କଟକ/କଣ୍ଟାପଡ଼ା, ୧୯/୦୬: ଜିଆର୍ପି କନଷ୍ଟେବଳ ସୌମ୍ୟ ରଞ୍ଜନ ସ୍ୱାଇଁ ଭିଡ଼ହତ୍ୟା ଘଟଣାରେ ବୁଧବାର ଆଇପିଏସ୍ ଦୟାଲ୍ ଗଙ୍ଗୱାର ସସ୍ପେଣ୍ଡ୍ ହୋଇଛନ୍ତି । ଏହି ପରିପ୍ରେକ୍ଷୀରେ ମୃତ ସୌମ୍ୟଙ୍କ ବାପା ଦୁଃଶାସନ ସ୍ୱାଇଁ ଓ ମା’ କବିତା ସ୍ୱାଇଁ ମୁହଁ ଖୋଲି ଅଭିଯୁକ୍ତଙ୍କ ବିରୋଧରେ ଉପଯୁକ୍ତ ଦଣ୍ଡବିଧାନ ଦାବି କରିଛନ୍ତି । ବାପା ଦୁଃଶାସନ କହିଛନ୍ତି, ସସ୍ପେଣ୍ଡ୍ କରି କ’ଣ ବଡ଼ କଥା କରିଦେଲେ? ୬ ମାସ ପରେ ପୁଣି ଚାକିରିରେ ଯୋଗ ଦେବେ । ଏବେ ଅଧା ଦରମା ପାଇବେ । ଲାଭ କ’ଣ ହେଲା? ଗଙ୍ଗୱାରଙ୍କୁ ସସ୍ପେଣ୍ଡ୍ ନୁହେଁ ବରଂ ଚାକିରିରୁ ବହିଷ୍କାର କରାଯାଉ । ଜେଲ୍ ଦଣ୍ଡ ଦିଆଯାଉ । ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଯେ ସେ ଆମ ପୁଅର ହତ୍ୟା ଘଟଣାକୁ ଏତେ ଗୁରୁତ୍ୱର ସହ ନେଇଛନ୍ତି । କିନ୍ତୁ ଆମେ ପୂର୍ବରୁ ବି କହିଥିଲୁ, ଏବେ ବି କହୁଛୁ କି କ୍ରାଇମବ୍ରାଞ୍ଚ୍ ତଦନ୍ତରେ ଆମେ ସନ୍ତୁଷ୍ଟ ନୁହେଁ । ଆମେ ତ’ଘଟଣା ପରଠାରୁ ସିବିଆଇ ତଦନ୍ତ ଦାବି କରିଆସୁଛୁ । ପୁଅର ମୃତ୍ୟୁ ପଛରେ ବହୁତ ବଡ଼ ଷଡଯନ୍ତ୍ର ରହିଛି । ମୁଖ୍ୟମନ୍ତ୍ରୀଙ୍କୁ ଅନୁରୋଧ ସିବିଆଇ ତଦନ୍ତରୁ ଆମକୁ ସହଯୋଗ କରନ୍ତୁ ବୋଲି ବାପା ଶ୍ରୀ ସ୍ୱାଇଁ ଦାବି କରିଛନ୍ତି ।
ଅଧିକ ପଢ଼ନ୍ତୁ :- ବରିଷ୍ଠ IPS ଦୟାଲ ଗଙ୍ଗୱାରଙ୍କୁ ନିଲମ୍ବନ ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ
ସୌମ୍ୟ ଜୀବିତ ଥିବାବେଳେ ଶ୍ରୀ ଗଙ୍ଗୱାରଙ୍କ ଘରେ ବୋଲହାକ କରୁଥିବାର ଅଭିଯୋଗ ଉଠିଥିଲା । ଏମିତିକି ଆଇପିଏସ୍ ଜଣକ ତାଙ୍କ ପୁଅକୁ ନିର୍ଯାତନା ଦେଉଥିବା ନେଇ ସୌମ୍ୟଙ୍କ ପରିବାର ଲୋକ ଦୋଷାରୋପ କରିଥିଲେ । ଏହି ମାମଲାରେ ବିବାଦରେ ଛନ୍ଦି ହେବା ପରେ ଶ୍ରୀ ଗଙ୍ଗୱାରଙ୍କ ଅଡୁଆ ବଢ଼ିଥିଲା । ଗତମାସ ୨୫ ତାରିଖରେ ପ୍ରଥମେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ସ୍ୱରୂପ ତାଙ୍କୁ ଗୃହ ବିଭାଗର ଅଫିସର ଅନ୍ ସ୍ପେଶାଲ ଡ୍ୟୁଟି ଭାବେ ବଦଳି କରାଯାଇଥିଲା ।
ସୌମ୍ୟଙ୍କୁ ନିର୍ଯାତନା ନେଇ ଜାତୀୟ ମାନବ ଅଧିକାର ଆୟୋଗ (ଏନ୍ଏଚ୍ଆର୍ସି)ରେ ପିଟିସନ ଦାଖଲ ହେଲା । ଆୟୋଗଙ୍କ ନିର୍ଦ୍ଦେଶ ମୁତାବକ, ୨ଜଣିଆ ସ୍ୱତନ୍ତ୍ର ଟିମ୍ ଭୁବନେଶ୍ୱର ଆସି ୫ ଦିନ ଧରି ମାମଲାର ତଦନ୍ତ କରିଥିଲା । ସୌମ୍ୟଙ୍କୁ ନିର୍ଯାତନା ଅଭିଯୋଗ ବାବଦକୁ ରେଳବାଇ ଏସ୍ପିଙ୍କ କାର୍ଯ୍ୟାଳୟରେ ମଧ୍ୟ ତଦନ୍ତ କରିଥିଲା । ଏହାପରେ ଏଡିଜି ଅରୁଣ ବୋଥ୍ରା ଏହି ଅଭିଯୋଗର ତଦନ୍ତ କରି ପୁଲିସ ମହାନିର୍ଦ୍ଦେଶକ ୱାଇ ବି ଖୁରାନିଆଙ୍କୁ ରିପୋର୍ଟ ଦେଇଥିଲେ ।
ସୌମ୍ୟଙ୍କ ମା’ କବିତାଙ୍କ କହିବା ମୁତାବକ, ମୁଁ ଆଦୌ ଖୁସି ନାହିଁ । ତାଙ୍କୁ ଚାକିରିରୁ ବହିଷ୍କାର କରାଯାଉ । ଏଥିସହ ହତ୍ୟାର ସିବିଆଇ ତଦନ୍ତ କରାଯାଉ । ଏକ ସୁଚିନ୍ତିତ ଷଡ଼ଯନ୍ତ୍ର କରି ବୀଭତ୍ସ ଭାବେ ମୋ ପୁଅକୁ ହତ୍ୟା କରାଗଲା । ଯେଉଁମାନେ ତାକୁ ପିଟିପିଟି ମାରିଦେଲେ, ଏମିତିକି ଯେଉଁମାନେ ଏସବୁ ଘୃଣ୍ୟ ଦୃଶ୍ୟକୁ ଚୁପ୍ଚାପ୍ ଦେଖୁଥିଲେ, ବିରୋଧ କରୁନଥିଲେ ସମସ୍ତଙ୍କୁ ଫାଶୀ ଦଣ୍ଡ ଦିଆଯାଉ ।
ସୂଚନାଯୋଗ୍ୟ, ଗତ ୭ ତାରିଖରେ ଅଡ଼ଶପୁରରେ ଥିବା ସୌମ୍ୟଙ୍କର ଏକ ଜିମ୍କୁ ମଧ୍ୟ କ୍ରାଇମବ୍ରାଞ୍ଚ ଟିମ୍ ଯାଇଥିଲା । ଡିଏସ୍ପି ନରେନ୍ଦ୍ର ବେହେରାଙ୍କ ନେତୃତ୍ୱରେ ଏହି ଟିମ୍ ଜିମ୍ର କର୍ମକର୍ତ୍ତାଙ୍କ ସହିତ କଥା ହୋଇଥିଲେ । ସୌମ୍ୟଙ୍କ ବିଷୟରେ ବିଭିନ୍ନ କଥା ପଚାରି ବୁଝିଥିଲେ । ପରେ ଜିମ୍ର ଅଫିସିଆଲ୍ କାଗଜପତ୍ର ମଧ୍ୟ ଯାଞ୍ଚ୍ କରିଥିଲେ । ଉକ୍ତ କାଗଜପତ୍ରର କିଛି କପି ମଧ୍ୟ ଏହି ଟିମ୍ ନେଇଥିଲା । ଏହା ସହିତ ସିସିଟିଭିକୁ ମଧ୍ୟ ଯାଞ୍ଚ୍ କରାଯାଇଥିଲା । ମାମଲାରେ କ୍ରାଇମବ୍ରାଞ୍ଚ ଟିମ୍ ସୌମ୍ୟଙ୍କ ମାଆଙ୍କୁ ଭେଟି ପଚରାଉଚୁରା କରିଥିଲା । ଏହି ସମୟରେ କ୍ରାଇମବ୍ରାଞ୍ଚ ଟିମ୍କୁ ଏକ ଡାଏରୀ ଦେଇଥିଲେ ସୌମ୍ୟଙ୍କ ମାଆ କବିତା ସ୍ୱାଇଁ । ଉକ୍ତ ଡାଏରୀରେ ଏକାଧିକ ବିଷୟ ସୌମ୍ୟ ଲେଖୁଥିଲେ । ଏଥିସହିତ ସୌମ୍ୟଙ୍କର ଆଉ କିଛି ଜିନିଷ ମଧ୍ୟ ତଦନ୍ତକାରୀ ଟିମ୍କୁ ସୌମ୍ୟଙ୍କ ମାଆ ଦେଇଥିଲେ ।
