିଲେ । ଟ୍ରମ୍ପ କହିଛନ୍ତି ଯେ ପରସ୍ପରର ଦ୍ୱିପାକ୍ଷିକ ସମ୍ପର୍କକୁ ଦୃଷ୍ଟିରେ ରଖି ସେ ଚୀନ୍ ରାଷ୍ଟ୍ରପତିଙ୍କ ଏହି କଥାକୁ ବିଶ୍ୱାସକୁ ନେଇଛନ୍ତି ।
ଏହା ବି ପଢ଼ନ୍ତୁ... War: ଆରମ୍ଭ ହେଲା କି ମହାଯୁଦ୍ଧ ? ଇରାନ୍ ଉପରେ ବର୍ଷିଲେ କୁଏତ-ବାହାରିନ, ସାମରିକ ଘାଟିକୁ ଟାର୍ଗେଟ୍
ରୁଷ ଏବଂ ରାଷ୍ଟ୍ରପତି ପୁତିନଙ୍କ ସ୍ଥିତିକୁ ନେଇ ଟ୍ରମ୍ପଙ୍କ ବୟାନ
ରୁଷକୁ ନେଇ କଥା ହେବା ବେଳେ ଟ୍ରମ୍ପ ୟୁକ୍ରେନ ଯୁଦ୍ଧ ଏବଂ ୟୁକ୍ରେନର ରାଷ୍ଟ୍ରପତି ଭୋଲୋଦିମିର ଜେଲେସ୍କିଙ୍କ ସହ ତାଙ୍କର ସମ୍ପର୍କର ଉଦାହରଣ ଦେଇଛନ୍ତି । ଟ୍ରମ୍ପ କହିଛନ୍ତି ଯେ, ରୁଷର ରାଷ୍ଟ୍ରପତି ଭ୍ଲାଦିମିର ପୁତିନ ମଧ୍ୟ ତାଙ୍କୁ ଆଶ୍ୱାସନା ଦେଇଛନ୍ତି ଯେ ମସ୍କୋ ଇରାନକୁ କୌଣସି ପ୍ରକାରର ଅସ୍ତ୍ରଶସ୍ତ୍ର ବିକ୍ରି କରିବ ନାହିଁ । ଏହି ପ୍ରସଙ୍ଗରେ ଆମେରିକାର ୟୁକ୍ରେନ ନୀତିକୁ ସ୍ପଷ୍ଟ କରି ଟ୍ରମ୍ପ କହିଛନ୍ତି ଯେ, ପୁତିନ ଏକଥା ଭଲଭାବେ ବୁଝିଛନ୍ତି ଯେ ଆମେରିକା ସିଧାସଳଖ ୟୁକ୍ରେନକୁ ଅସ୍ତ୍ର ବିକ୍ରି କରୁନାହିଁ, ବରଂ ନାଟୋ ଦେଶଗୁଡ଼ିକୁ ଅସ୍ତ୍ର ଯୋଗାଉଛି । ନାଟୋ ଦେଶଗୁଡ଼ିକ ଏହାର ପୂର୍ଣ୍ଣ ମୂଲ୍ୟ ପୈଠ କରନ୍ତି ଏବଂ ସେହି ଅସ୍ତ୍ରଶସ୍ତ୍ର କେଉଁଠି ଓ କିପରି ବଣ୍ଟନ ହେଉଛି, ସେ ସମ୍ପର୍କରେ ତାଙ୍କର କୌଣସି ସୂଚନା ନଥାଏ ।
ନିଜର ବାର୍ତ୍ତାକୁ ଶେଷ କରି ରାଷ୍ଟ୍ରପତି ଟ୍ରମ୍ପ ସ୍ପଷ୍ଟ ଚେତାବନୀ ଦେଇ କହିଛନ୍ତି, "ମୋ ମତରେ, ଯେଉଁ ଦୁଇଟି ପ୍ରମୁଖ ଦେଶର ନାଁ ପ୍ରାୟତଃ ଇରାନ ପ୍ରସଙ୍ଗରେ ନିଆଯାଏ, ସେମାନେ ବର୍ତ୍ତମାନ ଏହି ମାମଲାରେ ସାମିଲ ନାହାଁନ୍ତି । କିନ୍ତୁ ଯଦି ସେମାନେ ଏଥିରେ ଜଡ଼ିତ ହୁଅନ୍ତି, ତେବେ ଏହା ସେମାନଙ୍କ ପାଇଁ ଅତ୍ୟନ୍ତ କ୍ଷତିକାରକ ହେବ । ଏହା ସେମାନଙ୍କ ନିଜର ସର୍ବୋଚ୍ଚ ସ୍ୱାର୍ଥ ପାଇଁ ମଧ୍ୟ କଦାପି ଅନୁକୂଳ ହେବ ନାହିଁ ।"
