ମସ୍କୋ: ରୁଷ-ୟୁକ୍ରେନ ଯୁଦ୍ଧ ମଧ୍ୟରେ ବର୍ତ୍ତମାନର ସବୁଠାରୁ ବଡ଼ ଏବଂ ଚାଞ୍ଚଲ୍ୟକର ଖବର ସାମ୍ନାକୁ ଆସିଛି । ଶନିବାର ମଧ୍ୟରାତ୍ରିରେ କୁର୍ସ୍କ ଅଞ୍ଚଳରେ ପୁଟିନଙ୍କ ହେଲିକପ୍ଟର ଉପରେ ୟୁକ୍ରେନ ଡ୍ରୋନ୍ ଆକ୍ରମଣ କରିଥିବା ଜଣାପଡ଼ିଛି । ସେପଟେ ରୁଷ ସେନା ୟୁକ୍ରେନୀୟ ଡ୍ରୋନକୁ ଗୁଳି କରି ଖସାଇ ଦେଇଥିଲା ଏବଂ ରାଷ୍ଟ୍ରପତି ଅଳ୍ପକେ ରକ୍ଷା ପାଇଯାଇଥିଲେ। କିନ୍ତୁ ପୁଟିନଙ୍କ ହେଲିକପ୍ଟର ଉପରେ ଆକ୍ରମଣ କରିବାକୁ ୟୁକ୍ରେନର ପ୍ରୟାସକୁ ଏହି ଖବର ସାରା ବିଶ୍ୱରେ ହଇଚଇ ସୃଷ୍ଟି କରିଛି ।
ରୁଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ମଧ୍ୟରେ ରୁଷ ଗଣମାଧ୍ୟମ ପକ୍ଷରୁ ଏହି ବଡ଼ ଦାବି କରାଯାଇଛି । ରୁଷ କର୍ତ୍ତୃପକ୍ଷଙ୍କ ଅନୁଯାୟୀ, କୁର୍ସ୍କ ଅଞ୍ଚଳ ଉପରେ ଉଡ଼ୁଥିବା ସମୟରେ ଏକ ୟୁକ୍ରେନୀୟ ଡ୍ରୋନ୍ ଦ୍ୱାରା ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ହେଲିକପ୍ଟର ଉପରେ ଆକ୍ରମଣ କରିବାକୁ ଚେଷ୍ଟା କରାଯାଇଥିଲା। ଏହି କଥିତ ଆକ୍ରମଣକୁ ରୁଷୀୟ ବାୟୁ ପ୍ରତିରକ୍ଷା ପ୍ରଣାଳୀ ପଣ୍ଡ କରିଦେଇଥିଲା। ରୁଷ ବାୟୁ ପ୍ରତିରକ୍ଷା ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ୟୁକ୍ରେନ ଡ୍ରୋନ ବ୍ୟବହାର କରି ପୁଟିନଙ୍କ ହେଲିକପ୍ଟରକୁ ଟାର୍ଗେଟ କରିଥିଲା। ଏହା ଏକ ଯୋଜନାବଦ୍ଧ ଆକ୍ରମଣ ଥିଲା, ଯାହାକୁ ଆମେ ପଣ୍ଡ କରିଦେଇଛୁ ।
ରିପୋର୍ଟ ଅନୁଯାୟୀ, ରୁଷର ବାୟୁ ପ୍ରତିରକ୍ଷା ପ୍ରଣାଳୀ ପୂର୍ଣ୍ଣ ଶକ୍ତି ସହିତ ଜବାବ ଦେଇଥିଲା ଏବଂ ପୁଟିନଙ୍କ ଉଡ଼ାଣ ପଥରେ ପହଞ୍ଚିବା ପୂର୍ବରୁ ଡ୍ରୋନକୁ ନଷ୍ଟ କରିଦେଇଥିଲା । ଏହି ଘଟଣାରେ କାହାରି କୌଣସି କ୍ଷତି ହୋଇନାହିଁ ଏବଂ ରାଷ୍ଟ୍ରପତି ସୁରକ୍ଷିତ ଅଛନ୍ତି । ରୁଷ ସୁରକ୍ଷା ଏଜେନ୍ସିଗୁଡ଼ିକ ଏବେ ଘଟଣାର ତଦନ୍ତ କରୁଛନ୍ତି । ୟୁକ୍ରେନ ଡ୍ରୋନ୍ କିପରି କୁର୍ସ୍କ ଭଳି ଏକ ସମ୍ବେଦନଶୀଳ ଅଞ୍ଚଳରେ ପ୍ରବେଶ କଲା ଏବଂ ଏହି ଆକ୍ରମଣ ପୁଟିନଙ୍କୁ ଟାର୍ଗେଟ କରି କରାଯାଇଥିଲା ନା ଏହା ପଛର ଆଉ କଣ କାରଣ ରହିଛି ଦେ ଦିଗ ଉପରେ ରୁଷ ତଦନ୍ତ କରୁଛି । ସେପଟେ ୟୁକ୍ରେନ ସରକାର କିମ୍ବା ସେନା ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ପ୍ରତିକ୍ରିୟା ମିଳିନାହିଁ ।
