ନୂଆଦିଲ୍ଲୀ : ଆମେରିକାରେ ନାଗରିକତା ହାସଲ କରିବା ଏବେ ଖୁବ୍ ମହଙ୍ଗା ହୋଇପାରେ। ଟ୍ରମ୍ପ ପ୍ରଶାସନ ଆମେରିକୀୟ ନାଗରିକତାର ଆବେଦନ ଶୁଳ୍କରେ ବୃଦ୍ଧି ନେଇ ପ୍ରସ୍ତାବ ରଖିଛି। ଶୁଳ୍କରେ ପ୍ରାୟ ୭୫ ପ୍ରତିଶତର ବୃଦ୍ଧି ସହ ନିମ୍ନ ଆୟକାରୀ ଆବେଦକଙ୍କୁ ଦିଆଯାଉ ଥିବା ଦେୟ ଛାଡ଼ ଓ ରିହାତିକୁ ସଂପୂର୍ଣ୍ଣ ରୂପେ ବନ୍ଦ କରିବାର ପ୍ରସ୍ତୁତିରେ ଅଛି। କୁହାଯାଉଛି ଯେ, ଆମେରିକୀୟ ଗୃହ ସୁରକ୍ଷା ବିଭାଗ (ଡିଏଚଏସ)ର ଏହି ପଦକ୍ଷେପରେ ବିଶେଷ ଭାବେ ଭାରତୀୟ ବଂଶୋଦ୍ଭବଙ୍କ ଗ୍ରୀନ କାର୍ଡଧାରୀଙ୍କ ଉପରେ ପ୍ରଭାବ ପଡ଼ିବାର ଆଶଙ୍କା ରହିଛି।
ଆମେରିକାର ନାଗରିକତା ଓ ପ୍ରବାସନ ସେବା (ୟୁଏସସିଆଇଏସ) ଦ୍ୱାରା ଜାରି ପ୍ରସ୍ତାବିତ ନିୟମାନୁସାରେ , ଫର୍ମ ଏନ୍-୪୦୦ (ନାଗରିକତା ଆବେଦନ)ର ଫି ପେପର ଆପ୍ଲିକେସନ ପାଇଁ ୭୬୦ ଡଲାରରୁ ବୃଦ୍ଧି ପାଇ ୧୩୩୦ ଡଲାର ଓ ଅନଲାଇନ ଆବେଦନ ପାଇଁ ୭୧୦ ଡଲାରରୁ ବୃଦ୍ଧି ପାଇଁ ୧୨୮୦ ଡଲାର ହୋଇଯିବ। ଏହାସହ ନାଗରିକତା ପ୍ରତ୍ୟାଖ୍ୟାନର ସମୀକ୍ଷା ପାଇଁ ଫାଇଲ୍ କରାଯାଉ ଥିବା ଫର୍ମ ଏନ୍-୩୩୬ର ଫି ମଧ୍ୟ ୮୩୦ ଡଲାରରୁ ବୃଦ୍ଧି ପାଇଁ ୧୪୭୫ ଡଲାର କରିବାକୁ ପ୍ରସ୍ତାବ ରହିଛି , ଯାହା ପାଖାପାଖି ୭୮ ପ୍ରତିଶତର ବୃଦ୍ଧି ହୋଇଛି।
ପ୍ରସ୍ତାବ ଅନୁସାରେ, ସେହି ଆବେଦକଙ୍କ ପାଇଁ ଶୁଳ୍କ ଛାଡ଼ର ସୁବିଧା ବନ୍ଦ କରି ଦିଆଯିବ, ଯାହାଙ୍କର ପାରିବାରିକ ଆୟ ସଂଘୀୟ ଗରୀବୀ ରେଖାର ୪୦୦ ପ୍ରତିଶତ କିମ୍ୱା ଏହା ଠାରୁ କମ୍। ବର୍ତ୍ତମାନ ସମୟରେ ଉପଲବ୍ଧ କମ୍ ଶୁଳ୍କ ବିକଳ୍ପ ମଧ୍ୟ ଶେଷ ହୋଇ ଯିବ। ହେଲେ , ଆମେରିକାର ସେନାର ସଦସ୍ୟଙ୍କୁ ଏହି ଛାଡ଼ ଏବେ ବି ମିଳୁଛି। ଆମେରିକୀୟ ଅଧିକାରୀମାନେ ପ୍ରସ୍ତାବରେ ସ୍ପଷ୍ଟ କହିଛନ୍ତି ଯେ, ଏବେ ଡିଏଚଏସ ଅନୁସାରେ ଅନ୍ୟ ପ୍ରବାସନ ସେବାର ମୂଲ୍ୟ ଉପରେ ନାଗରିକତା ଆବେଦନ ଉପରେ କମ ଶୁଳ୍କ ରଖିବା ଉଚିତ୍ ନୁହେଁ।
