ଭୁବନେଶ୍ୱର ୨୦/୦୬: ଦେଶର ଦ୍ରୁତତମ ଧାବକ ଅନିମେଶ କୁଜୁର ନିଜ ରାଜ୍ୟ ଛତିଶଗଡ଼ ପରିବର୍ତ୍ତେ ଓଡ଼ିଶା ଦଳରୁ ଜାତୀୟ ପ୍ରତିଯୋଗିତାରେ ପ୍ରତିନିଧିତ୍ୱ କରି ଆସୁଛନ୍ତି, ଏହାକୁ ନେଇ ଉଠିଛି ବଡ଼ ପ୍ରଶ୍ନ । ସେ କେଉଁ ଆଧାରରେ ଓଡ଼ିଶାରୁ ପ୍ରତିନିଧିତ୍ୱ କରି ଆସୁଛନ୍ତି ତାହାକୁ ନେଇ ଭାରତୀୟ ଆଥଲେଟିକ୍ସ ସଂଘକୁ (ଏଏଫ୍ଆଇ) ପତ୍ର ଲେଖି ଏହାର ସମୀକ୍ଷା କରିବା ପାଇଁ ଅନୁରୋଧ ଜଣାଇଛନ୍ତି ଦେଶର ପୂର୍ବତନ ଦ୍ରୁତତମ ଧାବକ ଅମିୟ କୁମାର ମଲ୍ଲିକ ।
ଯେ କୌଣସି ଖେଳାଳି ନିଜ ରାଜ୍ୟ ଛାଡ଼ି ଅନ୍ୟ ରାଜ୍ୟରୁ ଖେଳିବାକୁ ହେଲେ ଏନ୍ଓସି ବା ନୋ ଅବଜେକସନ ସାର୍ଟିଫିକେଟ୍ ଦେବାକୁ ପଡ଼େ । ଏହି ଅନୁମତି ସେହି ଖେଳାଳି ନିଜ ରାଜ୍ୟ ସଂଘ ଠାରୁ ଆଣିଥାନ୍ତି । ଅନିମେଶଙ୍କୁ ୨୦୨୩ ସେପ୍ଟେମ୍ବର ମାସରେ ଛତିଶଗଡ଼ ଆଥଲେଟିକ ସଂଘ ବର୍ଷକ ପାଇଁ ଏନ୍ଓସି ଦେଇଥିଲା । ୨୦୨୪ ସେପ୍ଟେମ୍ବର ମାସରୁ ଏହି ଅବଧି ପୂରଣ ହୋଇ ସାରିଛି । ତଥାପି ଅନିମେଶ ନିଜ ରାଜ୍ୟ ପରିବର୍ତ୍ତେ ଓଡ଼ ିଶାରୁ ପ୍ରତିନିଧିତ୍ୱ କରି ଆସୁଛନ୍ତି ।
ଓଡ଼ିଶା ଆଥଲେଟିକ୍ସର ଗୌରବ ଅମିୟଙ୍କ ନାମରେ ୧୦୦ ମିଟରରେ ଜାତୀୟ ରେକର୍ଡ ରହିଥିଲା । ଏଏଫ୍ଆଇକୁ ସେ ପତ୍ରରେ ଲେଖିଛନ୍ତି ଯେ, ‘ଅନିମେଶ ଓଡ଼ିଶାରୁ ଜାତୀୟ ପ୍ରତିଯୋଗିତାରେ ପ୍ରତିନିଧିତ୍ୱ କରୁଛନ୍ତି । କିନ୍ତୁ ଛତିଶଗଡ଼ ସଂଘ ତାଙ୍କୁ ଦେଇଥିବା ଏକ ବର୍ଷର ଏନ୍ଓସିର ଅବଧି ପୂରଣ ହୋଇ ସାରିଛି । ଯାହାର ପ୍ରମାଣ ମୁଁ ନିମ୍ନରେ ସଂଲଗ୍ନ କରିଛି । ୨୦୨୫ରେ ଏଏଫ୍ଆଇ ପକ୍ଷରୁ ଖେଳାଳିଟିଏ ନିଜ ରାଜ୍ୟ ଛାଡ଼ି ଅନ୍ୟ ରାଜ୍ୟରୁ କେମିତି ଖେଳିବେ (ଟ୍ରାନ୍ସଫର) ତାହାର ଗାଇଡ୍ ଲାଇନ ଜାରି କରାଯାଇଥିଲା । ଏହି ଆଧାରରେ ଏଏଫ୍ଆଇ ଅନିମେଶଙ୍କ ଟ୍ରାନ୍ସଫର ଟାଇଡଲାଇନର ସମୀକ୍ଷା କରି ଏ ବିଷୟରେ ଉପଯୁକ୍ତ ନିଷ୍ପତ୍ତି ଗ୍ରହଣ କରିବା ନେଇ ମୁଁ ଅନୁରୋଧ ଜଣାଉଛି ।
ଅଧିକ ପଢ଼ନ୍ତୁ :- FIFA World Cup 2026 : କଙ୍ଗୋର ଷ୍ଟାଚ୍ୟୁ ମ୍ୟାନ୍, ୯୦ ମିନିଟ୍ ଧରି ପାଲଟି ଯାଉଛନ୍ତି ପଥର
୨୦୨୪ ସେପ୍ଟେମ୍ବର ମାସ ୧୯ ତାରିଖରୁ ଅନିମେଶ ବିନା କୌଣସି ଏନ୍ଓସିରେ ଓଡ଼ିଶା ଦଳରୁ ପ୍ରତିନିଧିତ୍ୱ କରି ଆସୁଥିବା ଅମିୟ ଦର୍ଶାଇଛନ୍ତି । ସେ ଏଏଫ୍ଆଇକୁ ଦେଇଥିବା ପତ୍ରର ଗୋଟିଏ ଗୋଟିଏ ନକଲ ଓଡ଼ିଶା କ୍ରୀଡ଼ା ବିଭାଗର, ଓଡ଼ିଶା ଆଥଲେଟିକ୍ସ ସଂଘ ଓ ଛତିଶଗଡ଼ ସଂଘକୁ ପ୍ରଦାନ କରିଛନ୍ତି । କଥା ହେଉଛି, ଯଦି ଅମିୟଙ୍କ ଦାବି ସତ ହୋଇଥାଏ, ତେବେ ଓଡ଼ିଶା ଆଥଲେଟିକ୍ସ ସଂଘ ଏଏଫ୍ଆଇର ନିୟମ ସଂପର୍କରେ ଅବଗତ ଥାଇବି କେମିତି ବିନା ଏନ୍ଓସିରେ ଅନିମେଶଙ୍କୁ ଖେଳିବା ପାଇଁ ଅନୁମତି ଦେଉଛି ତାହା ଏବେ ପ୍ରଶ୍ନ ବାଚୀ ସୃଷ୍ଟି କରିଛି ।
ଅନିମେଶ କଳିଙ୍ଗ ଷ୍ଟାଡିୟମରେ ଥିବା ଓଡ଼ିଶା ରିଲାଏନ୍ସ ଫାଉଣ୍ଡେସନ୍ ଆଥଲେଟିକ୍ସ ଉଚ୍ଚ ପ୍ରଦର୍ଶନ କେନ୍ଦ୍ରରେ ପ୍ରଶିକ୍ଷଣ ନେଉଛନ୍ତି । ରାଜ୍ୟ ସରକାର ତାଙ୍କୁ ବିଭିନ୍ନ ପ୍ରତିଯୋଗିତାରେ ପଦକ ଜିତିଲେ ଆଥି ର୍କ ପ୍ରୋତ୍ସାହନ ରାଶି ପ୍ରଦାନ କରି ଆସୁଛନ୍ତି । ଗତ ବର୍ଷ ୨୦୨୪ ବର୍ଷ ପାଇଁ ତାଙ୍କୁ ବର୍ଷର ଶ୍ରେଷ୍ଠ କ୍ରୀଡ଼ାବିତ ଭାବେ ବିଜୁ ପଟ୍ଟନାୟକ କ୍ରୀଡ଼ା ପୁରସ୍କାର ପ୍ରଦାନ କରାଯାଇଥିଲା ।
