ନୂଆଦିଲ୍ଲୀ: ଗୁରୁବାର ସକାଳ ୫ ରୁ ୭ ମଧ୍ୟରେ ୟୁକ୍ରେନର ଡନିପ୍ରୋ ସହର ଉପରେ ଋଷ ଆଇସିବିଏମ୍ କ୍ଷେପଣାସ୍ତ୍ର ଆକ୍ରମଣ କରିଛି । ଏହି ଘଟଣାକୁ ନେଇ ଋଷର ମୁଖପାତ୍ର ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରୁଥିବାବେଳେ ସାମ୍ବାଦିକ ସମ୍ମିଳନୀ ମଝିରେ ତାଙ୍କୁ କ୍ରେମଲିନରୁ ଏକ ଫୋନ୍ କଲ ଆସିଥିଲା।
ଋଷର ବୈଦେଶିକ ମନ୍ତ୍ରଣାଳୟର ମୁଖପାତ୍ର ମାରିଆ ଜାଖାରୋଭା କ୍ରେମଲିନରୁ କଲ ପାଇବା ପରେ ଆଇସିବିଏମ୍ କ୍ଷେପଣାସ୍ତ୍ର ଆକ୍ରମଣ ସମ୍ପର୍କରେ କିଛି କହିବାକୁ ମନା କରି ଦେଇଛନ୍ତି । ବୋଧହୁଏ କ୍ରେମଲିନ୍ ତାଙ୍କୁ ଏହି ପ୍ରସଙ୍ଗରେ କହିବାକୁ ବାରଣ କରିଥିଲା । ତାଙ୍କ ମାଇକ୍ ଅନ୍ ଥିବା କାରଣରୁ ଏହା ସର୍ବସାଧାରଣକୁ ଆସିଯାଇଥିବା ଜଣାପଡିଛି।
ଏହି ସାମ୍ବାଦିକ ସମ୍ମିଳନୀରେ ଋଷର ମୁଖପାତ୍ରଙ୍କୁ ୟୁକ୍ରେନ୍ର ଡନିପ୍ରୋ ସହରରେ ଥିବା "ୟୁଜମାଶ୍" ଏରୋସ୍ପେସ୍ ଉତ୍ପାଦକ ସହିତ ଜଡିତ କ୍ଷେପଣାସ୍ତ୍ର ଆକ୍ରମଣ ସମ୍ପର୍କରେ କୌଣସି ମନ୍ତବ୍ୟ ନଦେବାକୁ ନିର୍ଦ୍ଦେଶ ଦିଆଯାଇଛି, ଯାହା ବିଷୟରେ ପଶ୍ଚିମି ଦେଶ ଗୁଡିକ ଆଲୋଚନା କରିବା ଆରମ୍ଭ କରିଦେଇଛନ୍ତି ।
ୟୁକ୍ରେନର ରାଜଧାନୀ କ୍ବିଭ୍ରେ ଅବସ୍ଥିତ ଏକ ନ୍ୟୁଜ୍ ଏଜେନ୍ସିର ସୂତ୍ରକୁ ଉଦ୍ଧୃତ କରି ରଏଟର୍ସ ରିପୋର୍ଟ କରିଛି ଯେ, ୟୁକ୍ରେନ ଅଞ୍ଚଳରେ ୫୮୦୦ କିଲୋମିଟର ଦୂରରେ ଋଷ ଏହାର RS-26 ରୁବେଜ୍ କ୍ଷେପଣାସ୍ତ୍ର ନିକ୍ଷେପ କରିଛି । ତେବେ ଏହି କ୍ଷେପଣାସ୍ତ୍ରଟି କୌଣସି ଆଣବିକ ଅସ୍ତ୍ରରେ ସଜ୍ଜିତ ହୋଇନଥିଲା । ସେଣ୍ଟର ଫର ଷ୍ଟ୍ରାଟେଜିକ୍ ଆଣ୍ଡ ଇଣ୍ଟରନ୍ୟାସନାଲ ଷ୍ଟଡିଜ୍ (CSIS) ଅନୁଯାୟୀ, RS-26 ପ୍ରଥମେ ୨୦୧୨ ରେ ସଫଳତାର ସହ ପରୀକ୍ଷା କରାଯାଇଥିଲା । ତେବେ ବର୍ତ୍ତମାନ ଏହି ଆକ୍ରମଣରେ କେତେ ଲୋକ ଆହତ ହୋଇଛନ୍ତି ସେ ସମ୍ପର୍କରେ କୌଣସି ନିଶ୍ଚିତ ତଥ୍ୟ ନାହିଁ।
