ନୂଆଦିଲ୍ଲୀ,୦୪/୦୩: ହ୍ୱାଇଟ୍ ହାଉସରେ ହୋଇଥିବା ହାଇଡ୍ରାମାକୁ ନେଇ ଲାଗି ରହିଛି ଚର୍ଚ୍ଚା । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କିଙ୍କ ମଧ୍ୟରେ ଯୁକ୍ତିତର୍କ  ଘଟଣା ସାରା ବିଶ୍ବରେ ଚହଳ ସୃଷ୍ଟି କରିଛି । ଏହାରି ମଧ୍ୟରେ ଆମେରିକା ୟୁକ୍ରେନକୁ ସୈନ୍ୟ ସହାୟତା ସମ୍ପୂର୍ଣ୍ଣ ଭାବେ ବନ୍ଦ କରିବାକୁ ନିଷ୍ପତି ନେଇଛି। 

ହ୍ୱାଇଟ୍ ହାଉସ୍ ଅଧିକାରୀଙ୍କ ଅନୁଯାୟୀ, ଟ୍ରମ୍ପଙ୍କ ଉଦ୍ଦେଶ୍ୟ ହେଉଛି ଗତ ତିନି ବର୍ଷ ଧରି ଋଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ ଯଥାଶୀଘ୍ର ବନ୍ଦ କରିବା। ସେଥିପାଇଁ ସେ ଜେଲେନସ୍କି ମଧ୍ୟ ଏ ଦିଗରେ ପଦକ୍ଷେପ ନେବାର ଆଶା କରୁଛନ୍ତି।  ପୂର୍ବରୁ ଡୋନାଲ୍ଡ ଟ୍ରମ୍ପ ଆମେରିକାର ରାଷ୍ଟ୍ରପତି ଥିବା ସମୟରେ ସେ  ୟୁକ୍ରେନକୁ ସୈନ୍ୟ ସହାୟତା ବନ୍ଦ କରିଦେଇଥିଲେ ଏବଂ ତତ୍କାଳୀନ ରାଷ୍ଟ୍ରପତି ପ୍ରାର୍ଥୀ ଜୋ ବିଡେନଙ୍କ ବିରୋଧରେ ତଦନ୍ତ ଆରମ୍ଭ କରିବାକୁ ନିର୍ଦ୍ଦେଶ ଦେଇଥିଲେ। ଏହି କାରଣରୁ ଟ୍ରମ୍ପଙ୍କ ବିରୁଦ୍ଧରେ ମହାଭିଯୋଗ ମଧ୍ୟ ଆରମ୍ଭ ହୋଇଥିଲା। 

