ନୂଆଦିଲ୍ଲୀ: ଦ୍ବିତୀୟ ଥର ରାଷ୍ଟ୍ରପତି ହେବା ପରେ ଡୋନାଲ୍ଡ ଟ୍ରମ୍ପ ଗୋଟିଏ ପରେ ଗୋଟିଏ କଠୋର ନିଷ୍ପତ୍ତି ଗ୍ରହଣ କରୁଛନ୍ତି । ତାଙ୍କର ଏହି ସବୁ ନିଷ୍ପତ୍ତିକୁ ନେଇ ବିଶ୍ବରେ ହଇଚଇ ହେଉଛି । ଏବେ ଆମେରିକା ସରକାର ୪୩ ଦେଶର ଏକ ସୂଚୀ ତିଆରି କରିଛନ୍ତି ଏବଂ ଏହାକୁ ୩ ଭାଗରେ ବିଭକ୍ତ କରିଛନ୍ତି । ରେଡ୍, ଅରେଞ୍ଜ ଏବଂ ୟେଲୋ ଶ୍ରେଣୀରେ ୪୩ ଦେଶକୁ ଅନ୍ତର୍ଭୁକ୍ତ କରିଛନ୍ତି ଟ୍ରମ୍ପ । ଏହି ୪୩ ଦେଶ ଉପରେ ଟ୍ରାଭେଲ୍ ବ୍ୟାନ୍ (ଭ୍ରମଣ ପ୍ରତିବନ୍ଧକ) ଲଗାଇବାକୁ ଟ୍ରମ୍ପ ପ୍ରଶାସନ ଯୋଜନା କରୁଛନ୍ତି । ରେଡ୍ ଲିଷ୍ଟରେ ଆଫଗାନିସ୍ତାନ, ଉତ୍ତର କୋରିଆ, ଇରାନ, ୟେମେନ, ସୋମାଲିଆ, ସୁଡାନ ଏବଂ ସିରିଆ ଭଳି ଦେଶ ସାମିଲ ହୋଇଛନ୍ତି । କିନ୍ତୁ ସବୁଠାରୁ ଆଶ୍ବର୍ଯ୍ୟକର କଥା ହେଉଛି ଆମେରିକାର ଏହି ରେଡ୍ ଲିଷ୍ଟରେ ଭାରତର ପଡ଼ୋଶୀ ରାଷ୍ଟ୍ର ଭୁଟାନ ରହିଛି । କାହିଁକି ଟ୍ରମ୍ପ ଭୁଟାନକୁ ଲାଲ ତାଲିକାଭୁକ୍ତ କରିଛନ୍ତି ଆସନ୍ତୁ ଜାଣିବା ।
ଟ୍ରମ୍ପ ପ୍ରଶାସନର ସୂତ୍ର ଅନୁଯାୟୀ ଭୁଟାନକୁ ଏହି ତାଲିକାରେ ସାମିଲ କରିବାର କିଛି କାରଣ ରହିଛି । ଭୁଟାନର ଲୋକମାନେ ଆମେରିକା ପହଞ୍ଚିବା ପରେ ଭିସା ନିୟମର ଉଲ୍ଲଂଘନ କରୁଛନ୍ତି । ଅନେକ ସମୟରେ ଭିସାରେ ନିର୍ଦ୍ଦିଷ୍ଟ ଅବଧି ପରେ ମଧ୍ୟ ସେମାନେ ଆମେରିକାରେ ରହୁଛନ୍ତି । ଏଭଳି ପରିସ୍ଥିତି ଜାତୀୟ ସୁରକ୍ଷା ପାଇଁ ବିପଦ । ଏହା ବ୍ୟତୀତ ବେଆଇନ ଉପାୟରେ ଆମେରିକାରେ ପହଞ୍ଚିବା ମାମଲାରେ ଭୁଟାନର ଲୋକଙ୍କ ସଂଖ୍ୟା ଅଧିକ ଏବଂ ଏହାକୁ ନେଇ ଆମେରିକା ମଧ୍ୟ ଚିନ୍ତିତ । ଆମେରିକାର ଗୃହ ସୁରକ୍ଷା ବିଭାଗ ଅନୁସାରେ, ଗତ ବର୍ଷ ୩୭ ପ୍ରତିଶତ ଭୁଟାନ ନାଗରିକ ଭିସା ନିୟମ ଉଲ୍ଲଂଘନ କରିଛନ୍ତି । ଏବେ ରେଡ୍ ବା ଲାଲ ତାଲିକାରେ ସାମିଲ ହେବା ପରେ ଆମେରିକା ଯିବାକୁ ଚାହୁଁଥିବା ଭୁଟାନର ପ୍ରତ୍ୟେକ ବ୍ୟକ୍ତିଙ୍କ ଯାଞ୍ଚ କରାଯିବ ଏବଂ ଭିସା ପ୍ରଦାନ କରାଯିବ । କୌଣସି ଠୋସ୍ କାରଣ ନଥିଲେ ଭୁଟାନର ନାଗରିକଙ୍କୁ ଭିସା ମିଳିପାରିବ ନାହିଁ ।
ଆମେରିକାର ଏହି ନିଷ୍ପତ୍ତି ବିଶେଷ କରି ଭୁଟାନର ଲୋକମାନଙ୍କ ପାଇଁ ସମସ୍ୟା ସୃଷ୍ଟି କରିବ । ଯେଉଁମାନେ ପାଠପଢ଼ା ଏବଂ ଅନ୍ୟାନ୍ୟ କାମ ପାଇଁ ଆମେରିକା ଯାଉଛନ୍ତି ସେମାନଙ୍କୁ ପ୍ରଭାବିତ କରିବ ଟ୍ରମ୍ପଙ୍କ ନୂଆ ନିୟମ । ଆମେରିକାର ଏହି ନିଷ୍ପତ୍ତି ଭୁଟାନ ସହିତ ଏହାର ସମ୍ପର୍କକୁ ମଧ୍ୟ ପ୍ରଭାବିତ କରିପାରେ । ଭୁଟାନର ବୈଦେଶିକ ମନ୍ତ୍ରଣାଳୟ ଆନୁଷ୍ଠାନିକ ଭାବରେ ଦାବି କରିଛି ଯେ, ଆମେରିକା ଏହାର ନିଷ୍ପତ୍ତିର ସମୀକ୍ଷା କରୁ । ଆମେରିକା ଯେଉଁ ୧୧ଟି ଦେଶକୁ ଲାଲ ତାଲିକାରେ ସାମିଲ କରିଛି, ସେମାନଙ୍କ ମଧ୍ୟରେ ଆଫଗାନିସ୍ତାନ, ସୋମାଲିଆ, ସିରିଆ, ଉତ୍ତର କୋରିଆ, ଲିବିଆ, ୟେମେନ ଏବଂ ସୁଡାନ ଭଳି ଦେଶ ଅନ୍ତର୍ଭୁକ୍ତ । ଏହି ଦେଶଗୁଡ଼ିକରେ ଅଶାନ୍ତି ଅଛି, ଆତଙ୍କବାଦର ସମସ୍ୟା ଅଛି କିମ୍ବା ଗୃହଯୁଦ୍ଧର ପରିସ୍ଥିତି ଅଛି। ଏପରି ପରିସ୍ଥିତିରେ ଏହି ଦେଶଗୁଡ଼ିକୁ ଯାତ୍ରା ପ୍ରତିବନ୍ଧକ ତାଲିକାରେ ରଖିବା ନିଷ୍ପତ୍ତିକୁ ବୁଝି ହେଉଛି । କିନ୍ତୁ ଭୁଟାନ ସମ୍ପର୍କରେ ନିଆଯାଇଥିବା ନିଷ୍ପତ୍ତି ଅତ୍ୟନ୍ତ ଆଶ୍ଚର୍ଯ୍ୟଜନକ ।
