ୱାଶିଂଟନ,୦୧/୧୨: ଆମେରିକାର ରାଷ୍ଟ୍ରପତି ନିର୍ବାଚିତ ହୋଇଥିବା ଡୋନାଲ୍ଡ ଟ୍ରମ୍ପ୍ଙ୍କ ଦ୍ୱାରା ନିଯୁକ୍ତ ପ୍ରତିରକ୍ଷା ମନ୍ତ୍ରୀ ପିଟ୍ ହେଗସେଥଙ୍କ ବିରୋଧରେ ଯୌନ ଉତ୍ପୀଡ଼ନ ଅଭିଯୋଗ ଆସିଛି । ଅନେକ ମହିଳାଙ୍କୁ ସେ ଯୌନ ଶୋଷଣ କରିଥିବା ସୂତ୍ରରୁ ଜଣାପଡ଼ିଛି ।
ଆମେରିକୀୟ ଗଣମାଧ୍ୟମ ନ୍ୟୁୟର୍କ ଟାଇମ୍ସ ରିପୋର୍ଟ ମୁତାବକ, ପିଟ୍ ହେଗସେଥଙ୍କ ମାଆଙ୍କ ୬ ବର୍ଷର ପୁରୁଣା ଇମେଲ୍କୁ ଆଧାର କରି ଏହି ତଥ୍ୟ ମିଳିଛି । ୨୦୧୮ରେ ଲେଖାଯାଇଥିବା ଏହି ମେଲ୍ ଅନୁସାରେ, ପିଟ୍ଙ୍କ ମାଆ ପେନିଲୋପ୍ ଅଭିଯୋଗ କରିଥିଲେ ଯେ ହେଗସେଥ ଅନେକ ବର୍ଷ ଧରି ପୃଥକ ମହିଳାଙ୍କୁ ଯୌନ ଉତ୍ପୀଡ଼ନ ଦେଇଆସୁଥିଲେ । ତାଙ୍କ ଚରିତ୍ର ବାବଦରେ ଅନେକ ନକାରାତ୍ମକ କଥା ଏଥିରେ ଉଲ୍ଲେଖ ରହିଥିଲା। ପେନିଲୋପ ଏଭଳି ସମୟରେ ଉକ୍ତ ମେଲ୍ ଲେଖିଥିଲେ, ଯେବେ କି ପତ୍ନୀ ସମନ୍ଥାଙ୍କଠାରୁ ପିଟ୍ଙ୍କର ଛାଡ଼ପତ୍ର ହେବାର ଥିଲା ।
ମେଲ୍ରେ ପେନିଲୋପ୍ ଆହୁରି ଲେଖିଥିଲେ, ପିଟ୍ଙ୍କ ଚରିତ୍ର ଏବଂ ବ୍ୟବହାରକୁ ନେଇ ଚୁପ୍ ରହିବା ଲାଗି ଅନେକ ଚେଷ୍ଟା କରିଥିଲି । କିନ୍ତୁ ରହିପାରି ନ ଥିଲି । ହେଗସେଥଙ୍କ ହରକତକୁ ନେଇ ପତ୍ନୀ ସମନ୍ଥା କିଭଳି ଯନ୍ତ୍ରଣାର ସମ୍ମୁଖୀନ ହେଉଥିଲେ,ତାହା ମୁଁ ଅନୁଭବ କରିପାରୁଛି। ଜଣେ ମହିଳା ହିସାବରେ ମୁଁ ଚୁପ୍ ରହିବା ସମ୍ଭବ ହେଉନାହିଁ । ତେବେ ଏହାର କିଛିଦିନ ପରେ ପେନିଲୋପ୍ ରାଗରେ ଏହି ଇମେଲ୍ ଲେଖିଥିବା କହିବା ସହ ହେଗସେଥଙ୍କୁ କ୍ଷମା ମାଗିଥିଲେ ।