ଆମେରିକୀୟ ସୁରକ୍ଷା ବିଭାଗ ଦ୍ୱାରା ପ୍ରସ୍ତାବିତ ନୂଆ ନିୟମ ଏବେ ଲାଗୁ ହୋଇ ନାହିଁ। ବିଭାଗ ଏହାକୁ ଔପଚାରିକ ଭାବେ ପ୍ରସ୍ତାବିତ ନିୟମ ଭାବେ ପ୍ରକାଶିତ କରିଛି। ଏବେ ଏହି ପ୍ରସ୍ତାବ ଉପରେ ୬୦ ଦିନ ଯାଏ ସାର୍ବଜନିକ ଟିପ୍ପଣୀ ଗୁଡ଼ିକର ସମୟ ଦିଆଯିବ। ଏହି ସମୟରେ ସାଧାରଣ ନାଗରିକ , ସଙ୍ଗଠନ ନିଜର ମତ , ପରାମର୍ଶ କିମ୍ୱା ଅଭିଯୋଗ ଦାଖଲ କରି ପାରିବେ। ଅନ୍ତିମ ନିୟମ ସେତେବେଳେ ଲାଗୁ ହେବ , ଯେତେବେଳେ ସବୁ ପ୍ରାପ୍ତ ଟିପ୍ପଣୀ ଗୁଡ଼ିକ ଉପରେ ବିଚାର ବିମର୍ଶ ପରେ ଏହାକୁ ଅନ୍ତିମ ରୂପ ଦିଆଯିବ। ପ୍ରସ୍ତାବିତ ନିୟମ ଲାଗୁ ହେବ ଯାଏ ବର୍ତ୍ତମାନର ବ୍ୟବସ୍ଥା ଜାରି ରହିବ। ଆୟ, ଆର୍ଥିକ ସମସ୍ୟା କିମ୍ୱା ସାର୍ବଜନିକ ସହାୟତା ଉପରେ ଆଧାରିତ ଶୁଳ୍କ ଛାଡ଼ ଓ ୩୮୦ ଡଲାରର କମ୍ ଦେୟର ସୁବିଧା ବର୍ତ୍ତମାନ ପୂର୍ବପରି ଜାରି ରହିବ।
ଭାରତ ଆମେରିକାରେ ସ୍ଥାୟୀ ନିବାସ (ଗ୍ରୀନ କାର୍ଡ) ପ୍ରାପ୍ତକାରୀଙ୍କ ମଧ୍ୟରେ ସବୁଠୁ ବଡ଼ ଗ୍ରୁପରେ ଅନ୍ତର୍ଭୁକ୍ତ ଅଛି। ବିଶେଷକରି ଏଚ-୧ ବି ଭିସା ମାଧ୍ୟମରେ ଆସୁଥିବା ପେଶାଦାର , ମଧ୍ୟମ ଆୟକାରୀ ପରିବାର ଏବଂ ଅବସରପ୍ରାପ୍ତ ବ୍ୟକ୍ତି ଏହି ପ୍ରସ୍ତାବରେ ସବୁଠୁ ଅଧିକ ପ୍ରଭାବିତ ହୋଇ ପାରନ୍ତି। ଯେଉଁ ଲୋକ ବର୍ତ୍ତମାନରେ ଶୁଳ୍କ ଛାଡ଼ କିମ୍ୱା ନିମ୍ନ ଦେୟର ଲାଭ ନେଉଥିଲେ , ତାଙ୍କୁ ଏବେ ପୂର୍ଣ୍ଣ ଶୁଳ୍କ ଭରିବାକୁ ପଡ଼ିପାରେ, ଯେଉଁଥିରେ ନାଗରିକତା ପ୍ରକ୍ରିୟା ମହଙ୍ଗା ହୋଇଯିବ।
ଆହୁରି ମଧ୍ୟ ପଢନ୍ତୁ : UPSC Success Story : ପର ଦୁଆରେ କାମ କରୁଥିଲେ ମାଆ , ୨୧ ବର୍ଷରେ IPS ଓ ୨୨ ବର୍ଷ ବୟସରେ IAS ହେଲେ ଦିବ୍ୟା
