ୱାଶିଂଟନ୍,୧୧/୦୪: ଆମେରିକାରେ ଏକ ହାଇପ୍ରୋଫାଇଲ୍ ସେକ୍ସ ସ୍କାଣ୍ଡାଲ ମାମଲାରେ ଜଣେ ଭାରତୀୟ ବଂଶୋଦ୍ଭବ ଆମେରିକୀୟ ସିଇଓଙ୍କୁ ଗିରଫ କରାଯାଇଛି । ସେ ହେଉଛନ୍ତି ସ୍ୱଚ୍ଛ ଜଳ ପରିଚାଳନା କରୁଥିବା ଷ୍ଟାର୍ଟଅପ୍ ଗ୍ରାଡିଆଣ୍ଟର ସିଇଓ ଅନୁରାଗ ବାଜପେୟୀ । ହାର୍ଭାର୍ଡ ୟୁନିଭର୍ସିଟି ନିକଟରେ ଥିବା ଆପାର୍ଟମେଣ୍ଟଗୁଡ଼ିକରେ ହାଇପ୍ରୋଫାଇଲ୍ ବେଶ୍ୟାଳୟ ପରିଚାଳିତ ହେଉଥିଲା । ଏଠାକୁ ଡାକ୍ତର, ଓକିଲ, କର୍ପୋରେଟ କାର୍ଯ୍ୟନିର୍ବାହୀ ଏବଂ ସରକାରୀ ଅଧିକାରୀ ଆସୁଥିଲେ । ଚଳିତବର୍ଷ ଷ୍ଟିଙ୍ଗ୍ ଅପରେସନ ପରେ ଏହି ଘଟଣାର ପର୍ଦ୍ଦାଫାସ ହୋଇଥିଲା ।
ୱାଲ୍ ଷ୍ଟ୍ରିଟ୍ ଜର୍ନାଲରେ ପ୍ରକାଶିତ ରିପୋର୍ଟ ମୁତାବକ, ଏହି ହାଇପ୍ରୋଫାଇଲ ବେଶ୍ୟାଳୟରେ ବିଶେଷକରି ଏସୀୟ ମହିଳାଙ୍କୁ ନିୟୋଜିତ କରାଯାଇଥିଲା । ଗ୍ରାହକଙ୍କ ଠାରୁ ଘଣ୍ଟା ପିଛା ୬୦୦ ଡଲାର (ପ୍ରାୟ ୫୦ ହଜାର ଟଙ୍କା) ନିଆଯାଉଥିଲା । ତେବେ ଗ୍ରାହକଙ୍କୁ ନିଜ ପରିଚୟ, କର୍ମସ୍ଥଳୀ ଆଦି ସୂଚନା ଦେବା ପରେ ହିଁ ବେଶ୍ୟାଳୟରେ ପ୍ରବେଶ ଅନୁମତି ମିଳୁଥିଲା ।
ଷ୍ଟିଙ୍ଗ୍ ଅପରେସନରୁ ଜଣାପଡ଼ିଥିଲା ଯେ ଅତିକମ୍ରେ ୩୦ ହାଇପ୍ରୋଫାଇଲ ବ୍ୟକ୍ତିବିଶେଷ ଏଠାକୁ ଯାଉଥିଲେ । ବୋଷ୍ଟନ ଅଞ୍ଚଳରେ ଥିବା ଏହି ବେଶ୍ୟାଳୟରେ ଚଳିତବର୍ଷ ହିଁ ଷ୍ଟିଙ୍ଗ୍ ଅପରେସନ ହୋଇଥିଲା । ଏଥିରେ ଅନୁରାଗ ବାଜପେୟୀଙ୍କ ସମେତ ଅନ୍ୟ କେତେକ ସ୍ଥାନୀୟ ସିଇଓ ଓ ଅଧିକାରୀଙ୍କୁ ଗିରଫ କରାଯାଇଛି । ଜଉମୁଦ କୋର୍ଟ ଦସ୍ତାବିଜରେ ଏମାନଙ୍କ ନାମ ରହିଛି । ଏତେ ବିବାଦ ସତ୍ତେ୍ୱ ଗ୍ରାଡିଆଣ୍ଟ କମ୍ପାନି ଏହାର ସିଇଓଙ୍କ ସମର୍ଥନରେ ବୟାନ ଜାରି କରିଛି ।
କମ୍ପାନିର ମୁଖପାତ୍ର ଫେଲିକ୍ସ ୱାଙ୍ଗ୍ କହିଛନ୍ତି, ନ୍ୟାୟ ବ୍ୟବସ୍ଥା ଉପରେ ଆମର ବିଶ୍ୱାସ ରହିଛି । ଠିକଣା ସମୟରେ ମାମଲାର ସମାଧାନ ହେବା ନେଇ ଆଶା କରୁଛୁ । ଗ୍ରାଡିଆଣ୍ଟ ଏହାର ପ୍ରଯୁକ୍ତିଗତ ସୃଜନଶୀଳତାରେ ଉତ୍କର୍ଷତା ବଜାୟ ରଖିବ ଏବଂ ସମାଜକୁ ସ୍ୱଚ୍ଛ ଜଳ ଯୋଗାଣକୁ ସୁନିଶ୍ଚିତ କରିବା ଜାରି ରଖିବ ।
ଘରୋଇ ବିବାଦରେ ସବୁବେଳେ ଦୋଷୀ ନୁହେଁ ପୁରୁଷ, ସ୍ଵାମୀ ଏବଂ ଶାଶୁଘର ଲୋକଙ୍କ ପକ୍ଷ ଶୁଣିବା ଉଚିତ୍ କୋର୍ଟ
