ନୂଆଦିଲ୍ଲୀ: ବିଶ୍ୱର ୬୦ଟି ଦେଶ ବିରୁଦ୍ଧରେ ଏକ ବଡ଼ ବାଣିଜ୍ୟିକ ତଦନ୍ତ ଆରମ୍ଭ କରିଛି ଆମେରିକା । ଏହି ତଦନ୍ତର ଉଦ୍ଦେଶ୍ୟ ହେଉଛି କି, ଏହି ଦେଶ ଗୁଡ଼ିକ ବଳପୂର୍ବକ ଶ୍ରମରେ ତିଆରି ସାମଗ୍ରୀ ଆମଦାନି ରୋକିବା ପାଇଁ କଣ ପଦକ୍ଷେପ ନେଇଛନ୍ତି ତାହା ନିର୍ଣ୍ଣୟ କରିବା। ଭାରତ ମଧ୍ୟ ଏହି ତାଲିକାରେ ସାମିଲ ଅଛି। ଆମେରିକା କହିଛି ଯେ, ଅନେକ ଦେଶ ଏପରି ସାମଗ୍ରୀକୁ ସେମାନଙ୍କ ବଜାରରେ ପ୍ରବେଶ କରିବାରୁ ରୋକିବା ପାଇଁ ଠୋସ୍ ପଦକ୍ଷେପ ନେଇନାହାଁନ୍ତି। ଏହି କାରଣରୁ ଏହି ତଦନ୍ତ ଆରମ୍ଭ କରାଯାଇଛି।
ଆମେରିକାର ବାଣିଜ୍ୟ ପ୍ରତିନିଧି ଜେମିସନ ଗ୍ରୀୟର କହିଛନ୍ତି ଯେ, ବଳପୂର୍ବକ ଶ୍ରମ ବିରୁଦ୍ଧରେ ବିଶ୍ୱସ୍ତରୀୟ ସହମତି ଅଛି, କିନ୍ତୁ ଅନେକ ସରକାର ଏପରି ସାମଗ୍ରୀ ଆମଦାନିକୁ ପ୍ରଭାବଶାଳୀ ଭାବରେ ରୋକିବାରେ ବିଫଳ ହୋଇଛନ୍ତି। ସେ କହିଛନ୍ତି ଯେ ଏହି ତଦନ୍ତ ନିର୍ଣ୍ଣୟ କରିବ ଯେ ବିଭିନ୍ନ ଦେଶ ବଳପୂର୍ବକ ଶ୍ରମରେ ତିଆରି ସାମଗ୍ରୀକୁ ରୋକିବା ପାଇଁ କଣ ପଦକ୍ଷେପ ନେଇଛନ୍ତି ଏବଂ ଯଦି ସେମାନେ ନେଇ ନାହାଁନ୍ତି, ତେବେ ଏହା ଆମେରିକୀୟ ଶିଳ୍ପ ଏବଂ ଶ୍ରମିକ ମାନଙ୍କୁ କିପରି ପ୍ରଭାବିତ କରିଛି।
ଗୋଟିଏ ଦିନ ପୂର୍ବରୁ ୧୬ ଟି ଦେଶ ବିରୁଦ୍ଧରେ ତଦନ୍ତ ଆରମ୍ଭ ହୋଇଛି...
ଆମେରିକା ୧୬ଟି ଦେଶ ବିରୁଦ୍ଧରେ ତଦନ୍ତ ଆରମ୍ଭ କରିବା ଘୋଷଣା କରିବାର ମାତ୍ର ଗୋଟିଏ ଦିନ ପରେ ଏହି ପଦକ୍ଷେପ ଆସିଛି। ତଦନ୍ତ ଯାଞ୍ଚ କରୁଛି ଯେ, ଏହି ଦେଶ ଗୁଡ଼ିକର ଉତ୍ପାଦନ ଏବଂ ଉତ୍ପାଦନ ନୀତି ଗୁଡ଼ିକ ଆମେରିକା ବାଣିଜ୍ୟକୁ ବୋଝ କରୁଛି କି ନାହିଁ। ଭାରତକୁ ମଧ୍ୟ ସେହି ତାଲିକାରେ ସାମିଲ କରାଯାଇଥିଲା।
ଅନେକ ପ୍ରମୁଖ ଦେଶ ମଧ୍ୟ ତଦନ୍ତାଧୀନ ଅଛନ୍ତି...
