ନୂଆଦିଲ୍ଳୀ: ବିଶିଷ୍ଟ ଅଭିନେତ୍ରୀ ଉମା ଦାସଗୁପ୍ତାଙ୍କ ପରଲୋକ  । ଭାରତୀୟ ସିନେମା ଇତିହାସର ଜଣେ କିମ୍ବଦନ୍ତୀ ଫିଲ୍ମ ନିର୍ମାତା ସତ୍ୟଜିତ ରାୟଙ୍କ ‘ପଥର ପାଞ୍ଚାଳି’ରେ ଦୁର୍ଗା ରୟ ଭୂମିକା ମାଧ୍ୟମରେ ଚର୍ଚ୍ଚାକୁ ଆସିଥିଲେ ଉମା ଦାସଗୁପ୍ତା । ୮୪ ବର୍ଷ ବୟସରେ ଉମା ଦାସଗୁପ୍ତା ଇହଲୀଳା ସମ୍ବରଣ କରିଛନ୍ତି । ଉମାଙ୍କ ମୃତ୍ୟୁ ଖବର ପ୍ରସାରିତ ହେବା ପରେ ସିନେ ଜଗତରେ ଶୋକର ଛାୟା ଖେଳିଯାଇଛି । ଦୀର୍ଘ ଦିନ ଧରି କର୍କଟ ସହ ଲଢ଼ୁଥିଲେ ଉମା ଦାସଗୁପ୍ତା । ସୋମବାର କୋଲକାତାର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । 

ପଥର ପାଞ୍ଚାଳିର ଦୁର୍ଗା ଆଉ ନାହାନ୍ତି 

୬୯ ବର୍ଷ ପୂର୍ବେ ଥିଏଟରରେ ରିଲିଜ୍‌ ହୋଇଥିବା ‘ପଥର ପାଞ୍ଚାଳି’ ଉମା ଦାସଗୁପ୍ତାଙ୍କୁ ରାତାରାତି ଅଜସ୍ର ଲୋକପ୍ରିୟତା ଦେଇଥିଲା । ଏଥିରେ ସେ ଦୁର୍ଗା ରୟ ଭୂମିକା ମାଧ୍ୟମରେ ଦର୍ଶକଙ୍କ ହୃଦୟରେ ଜମି ଯାଇଥିଲେ । ୧୯୫୫ରେ ମୁକ୍ତିଲାଭ କରିଥିବା ପଥର ପାଞ୍ଚାଳିର ନିର୍ଦ୍ଦେଶନା ଦେଇଥିଲେ ମହାନ ଫିଲ୍ମ ନିର୍ମାତା ଓ ନିର୍ଦ୍ଦେଶକ ସତ୍ୟଜିତ ରାୟ । ଏହି ଚଳିଚ୍ଚିତ୍ର ଜାତୀୟ ଓ ଅନ୍ତର୍ଜାତୀୟ ସ୍ତରରେ ବହୁ ପୁରସ୍କାର ପାଇଥିବା ବେଳେ ଏଥିରେ ଅଭିନୟ କରିଥିବା ପ୍ରତିଟି କଳାକାର ଏବେ ବି ଚର୍ଚ୍ଚାର ପରିସରକୁ ଆସିଥାନ୍ତି । 

ବଙ୍ଗଳା ସିନେମାର ଗର୍ବ 

ସତ୍ୟଜିତ ରାୟଙ୍କ ଭଳି ଉମା ଦାସଗୁପ୍ତାଙ୍କୁ ବେଙ୍ଗଲୀ ସିନେମା ଆକାଶର ଉଜ୍ବଳତମ ତାରା ବୋଲି କୁହାଯାଏ । ଅନେକ ଚଳଚ୍ଚିତ୍ରରେ ମନମୁଗ୍ଧକର ଅଭିନୟ କରି ସେ ଦର୍ଶକଙ୍କୁ ତାଜୁବ କରିଦେଇ ଥିଲେ । ଆଜି ସେ ଆମ ଗହଣରେ ନାହାନ୍ତି ସତ କିନ୍ତୁ ସିନେମା ପ୍ରତି ତାଙ୍କର ଅବଦାନ କେବେ ଭୁଲି ହେବ ନାହିଁ । ତେବେ ଅଭିନେତ୍ରୀ ଉମା ଦାସଗୁପ୍ତାଙ୍କ ଶେଷକୃତ୍ୟ ସଂପର୍କରେ କୌଣସି ସୂଚନା ମିଳିପାରି ନାହିଁ ।  

ପଥର ପାଞ୍ଚାଳି

ସତ୍ୟଜିତ ରାୟ ନିର୍ଦ୍ଦେଶିତ ଚଳଚ୍ଚିତ୍ର ପଥର ପାଞ୍ଚାଳି ୧୯୨୯ରେ ବିଭୁତିଭୂଷଣ ବନ୍ଦୋପାଧ୍ୟାୟଙ୍କ ରଚିତ ଗ୍ରନ୍ଥ ପଥର ପାଞ୍ଚାଳି ଉପରେ ପର୍ଯ୍ୟବେସିତ । ପଥର ପାଞ୍ଚାଳି ଜାତୀୟ ଏବଂ ଅନ୍ତର୍ଜାତୀୟ ପୁରସ୍କାର ଜିତି ଇତିହାସ ରଚିଥିଲା । ସତ୍ୟଜିତଙ୍କର ପ୍ରଥମ ଚଳଚ୍ଚିତ୍ର ପଥର ପାଞ୍ଚାଳି ୧୯୫୫ ମସିହାରେ ମୁକ୍ତିଲାଭ କରିଥିଲା । ଏହି ସମୁଦାୟ କଥାଚିତ୍ରଟି ୧୧ଟି ଆନ୍ତର୍ଜାତୀୟ ପୁରସ୍କାର ପାଇଥିଲା । ଏହି ପୁରସ୍କାରଗୁଡ଼ିକ ମଧ୍ୟରେ ୧୯୫୬ର କାନ୍ସ ଚଳଚ୍ଚିତ୍ର ପୁରସ୍କାର ଉତ୍ସବରେ ଶ୍ରେଷ୍ଠ ହ୍ୟୁମାନ ଡକୁମେଣ୍ଟ ପୁରସ୍କାର ପାଇଥିଲା ।