କେସିଙ୍ଗା,୩୦/୫: କଳାହାଣ୍ଡି ଜିଲ୍ଲାର କେସିଙ୍ଗା ଅଣ୍ଡର ପାସ୍ ରାସ୍ତା ଶୋଚନୀୟ । ସାମାନ୍ୟ ବର୍ଷା ହେଲେ ଜମା ହେଉଛି ଆଣ୍ଠୁଏ ଆଣ୍ଠୁଏ ପାଣି । ଫଳରେ ଯାତାୟାତରେ ସମସ୍ୟା ଭୋଗୁଛନ୍ତି ସ୍ଥାନୀୟ ଲୋକେ । ରକ୍ଷଣାବେକ୍ଷଣାର ଅଭାବରୁ ଏଭଳି ସମସ୍ୟା ଉପୁଜୁଥିବା ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା ।
ତେବେ କେସିଙ୍ଗା ଅଞ୍ଚଳବାସୀଙ୍କ ଦୀର୍ଘ ଦିନର ଦାବିକୁ ତତ୍କାଳୀନ ରାଜ୍ୟ ସରକାର ବିଚାର କରି ଏକ ଅଣ୍ଡର ପାସ୍ ନିର୍ମାଣ କରିବା ପାଇଁ ରେଳ ବିଭାଗକୁ ଅନୁଦାନ ଯୋଗାଇ ଦେଇଥିଲେ । ରେଳ ବିଭାଗ ପକ୍ଷରୁ ଅଣ୍ଡର ପାସ୍ ରାସ୍ତା ନିର୍ମାଣ ହେଲା । କେସିଙ୍ଗା ଅଞ୍ଚଳବାସୀଙ୍କ ପାଇଁ ଯାତାୟାତର ସୁବିଧା ମଧ୍ୟ ହେଲା । ହେଲେ ରାସ୍ତାର ରକ୍ଷଣାବେକ୍ଷଣ ପ୍ରତି ଧ୍ୟାନ ଦିଆଯାଉନଥିବାରୁ ଅଣ୍ଡର ପାସ୍ ରାସ୍ତା ଏବେ ଶୋଚନୀୟ ହୋଇପଡ଼ିଛି । ଅସରାଏ ବର୍ଷା ହେଲେ ଏହି ସ୍ଥାନରେ ଆଣ୍ଠୁଏ ଆଣ୍ଠୁଏ ପାଣି ଜମି ରହୁଛି । ଫଳରେ ସ୍ଥାନୀୟ ଲୋକେ ବହୁୂ ସମସ୍ୟାର ସମ୍ମୁଖୀନ ହେଉଛନ୍ତି । ଏହି ସମସ୍ୟାର ସମାଧାନ ପାଇଁ ବାରମ୍ବାର ଅଭିଯୋଗ ହେଉଛି, ମାତ୍ର ଫଳ ଶୂନ୍ୟ ।
ସେପଟେ ଅଣ୍ଡର ବ୍ରିଜ୍ ନିର୍ମାଣକୁ ଟେକ୍ନିକାଲ ଦୋଷ ଦର୍ଶାଇ ରେଳ ବିଭାଗ ୨୪ ଘଣ୍ଟା ଫାଟକ ପକାଇ ରଖିଛି । ଫଳରେ ଜାତୀୟ ରାଜପଥ- ୨୬ ଉପରେ ଚାଲୁଥିବା ଛୋଟ ବଡ଼ ଗାଡ଼ି ମୋଟର ଅଧିକାଂଶ ସମୟରେ ଅଣ୍ଡର ପାସ୍ ଦେଇ ଯିବା ଆସିବା କରୁଛନ୍ତି । ପ୍ରତିଦିନ ହଜାର ହଜାର ସଂଖ୍ୟାରେ ଯାନବାହାନ ଚାଲୁଥିବାରୁ ରାସ୍ତାରେ କଂକ୍ରିଟ୍ ଫାଟି ଆଁ କଲାଣି । ଅନ୍ୟପଟେ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଛୋଟ ଛୋଟ ଗାତକୁ ପୋତି ଦେଇ ନିଜ କର୍ତ୍ତବ୍ୟ ସାରିଦେଇଛି ରେଳ ବିଭାଗ । ଆଗକୁ ବର୍ଷା ଦିନ ଆସୁଥିବାରୁ ଶୀଘ୍ର ଅଣ୍ଡର ପାସ୍ ରାସ୍ତା ମରାମତି କରିବା ସହିତ ନିରନ୍ତର ନିରୀକ୍ଷଣ ପାଇଁ ସାଧାରଣରେ ଦାବି ହେଉଛି ।