୨୦୨୪ ରାଷ୍ଟ୍ରପତି ନିର୍ବାଚନ ସମୟରେ ମଧ୍ୟ ଟ୍ରମ୍ପ ପ୍ରତିଶ୍ରୁତି ଦେଇଥିଲେ ଯେ ଯଦି ସେ କ୍ଷମତାକୁ ଆସନ୍ତି, ତେବେ  ଖୁବଶୀଘ୍ର ଋଷ ଏବଂ ୟୁକ୍ରେନ ମଧ୍ୟରେ ଚାଲିଥିବା ବିବାଦର ଅନ୍ତ କରିବେ। ନିର୍ବାଚନ ଜିତିବା ପରେ ଏବେ ତାଙ୍କର ସ୍ପଷ୍ଟ ମତ ହେଉଛି ଯେ,ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ଯୁଦ୍ଧବିରତି ଚାହାଁନ୍ତି ଏବଂ ଶାନ୍ତି ସପକ୍ଷରେ ଅଛନ୍ତି । ଯେତେବେଳେ ୟୁକ୍ରେନ ଏହି ଦିଗରେ କୌଣସି ପଦକ୍ଷେପ ନେବାକୁ ପ୍ରସ୍ତୁତ ନୁହେଁ । ସୋମବାର ଦିନ ଏକ ବିବୃତ୍ତିରେ ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଶେଷ ହେବାର ନିକଟତର ମଧ୍ୟ ନୁହେଁ। ସେ ଏହା ମଧ୍ୟ ଅଭିଯୋଗ କରିଛନ୍ତି ଯେ ଜେଲେନସ୍କି ଆମେରିକାର ସାହାଯ୍ୟ ପାଇଁ କୃତଜ୍ଞତା ପ୍ରକାଶ କରିବାରେ ବିଫଳ ହୋଇଛନ୍ତି। ରିପୋର୍ଟ ଅନୁସାରେ, ଦୁଇ ନେତାଙ୍କ ମଧ୍ୟରେ ପ୍ରକୃତ ବିବାଦ ଏକ ଗୁରୁତ୍ୱପୂର୍ଣ୍ଣ ଖଣିଜ ଚୁକ୍ତିକୁ ନେଇ ଥିଲା। ଆମେରିକା ଚାହୁଁଥିଲା ଯେ ୟୁକ୍ରେନ କୌଣସି ସର୍ତ୍ତ ବିନା ଏହି ଚୁକ୍ତିନାମାରେ ସ୍ୱାକ୍ଷର କରୁ, କିନ୍ତୁ ଜେଲେନସ୍କି ବଦଳରେ ସୁରକ୍ଷା ଗ୍ୟାରେଣ୍ଟି ଦାବି କରୁଥିଲେ।

ଏହା ମଧ୍ୟ ପଢନ୍ତୁ- ୟୁକ୍ରେନର ନାଗରିକତା ଆପଣାଇ ନିଅ, ଏହାପରେ କଥା ହୁଅ ; ଟ୍ରମ୍ପଙ୍କ ସାଂସଦକୁ କଡ଼ା ଶବ୍ଦରେ କହିଲେ ଜେଲେନସ୍କି

ଯେତେବେଳେ ଏହି ପ୍ରସଙ୍ଗରେ ଦୁଇ ନେତା ହ୍ୱାଇଟ୍ ହାଉସରେ ସାକ୍ଷାତ କରିଥିଲେ, ସେହି ସମୟରେ  ବି ଟ୍ରମ୍ପ ଜେଲେନସ୍କିଙ୍କୁ "ତୃତୀୟ ବିଶ୍ୱଯୁଦ୍ଧ ପ୍ରବର୍ତ୍ତକ" ଏବଂ "ଜଣେ ମୂର୍ଖ ରାଷ୍ଟ୍ରପତି" ବୋଲି ମଧ୍ୟ କହିଥିଲେ। ଏଥିରେ ଜେଲେନ୍ସକି ରାଗିଯାଇ ନ ଖାଇ ବୈଠକରୁ ବାହାରି ଆସିଥିଲେ। ତେବେ ଏହି ଘଟଣା ପରେ, ଅନେକ ୟୁରୋପୀୟ ଦେଶ ଜେଲେନସ୍କିଙ୍କୁ ସମର୍ଥନ ଜଣାଇଥିଲେ। ଯେତେବେଳେ ସେ ଆମେରିକାରୁ ବ୍ରିଟେନରେ ପହଞ୍ଚିଲେ, ସେଠାରେ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା। ବ୍ରିଟିଶ ପ୍ରଧାନମନ୍ତ୍ରୀ କୀର ଷ୍ଟାରମର୍ ଖୋଲାଖୋଲି ଭାବରେ ୟୁକ୍ରେନକୁ ସାହାଯ୍ୟ ଜାରି ରଖିବାକୁ ଘୋଷଣା କରିଛନ୍ତି ଏବଂ ଏହା ମଧ୍ୟ କହିଛନ୍ତି ଯେ ତାଙ୍କ ଦେଶ ରୁଷ ଏବଂ ୟୁକ୍ରେନ ମଧ୍ୟରେ ଶାନ୍ତି ପ୍ରତିଷ୍ଠାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।