ବ୍ରହ୍ମପୁର ୦୯/୬: ଦୁଇ ଘଣ୍ଟା ଧରି ଲିଫ୍ଟରେ ଫସି ରହିଲେ ଦୁଇ ମହିଳା । ଦେବଦୂତ ସାଜି ଦୁଇ ମହିଳାଙ୍କୁ ସୁରକ୍ଷିତ ଭାବେ ଉଦ୍ଧାର କଲେ ଅଗ୍ନିଶମ କର୍ମଚାରୀ। ଏଭଳି ଏକ ଘଟଣା ଦେଖିବାକୁ ମିଳିଛି ବ୍ରହ୍ମପୁର ଗିରିରୋଡ଼ ଅଞ୍ଚଳରେ। ସୂଚନା ମୁତାବକ, ଗିରିରୋଡ଼ ଠାରେ ରହିଥିବା କେ.ଭି ପ୍ଲାଜା ନାମକ ଏକ କୋଠାକୁ ବ୍ରଜନଗର ଦ୍ବିତୀୟ ଲାଇନ ଅଞ୍ଚଳର ସରିତା ମେହେର ଓ ସୌଦାମିନୀ ମେହେର ଯାଇଥିଲେ । କୋଠାର ଦ୍ଵିତୀୟ ମହଲାକୁ କୌଣସି କାମରେ ଯାଇଥିଲେ। ସେଠାରୁ ତଳକୁ ଫେରିବା ପାଇଁ ଲିଫ୍ଟର ବ୍ୟବହାର କରିଥିଲେ। ତେବେ ଅଧା ରାସ୍ତା ଆସିବା ପରେ ହଠାତ୍‌ ଲିଫ୍ଟଟି ବନ୍ଦ ହୋଇଯାଇଥିଲା। ଉଭୟ ସରିତା ଓ ସୌଦାମିନୀ ଲିଫ୍ଟରେ ରହିଥିବା ଏମର୍‌ଜେନ୍ସି ସୁଇଚ୍‌କୁ ଚିପିବା ପରେ ମଧ୍ୟ ତାହା କାମ ଦେଇନଥିଲା। ଏହାଛଡ଼ା ଲିଫ୍ଟରେ କୌଣସି ସହାୟତା ନମ୍ବର ମଧ୍ୟ ଉପଲବ୍ଧ ନଥିଲା। କୌଣସି ଉପାୟ ନ ପାଇ ଦୁଇ ମହିଳା ପାଟି କରିବା ସହିତ ଲିଫ୍ଟର କବାଟକୁ ମଧ୍ୟ ବାଡ଼େଇଥିଲେ। ତଥାପି ମଧ୍ୟ ତାହା ତଳକୁ ନ ଯିବା ଯୋଗୁଁ ନିଜ ପରିବାର ଲୋକଙ୍କୁ ଘଟଣା ସମ୍ପର୍କରେ ଜଣାଇଥିଲେ। ପରିବାର ଲୋକେ ସମ୍ପୃକ୍ତ କୋଠାରେ ପହଞ୍ଚିବା ପରେ ସ୍ଥାନୀୟ ବାସିନ୍ଦା ଏନେଇ ଜାଣିବା ସହ ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ ବିଭାଗ ଖବର ପାଇ ନିଜର ବିଭିନ୍ନ ଯନ୍ତ୍ରାଂଶ ଦ୍ବାରା ପ୍ରଥମେ ଲିଫ୍ଟକୁ ତଳକୁ ଆଣିବା ପରେ ଲିଫ୍ଟର କବାଟକୁ ମଧ୍ୟ ବାହାର କରି ଦୁଇ ମହିଳାଙ୍କୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ଦୀର୍ଘ ଦୁଇ ଘଣ୍ଟା ଧରି ମହିଳା ମାନେ ଲିଫ୍ଟରେ ରହିବା ଯୋଗୁଁ ଶ୍ବାସରୁଦ୍ଧ ହୋଇ ସାମାନ୍ୟ ଅସୁସ୍ଥ ହୋଇପଡ଼ିଥିଲେ । ଦେବଦୂତ ସାଜି ଅଗ୍ନିଶମ ବିଭାଗର କର୍ମଚାରୀ ମାନେ ପହଞ୍ଚି ଉଦ୍ଧାର କରିଥିବା ଯୋଗୁଁ ଦୁଇ ମହିଳାଙ୍କ ପରିବାର ଅଗ୍ନିଶମ ବିଭାଗକୁ ଧନ୍ୟବାଦ ଜ୍ଞାପନ କରିଛନ୍ତି ।