ନୂଆଦିଲ୍ଲୀ,୨୧।୮: ବସ୍ରେ ବି କରିବେ ବିମାନ ଭଳି ଆରାମ ଯାତ୍ରା। ଯେପରି ବିମାନରେ ଏୟାର ହୋଷ୍ଟେସ୍ ଅଛନ୍ତି, ସେହିପରି ବସ୍ରେ ମଧ୍ୟ ବସ୍ ହୋଷ୍ଟେସ୍ ରହିବେ। ଏନେଇ କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତିନ ଗଡ଼କରୀ ସୂଚନା ଦେଇଛନ୍ତି। ବିଜନେସ୍ ଷ୍ଟାଣ୍ଡାର୍ଡ ଇନଫ୍ରାଷ୍ଟ୍ରକଚର ସମିଟ୍ ଅବସରେ ଏଭଳି କହିଛନ୍ତି ଗଡକାରୀ। ସେ କହିଛନ୍ତି, ଭାରତରେ ସାର୍ବଜନୀନ ପରିବହନ ବ୍ୟବସ୍ଥାକୁ ଆହୁରି ଉନ୍ନତ କରିବା ପାଇଁ କାମ ଚାଲିଛି। ସରକାର ଅତ୍ୟାଧୁନିକ ଇଲେକ୍ଟ୍ରିକ୍ ବସ୍ ଚଲାଇବା ଯୋଜନାରେ କାମ କରୁଛନ୍ତି, ଯେଉଁଥିରେ ଯାତ୍ରୀମାନେ କଫି, ଚା, ଫଳ ଏବଂ ଥଣ୍ଡା ପାନୀୟର ସୁବିଧା ପାଇବେ। ବର୍ତ୍ତମାନ ଟାଟା ସହିତ ମିଳିତ ଭାବରେ ଏହି ପ୍ରକଳ୍ପ ଉପରେ କାମ ଚାଲିଛି।
ଏହି ବସ୍ରେ ବିମାନ ଭଳି ସୁବିଧା ରହିବ। ଡିଜେଲ୍ ବସ୍ ତୁଳନାରେ ଏହାର ଭଡ଼ା ପ୍ରାୟ ୩୦ ପ୍ରତିଶତ ହେବ ବୋଲି ଆଶା କରାଯାଉଛି। ଗୋଟିଏ ପଟେ, ଏହା ସାର୍ବଜନୀନ ପରିବହନ ବସ୍କୁ ଅତ୍ୟାଧୁନିକ ଏବଂ ଆରାମଦାୟକ କରିବା ପାଇଁ ଏକ ପ୍ରୟାସ, ଯେତେବେଳେ ଅନ୍ୟ ପଟେ ଏହାର ଉଦ୍ଦେଶ୍ୟ ଯାତ୍ରୀମାନଙ୍କ ଯାତ୍ରାକୁ ସୁଖଦ ଏବଂ ସ୍ମରଣୀୟ କରିବା। ଆର୍ଟିଫିସିଆଲ ଇଣ୍ଟେଲିଜେନ୍ସ ବ୍ୟବହାର ଉପରେ ଗୁରୁତ୍ୱାରୋପ କରି ଗଡକରୀ କହିଛନ୍ତି , ଟନେଲ, ବ୍ରିଜ୍, ଏବଂ ରାସ୍ତା ନିର୍ମାଣ ପାଇଁ ମଧ୍ୟ AI ବ୍ୟବହାର ଉପରେ ବିଚାର କରୁଛନ୍ତି। କେନ୍ଦ୍ରମନ୍ତ୍ରୀ ଏହା ମଧ୍ୟ କହିଛନ୍ତି ଯେ ପାହାଡିଆ ଅଞ୍ଚଳରେ, ବିଶେଷକରି ହିମାଚଳ ଏବଂ ଉତ୍ତରାଖଣ୍ଡରେ ଉପୁଜୁଥିବା ଚ୍ୟାଲେଞ୍ଜର ମୁକାବିଲା ପାଇଁ AI ବ୍ୟବହାର କରାଯିବ।
ଉଲ୍ଲେଖନୀୟ ଯେ ଦେଶ ଏବଂ ବିଶ୍ୱରେ AIର ବ୍ୟବହାର ଦ୍ରୁତ ଗତିରେ ବୃଦ୍ଧି ପାଉଛି। ଏପରି ପରିସ୍ଥିତିରେ,ନୀତିନ ଗଡକରୀ ଆଶା କରିଛନ୍ତି ଯେ ଏହାର ବ୍ୟବହାର ସଡକ ଭିତ୍ତିଭୂମିରେ ଏକ ମୌଳିକ ପରିବର୍ତ୍ତନ ଆଣିପାରିବ।
