ବାସୁଦେବପୁର, ୬/୬: ବାସୁଦେବପୁର ଧାମରା ରାସ୍ତାର ମଖଲପୁର ଛକର ଅନତି ଦୂରରେ ପୁଣି ଆଉ ଏକ ସଡକ ଦୁର୍ଘଟଣା ଘଟିଛି। ବାଲି ବୋଝେଇ ଓ କୋଇଲା ବୋଝେଇ ଟ୍ରକ ମଧ୍ୟରେ ମୁହାଁ ମୁହିଁ ଧକ୍କା ହୋଇଛି।
ସୂଚନା ମୁତାବକ, ଜାମୁଝଡ଼ିରୁ ବାସୁଦେବପୁର ଅଭିମୁଖେ ଆସୁଥିବା ବାଲି ବୋଝେଇ ଟ୍ରକ ଓ ଧାମରାରୁ କୋଇଲା ବୋଝେଇ କରି ଆସୁଥିବା ଟ୍ରକ ମଧ୍ୟରେ ଧକ୍କା ହୋଇଛି। ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ ଦୁଇଟି ଗାଡିର ଡ୍ରାଇଭର ଗାଡି ଭିତରେ ଚାପି ହୋଇ ରହିଥିବା ବେଳେ ଦମକଳ ବାହିନୀ ଆସି ଦୀର୍ଘ ୨ ଘଣ୍ଟା ପରେ ଉଦ୍ଧାର କରାଯାଇଥିଲା। କୋଇଲା ଗାଡିର ଡ୍ରାଇଭର ଗୌରାଙ୍ଗ ସୁତାର ଗୁରୁତର ଆହତ ହୋଇଥିବା ବେଳେ ବାଲି ଗାଡିର ଡ୍ରାଇଭରଙ୍କର ଭିତରେ ଚାପି ହୋଇ ମୃତ୍ୟୁ ଘଟିଛି।
ମୃତ ଡ୍ରାଇଭର ରାଜଘାରପୋଖରୀ ଗ୍ରାମର ଜୟନ୍ତ କୁମାର ଦାସ ବୋଲି ଜଣାପଡିଛି । ଅନ୍ୟପଟେ ଗୁରୁତର ଡ୍ରାଇଭରଙ୍କୁ ଉଦ୍ଧାର କରି ବାସୁଦେବପୁର ଡାକ୍ତରଖାନା ନେଇଆସିଥିବା ବେଳେ ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ଭଦ୍ରକ ଡାକ୍ତରଖାନା ସ୍ଥାନାନ୍ତର କରାଯାଇଛି।
