ନୂଆଦିଲ୍ଲୀ, ୮/୦୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ୍ ୱାର ସ୍ଥିତି ବିଶ୍ୱରେ ଜାରି ରହିଛି । ଏହାକୁ ନେଇ ଆମେରିକା-ଚୀନ ମୁହାଁମୁହିଁ ହୋଇଛନ୍ତି । ଚୀନ ଉପରେ ଅତିରିକ୍ତ ୫୦ ପ୍ରତିଶତ ଶୁଳ୍କ ଲଗାଇବାକୁ ଧମକ ନେଇଛନ୍ତି ଡୋନାଲ଼୍ଡ ଟ୍ରମ୍ପ । ଫଳରେ ଚୀନ ସାମଗ୍ରୀ ଉପରେ ଆମେରିକାର ମୋଟ୍ ଟାରିଫ୍ ୯୪ ପ୍ରତିଶତ ଛୁଇଁବ । ପୂର୍ବରୁ ଚୀନ ଉପରେ ୩୪ ପ୍ରତିଶତ ଟାରିଫ୍ ଲଗାଇଥିଲା ଆମେରିକା ।
ଆମେରିକାର ସବୁ ସାମଗ୍ରୀ ଉପରେ ଚୀନ ରାଷ୍ଟ୍ରପତି ଜିନପିଙ୍ଗ ୩୫% ଶୁଳ୍କ ଲଗାଇବାର ୪୮ ଘଣ୍ଟା ପରେ ଅତିରିକ୍ତ ଶୁଳ୍କ ଲାଗୁ କରିବାକୁ ଚେତାବନୀ ଦେଇଛି ଆମେରିକା । ଯେସାକୁ ତେସା ନୀତିରେ ବିଶ୍ୱାସ ରଖୁଥିବା ବିଶ୍ବର ଦୁଇ ଶକ୍ତିଶାଳୀ ନେତାଙ୍କ ଟାରିଫ୍ ଯୁଦ୍ଧ ଆଗକୁ ବିଶ୍ୱ ବଜାରକୁ ଅଧିକ ପ୍ରଭାବିତ କରିବ । ସେପଟେ ଜବାବରେ ଜିନପିଙ୍ଗ ପୁଣି ଟାରିଫ୍ ବୃଦ୍ଧି କରିପାରନ୍ତି ବୋଲି କୁହାଯାଉଛି । ଯଦି ଏଭଳି ହୁଏ ଭାରତକୁ ଫାଇଦା ମିଳିପାରେ । ଟ୍ରମ୍ପଙ୍କ ଶୁଳ୍କ ଉପରେ ୯୦ ଦିନର ରୋକ୍ ଲାଗିପାରେ ବୋଲି ଚର୍ଚ୍ଚା ଭିତରେ ଏଭଳି ଘୋଷଣା କରିଛି ଆମେରିକା । ଟ୍ରମ୍ପଙ୍କ ଟାରିଫ୍ ନୀତି ଯୋଗୁଁ ସବୁ ଦେଶ ପ୍ରଭାବିତ ହୋଇଛି । ଗତକାଲି ଆମେରିକା ସମେତ ଭାରତର ସେୟାର ବଜାର କ୍ରାସ୍ କରିଥିଲା । ବ୍ଲାକ ମନ୍ଡ଼େ ଦେଖିବାକୁ ମିଳିଥିଲା । ବିଶ୍ବ ବଜାର ଥରହର ହୋଇଥିଲା । ୧୯ ଲକ୍ଷ କୋଟି ସ୍ୱାହା ହୋଇଥିଲା । ଫଳରେ ଯାହାକୁ ନେଇ ନିବେଶକ ଚିନ୍ତାରେ ପଡ଼ିଥିଲେ ।
ଟ୍ରମ୍ପଙ୍କ ଶୁଳ୍କ ନୀତି ଯୋଗୁଁ ବିଶ୍ବର ସବୁ ଦେଶ ପ୍ରଭାବିତ ହୋଇଛନ୍ତି । ଏପ୍ରିଲ ୨ରେ ବିଶ୍ବର ବିଭିନ୍ନ ଦେଶକୁ ଟାର୍ଗେଟ କରି ପାଲଟା ଶୁଳ୍କ ଘୋଷଣା କରିଥିଲେ । ଅଟୋ ମୋବାଇଲ, ଦୁଗ୍ଧ, ଇସ୍ପାତ ଏବଂ ଇଲେକ୍ଟ୍ରୋନିକ୍ସ ଭଳି କ୍ଷେତ୍ର ଏବି ଶୁଳ୍କ ଦ୍ବାରା ବିପଦରେ ପଡ଼ିଛି । ଟ୍ରମ୍ପଙ୍କ ଟାରିଫ୍ ଘୋଷଣା ପରେ ବାଣିଜ୍ୟ ଯୁଦ୍ଧ ତୀବ୍ର ହୋଇଛି । ଆମେରିକା ବିରୋଧରେ ଚୀନ ୩୪ ପ୍ରତିଶତ ଟାରିଫ୍ ଲଗାଇବାକୁ ଘୋଷଣା କରିଥିଲା । ଡ୍ରାଗନରେ ଏଭଳି କାର୍ଯ୍ୟାନୁଷ୍ଠାନ ପରେ ଚୀନ ବିରୋଧରେ ଆସନ୍ତାକାଲିଠୁ ଅତିରିକ୍ତ ୫୦ ପ୍ରତିଶତ ଟାରିଫ୍ ଧମକ ଦେଇଛନ୍ତି । ଯଦି ଚୀନ ଏହାର ୩୪ ପ୍ରତିଶତ ଟାରିଫ୍କୁ ପ୍ରତ୍ୟାହାର ନ କରେ ଅତିରିକ୍ତ ୫୦ ପ୍ରତିଶତ ଟାରିଫ୍ ଲାଗୁ ହେବ । ଚୀନ ସହ କୌଣସି ଆଲୋଚନା ହେବ ନାହିଁ । ସବୁ ବୈଠକ ବାତିଲ କରାଯିବ ବୋଲି କହିଛନ୍ତି ଡ଼ୋନାଲ୍ଡ ଟ୍ରମ୍ପ ।
