ୱାଶିଂଟନ୍, ୨୩/୧୨: ଆମେରିକୀୟ ନୌସେନା ରବିବାର ଲୋହିତ ସାଗରରେ ନିଜର ଯୁଦ୍ଧବିମାନକୁ ମିସାଇଲ ମାଡ଼ କରି ତାହାକୁ ଖସାଇ ଦେଇଛି । ହୁତୀ ବିଦ୍ରୋହୀଙ୍କ ଉପରେ ଏୟାରଷ୍ଟ୍ରାଇକ୍ ବେଳେ ଭୁଲ୍ବଶତଃ ଆମେରିକାର ନୌସେନା ବିମାନକୁ ମିସାଇଲ ମାଡ଼ କରିଥିଲା । ବିମାନରେ ଥିବା ଦୁଇ ପାଇଲଟ ସୁରକ୍ଷିତ ଭାବେ ବାହାରି ଆସିଥିଲେ । ଜଣଙ୍କୁ ସାମାନ୍ୟ ଆଘାତ ଲାଗିଛି ।
ଆମେରିକାର ସେଣ୍ଟ୍ରାଲ କମାଣ୍ଡ ପକ୍ଷରୁ କୁହାଯାଇଛି, ଏହି ଘଟଣା ଭୁଲ୍ରେ ହୋଇଛି । ଏଥିରେ ଏଫ୍/ଏ-୧୮ ଯୁଦ୍ଧବିମାନ ଦୁର୍ଘଟଣାଗ୍ରସ୍ତ ହୋଇଛି । ବିମାନଟି ୟୁଏସ୍ଏସ୍ ହ୍ୟାରୀ ଏସ୍ ଟ୍ରୁମ୍ୟାନ ଏୟାରକ୍ରାଫ୍ଟ କ୍ୟାରିୟରରେ ଉଡ଼ାଣ ଭରିଥିଲା । ଉଡ଼ାଣ ପରେ ୟୁଏସ୍ଏସ୍ ଗୋଟିସ୍ବର୍ଗ ମିସାଇଲ କ୍ରୁଜର ଭୁଲ୍ରେ ବିମାନ ଉପରେ ଆକ୍ରମଣ କରିଥିଲା । ୟୁଏସ୍ଏସ୍ ଗୋଟିସ୍ବର୍ଗ ଆମେରିକାର ଏକ ଗାଇଡେଡ୍ ମିସାଇଲ କ୍ରୁଜର ।
ଶନିବାର ବିଳମ୍ବିତ ରାତିରେ ୟେମେନ୍ ରାଜଧାନୀ ସନାରେ ଆମେରିକା ସେନା ଏୟାରଷ୍ଟ୍ରାଇକ୍ କରି ବିଦ୍ରୋହୀଙ୍କ ଠିକଣାକୁ ଟାର୍ଗେଟ କରିଥିଲା । ଏଥିରେ ହୁତୀ ବିଦ୍ରୋହୀଙ୍କ ମିସାଇଲ ଷ୍ଟୋରେଜ ସେଣ୍ଟର ଏବଂ କମାଣ୍ଡ ସେଣ୍ଟରକୁ ଟାର୍ଗେଟ କରାଯାଇଥିଲା । ହୁତୀ ବିଦ୍ରୋହୀଙ୍କ ଆକ୍ରମଣକୁ ରୋକିବା ପାଇଁ ଦକ୍ଷିଣ ଲୋହିତ ସାଗର, ବାବ୍ ଏଲ୍-ମାନ୍ଦେବ ଏବଂ ଆଦେନ ଉପସାଗରୀୟ କ୍ଷେତ୍ରରେ ଆମେରିକା ସେନା ଏୟାରଷ୍ଟ୍ରାଇକ୍ କରିଥିବା କହିଛି । ଆକ୍ରମଣରେ ଆମେରିକା ହୁତୀ ବିଦ୍ରୋହୀଙ୍କ କେତେକ ଡ୍ରୋନ୍ ଏବଂ ଏକ କ୍ରୁଜ୍ ମିସାଇଲକୁ ମଧ୍ୟ ଖସାଇ ନଷ୍ଟ କରିଛି ।
