ଭୁବନେଶ୍ୱର ୨୪/୧୧: କ୍ୟାପିଟାଲ ରିଜନ ରିଙ୍ଗ ରୋଡ୍ ପ୍ରକଳ୍ପ କାର୍ଯ୍ୟ ଆଉ ପାଦେ ଆଗକୁ ବଢିଛି । ଏନ୍ଏଚ୍ଏଆଇ ପକ୍ଷରୁ ପ୍ରଥମ ପ୍ୟାକେଜ୍ କାମ ପାଇଁ ଟେଣ୍ଡର ଆହ୍ୱାନ କରାଯାଇଛି । ୪୦ କିମି ରାସ୍ତା ପାଇଁ ମୋଟ୍ ୧୭୧୫ କୋଟି ଟଙ୍କା ଖର୍ଚ୍ଚ ହେବ । ଏହି କାମର ସମୀକ୍ଷା କରିବା ସହ କେନ୍ଦ୍ର ସଡ଼କ ଓ ପରିବହନ ମନ୍ତ୍ରୀ ନୀତିନ ଗଡକରୀଙ୍କୁ ଧନ୍ୟବାଦ ଜଣାଇଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ପ୍ୟାକେଜ୍-୧ ରେ ରାମେଶ୍ୱରରୁ-ବିଲିପଡା ରାସ୍ତା ନିର୍ମାଣ ହେବ । ୬ ଲେନ୍ ବିଶିଷ୍ଟ ଏହି ରାସ୍ତା ନିର୍ମାଣ ପାଇଁ ଆବଶ୍ୟକୀୟ ଜମି ଅଧିଗ୍ରହଣ ସରିଛି । ଟେଣ୍ଡର ଡକା ହୋଇଛି । ଏହା ଚୂଡାନ୍ତ ହେବା ପରେ ଫେବ୍ରୁଆରୀ ମାସରୁ କାମ ଆରମ୍ଭ ହେବ । ଯୁଦ୍ଧକାଳୀନ ଭିତ୍ତିରେ କାମ ସାରିବାକୁ ଟାର୍ଗେଟ ରଖାଯାଇଛି ।
ସେହିପରି ପ୍ୟାକେଜ-୨ରେ ବିଲିପଡ଼ାରୁ ଗୋବିନ୍ଦପୁର କାମ ହେବ । ଏଥିପାଇଁ ମଧ୍ୟ ଆସନ୍ତା ମାସରେ ଟେଣ୍ଡର ଡାକିବା ଯୋଜନା ରହିଛି। ଏହାପରେ ଗୋବିନ୍ଦପୁରରୁ କଟକ ଟାଙ୍ଗୀ ତୃତୀୟ ପ୍ୟାକେଜରେ କାମ ଆରମ୍ଭ କରିବାକୁ ଯୋଜନା ହୋଇଛି । ତେବେ ତୃତୀୟ ଫେଜ୍ ପାଇଁ ଜମି ଅଧିଗ୍ରହଣ କାମ ସରିନି । ଭୁବନେଶ୍ୱର-କଟକ ସହର ଭିତରେ ଏନ୍ଏଚ୍ ଯାଇଛି । ଏନ୍ଏଚ୍ ପାଇଁ ଟ୍ରାଫିକ ଯନ୍ତ୍ରଣା ଭୋଗୁଛନ୍ତି ଲୋକେ । ହଂସପାଳ ରାସ୍ତାରେ ଟ୍ରାଫିକ୍ ଭିଡ଼ ନାକେଦମ କରୁଛି । ସେହିପରି ପ୍ରତିଦିନ ଦୁର୍ଘଟଣା ଘଟୁଛି । ପଳାଶୁଣି ନିକଟରେ ଦୁର୍ଘଟଣାରେ ମାସକ ଭିତରେ ୪ ମୁଣ୍ଡ ଗଡିଲାଣି । ପ୍ରତିଦିନ ସହରରେ ଦୁର୍ଘଟଣା ଘଟୁଛି ।
ଆଗକୁ ସହର ବଢୁଛି । ଭୁବନେଶ୍ୱର ଓ କଟକ ଜନସଂଖ୍ୟାକୁ ଦୃଷ୍ଟିରେ ରଖି ଏହି ଏନ୍ଏଚ୍ ନିର୍ମାଣ କରାଯିବ । ଜାତୀୟ ରାଜପଥ- ୧୬ (କ)କୁ ଖୋର୍ଦ୍ଧା ଟାଙ୍ଗିକୁ କଟକ ଟାଙ୍ଗି ପର୍ୟ୍ୟନ୍ତ ସହର ବାହାରେ ଏହି ରାସ୍ତା ନିର୍ମାଣ କରାଯାଉଛି । ଏହା ହେଲେ ସହର ଭିତର ରାସ୍ତାରୁ ଚାପ କମିବ । ଆନ୍ଧ୍ର ପ୍ରଦେଶରୁ କଲିକତା ଯାଉଥିବା ବଡ଼ ବଡ଼ ଟ୍ରକ ସହର ଭିତରେ ନ ପଶି ବାହାରେ ଯିବ । ଦୀର୍ଘଦିନ ଧରି ଏହି ରାସ୍ତା କାମ ପାଇଁ ପ୍ରସ୍ତାବ ଥିବେ ମଧ୍ୟ କାମ ଆଗଉନଥିଲା । ରାସ୍ତା ନିର୍ମାଣକୁ ନେଇ ସାଂସଦ ଶ୍ରୀମତୀ ଷଡ଼ଙ୍ଗୀ କେନ୍ଦ୍ର ମନ୍ତ୍ରୀ ଶ୍ରୀ ଗଡକରୀଙ୍କୁ ଭେଟି ଦାବି ଜଣାଇଥିଲେ ।