ଏହି ତଦନ୍ତରେ କେବଳ ଭାରତ ନୁହେଁ ବରଂ ପାକିସ୍ତାନ, ଚୀନ୍, ରୁଷ, ଥାଇଲ୍ୟାଣ୍ଡ, ବାଂଲାଦେଶ, ଭେନେଜୁଏଲା ଏବଂ କାମ୍ବୋଡିଆ ସମେତ ଅନେକ ଦେଶ ମଧ୍ୟ ଅନ୍ତର୍ଭୁକ୍ତ। ଆଲଜେରିଆ, ଅଙ୍ଗୋଲା, ଆର୍ଜେଣ୍ଟିନା, ଅଷ୍ଟ୍ରେଲିଆ, ବାହାମାସ୍, ବାହାରିନ୍, ବ୍ରାଜିଲ୍, କାନାଡା, ଚିଲି, କଲମ୍ବିଆ, କୋଷ୍ଟାରିକା, ଡୋମିନିକାନ୍ ଗଣରାଜ୍ୟ, ଇକ୍ୱେଡର, ଇଜିପ୍ଟ, ଏଲ୍ ସାଲଭାଡୋର, ୟୁରୋପୀୟ ୟୁନିଅନ୍, ଗୁଆଟେମାଲା, ଗୁଆନା, ହଣ୍ଡୁରାସ, ହଂକଂ, ଇଣ୍ଡୋନେସିଆ, ଇରାକ, ଇସ୍ରାଏଲ, ଜାପାନ, ଜୋର୍ଡାନ, କାଜାଖସ୍ତାନ, କୁଏତ, ଲିବିଆ, ମାଲେସିଆ, ମେକ୍ସିକୋ, ମରୋକ୍କୋ, ନ୍ୟୁଜିଲ୍ୟାଣ୍ଡ, ନିକାରାଗୁଆ, ନାଇଜେରିଆ, ନରୱେ, ଓମାନ, ପେରୁ, ଫିଲିପାଇନ୍ସ, କତାର, ସାଉଦି ଆରବ, ସିଙ୍ଗାପୁର, ଦକ୍ଷିଣ ଆଫ୍ରିକା, ଦକ୍ଷିଣ କୋରିଆ, ଶ୍ରୀଲଙ୍କା, ସ୍ୱିଜରଲ୍ୟାଣ୍ଡ, ତାଇୱାନ, ତ୍ରିନିଦାଦ ଏବଂ ଟୋବାଗୋ, ତୁର୍କୀ, ସଂଯୁକ୍ତ ଆରବ ଏମିରେଟ୍ସ, ୟୁନାଇଟେଡ୍ କିଙ୍ଗଡମ୍, ଉରୁଗୁଏ ଏବଂ ଭିଏତନାମ ଭଳି ଦେଶ ମଧ୍ୟ ଅନ୍ତର୍ଭୁକ୍ତ।
କେଉଁ ଆଇନ ଅନୁଯାୟୀ ତଦନ୍ତ କରାଯାଉଛି ?
ଏହି ତଦନ୍ତ ୧୯୭୪ ମସିହାର ବାଣିଜ୍ୟ ଆଇନର ଧାରା ୩୦୧(ଖ) ଅନୁଯାୟୀ କରାଯାଉଛି। ଏହି ଆଇନ ଅନୁଯାୟୀ, ଆମେରିକା ବୈଦେଶିକ ନୀତି ଏବଂ ବାଣିଜ୍ୟ ଅଭ୍ୟାସ ଗୁଡ଼ିକର ତଦନ୍ତ କରେ ଯାହା ଏହାର ବ୍ୟବସାୟକୁ କ୍ଷତି ପହଞ୍ଚାଏ କିମ୍ବା ପ୍ରତିବନ୍ଧିତ କରେ।
ଏପ୍ରିଲରେ ଶୁଣାଣି ହେବ...
ଆମେରିକୀୟ ବାଣିଜ୍ୟ ପ୍ରତିନିଧି କହିଛନ୍ତି ଯେ, ଏହି ତଦନ୍ତ ସହିତ ଜଡିତ ଏକ ଶୁଣାଣି ଏପ୍ରିଲରେ ଅନୁଷ୍ଠିତ ହେବ। ଶିଳ୍ପ ପ୍ରତିନିଧି ଏବଂ ବିଶେଷଜ୍ଞଙ୍କ ସହିତ ମଧ୍ୟ ପରାମର୍ଶ ନିଆଯିବ। ଏହି ତଦନ୍ତ ଏପରି ଏକ ସମୟରେ ହୋଇଛି ଯେତେବେଳେ ଆମେରିକାର ସୁପ୍ରିମକୋର୍ଟ ସମ୍ପ୍ରତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ଅନେକ ଦେଶ ଉପରେ ଲାଗୁ କରାଯାଇଥିବା ଶୁଳ୍କକୁ ପ୍ରତ୍ୟାହାର କରିଛନ୍ତି। ଏହା ପରେ, ଟ୍ରମ୍ପ ପ୍ରଶାସନ ଏକ ନୂତନ ବ୍ୟବସ୍ଥା ଅଧୀନରେ ବିଶ୍ୱର ବିଭିନ୍ନ ସ୍ଥାନରୁ ଆମଦାନି ହେଉଥିବା ସାମଗ୍ରୀ ଉପରେ ଅସ୍ଥାୟୀ ୧୦ ପ୍ରତିଶତ ଶୁଳ୍କ ଲାଗୁ କରିଛି। ଏହି ବ୍ୟବସ୍ଥା ଜୁଲାଇ ପର୍ଯ୍ୟନ୍ତ କାର୍ଯ୍ୟକାରୀ ହେବ ।
ଏହା ସହ ପଢନ୍ତୁ : ଆସାମରୁ କଂଗ୍ରେସ ଉପରେ ବର୍ଷିଲେ ମୋଦି, କହିଲେ ମିଛ ପ୍ରତିଶୃତିର ଦୋକାନ ହେଉଛି କଂଗ୍ରେସ
