ନୂଆଦିଲ୍ଲୀ,୩୧/୦୭: ଗୋଟିଏ ପଟେ, ଡୋନାଲ୍ଡ ଟ୍ରମ୍ପ ଅନେକ ଦେଶ ମଧ୍ୟରେ ଯୁଦ୍ଧ ବନ୍ଦ କରିବାର ଦାବି କରୁଥିବା ଦେଖିବାକୁ ମିଳୁଥିବା ବେଳେ ଅନ୍ୟପଟେ ତାଙ୍କର ଶୁଳ୍କ ଘୋଷଣା ହଇଚଇ ସୃଷ୍ଟି କରିଛି। ନିକଟରେ ସେ ଆଉ ଏକ ନୂଆ ଘୋଷଣା କରିଛନ୍ତି। ଯାହାଦ୍ବାରା ଭାରତକୁ ଲାଗିପାରେ ବଡ଼ ଝଟକା । ଗୁରୁବାର ଦିନ ଟ୍ରମ୍ପ ସୋସିଆଲ ମିଡିଆ ମାଧ୍ୟମରେ କହିଛନ୍ତି ଯେ ଆମେରିକା ଏବଂ ପାକିସ୍ତାନ ମଧ୍ୟରେ ଏକ ଚୁକ୍ତି ସ୍ୱାକ୍ଷରିତ ହୋଇଛି। ଏହା ଅଧୀନରେ, ଉଭୟ ଦେଶ ତୈଳ ଭଣ୍ଡାର ବିକାଶ ଉପରେ କାମ କରିବେ। ଏଥିସହ ସେ ଦକ୍ଷିଣ କୋରିଆ ସମ୍ପର୍କରେ ଏକ ଗୁରୁତ୍ୱପୂର୍ଣ୍ଣ ଘୋଷଣା ମଧ୍ୟ କରିଛନ୍ତି।
ଟ୍ରମ୍ପ ସୋସିଆଲ ମିଡିଆରେ ଟ୍ବିଟ୍ କରି ଲେଖିଛନ୍ତି, "ଆମେ ପାକିସ୍ତାନ ସହିତ ଏକ ଚୁକ୍ତି କରିଛୁ, ଯାହା ଅଧୀନରେ ପାକିସ୍ତାନ ଏବଂ ଆମେରିକା ସେମାନଙ୍କର ବିଶାଳ ତୈଳ ଭଣ୍ଡାର ବିକାଶ ପାଇଁ ଏକାଠି କାମ କରିବେ। ଆମେ ଏକ ତୈଳ କମ୍ପାନୀ ବାଛିଛୁ ଯିଏ ଏହି ସହଭାଗୀତାର ନେତୃତ୍ୱ ନେବ। କିଏ ଜାଣେ, ହୁଏତ ପାକିସ୍ତାନ କୌଣସି ଦିନ ଭାରତକୁ ତେଲ ବିକ୍ରି କରିବ!" ବୋଲି କହିଛନ୍ତି । ସେହିପରି ଟ୍ରମ୍ପ ସାଉଥ କୋରିଆକୁ ନେଇ ଆହୁରି କହିଛନ୍ତି ଯେ, "ଆମେ ହ୍ୱାଇଟ୍ ହାଉସରେ ଏକ ବାଣିଜ୍ୟ ଚୁକ୍ତି ଉପରେ କାମ କରିବାରେ ବହୁତ ବ୍ୟସ୍ତ। ମୁଁ ଅନେକ ଦେଶର ନେତାଙ୍କ ସହ କଥା ହୋଇଛି, ଏବଂ ସେମାନେ ସମସ୍ତେ ଆମେରିକାକୁ ବହୁତ ଖୁସି କରିବାକୁ ଚାହୁଁଛନ୍ତି। ମୁଁ ଦକ୍ଷିଣ କୋରିଆର ଏକ ବାଣିଜ୍ୟ ପ୍ରତିନିଧିମଣ୍ଡଳୀ ସହିତ ସାକ୍ଷାତ କରିବି। ଦକ୍ଷିଣ କୋରିଆ ବର୍ତ୍ତମାନ ୨୫% ଶୁଳ୍କରେ ଅଛି, କିନ୍ତୁ ସେମାନଙ୍କ ପାଖରେ ସେହି ଶୁଳ୍କ ହ୍ରାସ କରିବାର ପ୍ରସ୍ତାବ ଅଛି। ମୁଁ ଜାଣିବାକୁ ଆଗ୍ରହୀ ହେବି ଯେ ସେହି ପ୍ରସ୍ତାବ କ'ଣ," ଦକ୍ଷିଣ କୋରିଆକୁ ଉଲ୍ଲେଖ କରି ଟ୍ରମ୍ପ କହିଛନ୍ତି।
ଟ୍ରମ୍ପ ଆହୁରି ମଧ୍ୟ କହିଛନ୍ତି ଯେ ଅନେକ ଦେଶ ଶୁଳ୍କ ଲଗାଇବାକୁ ପ୍ରସ୍ତାବ ଦେଉଛନ୍ତି, ଏହା ଆମେରିକାର ବାଣିଜ୍ୟ ନିଅଣ୍ଟକୁ ବହୁତ ପରିମାଣରେ ହ୍ରାସ କରିପାରିବ। ଏକ ସମ୍ପୂର୍ଣ୍ଣ ରିପୋର୍ଟ ସଠିକ୍ ସମୟରେ ପ୍ରକାଶିତ ହେବ। ଯଦି ଆମେ ଭାରତ ବିଷୟରେ କଥା ହେବା, ତେବେ ଆମେରିକା ସହିତ ଏକ ବାଣିଜ୍ୟ ଚୁକ୍ତି ସମ୍ପର୍କରେ ଦୀର୍ଘ ସମୟ ଧରି ଆଲୋଚନା ଚାଲିଛି। ଏହାକୁ ମଧ୍ୟ ଶୀଘ୍ର ଚୂଡ଼ାନ୍ତ କରାଯାଇପାରିବ। ଟ୍ରମ୍ପ କହିଛନ୍ତି ଯେ ଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ ସନ୍ତୁଳିତ ନୁହେଁ। ଭାରତ ଆମେରିକା ସହିତ କମ୍ ବାଣିଜ୍ୟ କରେ।
