ଭୁବନେଶ୍ୱର,୨୫/୧୦: ନବମ ଶ୍ରେଣୀରେ ପଢୁଥିବା ଦୁଇ ଜଣ ଛାତ୍ରୀଙ୍କୁ ଭୁବନେଶ୍ୱରରୁ ଅପହରଣ କଲେ । ପରେ ଗଞ୍ଜାମ ଜିଲ୍ଳା ଭଞ୍ଜନଗରରେ ଦୁଷ୍କର୍ମ କଲେ । ମୁହଁ ଖୋଲିଲେ ହତ୍ୟା କରିଦେବେ ବୋଲି ଧମକ ଦେଲେ । ଏମିତି କାଣ୍ଡ କରିଥିବା ୨ ଅଭିଯୁକ୍ତଙ୍କୁ ଗିରଫ କରିଛି ଭରତପୁର ଥାନା ପୁଲିସ୍ । ଅଭିଯୁକ୍ତମାନେ ହେଲେ ଭଞ୍ଜନଗରର ଅଜୟ ନାୟକ ଓ ପ୍ରଧାନ ଓରଫ ଆଲୋକ । ଏମାନଙ୍କ କବଳରୁ ୨ ନାବାଳିକାଙ୍କୁ ପୁଲିସ୍ ଉଦ୍ଧାର କରିବା ସହ ଏକ କାର୍ ଜବତ କରିଛି ।
ଭରତପୁର ଥାନା ଶାମପୁରରେ ଅଜୟ ଓ ପୋଖରୀପୁଟରେ ଡ୍ରାଇଭର ଆଲୋକ ରହୁଥିଲା । ଅଜୟ ଭରତପୁର ଶଙ୍କରେଶ୍ୱର ନଗରର ଜଣେ ନବମ ଶ୍ରେଣୀର ଛାତ୍ରୀଙ୍କୁ ଜାଣିଥିଲେ। ୨ଦିନ ତଳେ ତାଙ୍କୁ ଭଞ୍ଜନଗର ବୁଲାଇ ନେବେ ବୋଲି କହିଥିଲେ । ଅଜୟର କଥାରେ ଛାତ୍ରୀ ଜଣଙ୍କ ରାଜି ହୋଇନଥିଲେ । ଅଜୟ ଭଞ୍ଜନଗର ପଳାଇଥିଲେ । ବୁଧବାର ସହଯୋଗୀ ଆଲୋକକୁ କହିଥିଲେ ଉକ୍ତ ଛାତ୍ରୀଙ୍କୁ ନେଇ ଭଞ୍ଜନଗର ଆସିବାକୁ । ଆଲୋକ ଉକ୍ତ ଛାତ୍ରୀଙ୍କୁ ବୁଲି ଯିବାକୁ କହିଥିଲେ । ହେଲେ ସେ ରାଜି ହୋଇଥିଲେ । ୨ ନାବାଳିକା ଛାତ୍ରୀ ବଜାର ଯାଉଥିବା ବେଳେ ଆଲୋକ ଘରେ ଛାଡ଼ିଦେବାକୁ କହି କାର୍ରେ ବସାଇଥିଲେ । ତା’ପରେ ବିଭିନ୍ନ ବାହାନା କରି ଭଞ୍ଜନଗର ନେଇ ଯାଇଥିଲେ । ସେଠାରେ ଆଲୋକ ଓ ଅଜୟ ଜଣ ମିଶି ୨ ଛାତ୍ରୀଙ୍କୁ ଦୁଷ୍କର୍ମ କରିଥିଲେ । ଏ ବିଷୟରେ ଯଦି କାହାକୁ କହିବ ତା’ହେଲେ ଭିଡିଓ ଭାଇରାଲ୍ କରି ଦେବୁ ବୋଲି ଧମକ ଦେଇଥିଲେ । ଏହା ଶୁଣି ସେମାନେ ଡରି ଯାଇଥିଲେ । ଏପଟେ ଘର ଲୋକ ଛାତ୍ରୀଙ୍କୁ ନ ପାଇ ଥାନାରେ ଅଭିଯୋଗ କରିଥିଲେ । ପୁଲିସ୍ ଅପହରଣ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ଗୁରୁବାର ୨ ଛାତ୍ରୀଙ୍କୁ ଉଦ୍ଧାର କରିଥିଲା । ଦୁଇ ଅଭିଯୁକ୍ତଙ୍କୁ ପୁଲିସ୍ ଡାକ୍ତରମାଇନା କରାଇ କୋର୍ଟ ଚାଲାଣ କରିଛି ।
