ଭୁବନେଶ୍ୱର,୨୨/୦୪: ଉତ୍କଳ ବିଶ୍ୱବିଦ୍ୟାଳୟ କ୍ୟାମ୍ପସ ଏବେ ଅଣ ଛାତ୍ରଙ୍କ କବ୍ଜାରେ । ରାତି ପାଇଲେ ନିଶାଡ଼ିଙ୍କ ଆଡ୍ଡା ଜମୁଛି । ଗଣ୍ଡଗୋଳ ହେଉଛି । ଶୈକ୍ଷିକ ବାତାବରଣ ନଷ୍ଟ ହେଉଛି । ହଷ୍ଟେଲରେ ରହି ପଢ଼ୁଥିବା ପିଲା ମାନସିକ ସ୍ତରରେ ଅଶାନ୍ତ ହେଉଛନ୍ତି। ଏସବୁ ପଛରେ ଅଣଛାତ୍ରଙ୍କ ହାତ ରହୁଛି । ଏପରି ବାରମ୍ବାର ଅଭିଯୋଗ ପରେ ଚେତିଛନ୍ତି ଉତ୍କଳ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ।
ସୋମବାର ବିଶ୍ୱବିଦ୍ୟାଳୟ କୁଳପତି ପୁଲିସ ଡିଜିଙ୍କୁ କ୍ୟାମ୍ପସ୍ରୁ ଅଣଛାତ୍ର ମୁକ୍ତ କରିବା ପାଇଁ ସହାୟତା ଲୋଡ଼ିଛନ୍ତି। ଏନେଇ ସେ ଚିଠି ଲେଖିଛନ୍ତି । ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଚିଠିରେ ଉଲ୍ଲେଖ କରିଛନ୍ତି ଯେ, କ୍ୟାମ୍ପସ୍ରେ ଅଣଛାତ୍ର ଅସାମାଜିକ କାର୍ଯ୍ୟ କରୁଛନ୍ତି । ତେଣୁ ସେମାନଙ୍କୁ ଉଚ୍ଛେଦ କରିବା ସମୟରେ ପୁଲିସର ସହାୟତା ଆବଶ୍ୟକ ।
ଛାତ୍ରଙ୍କ ଅଭିଯୋଗ ଅନୁଯାୟୀ, ହଷ୍ଟେଲରେ ଅନେକ ଅଣଛାତ୍ର ରୁମ୍ କବ୍ଜା କରି ରଖିଛନ୍ତି । ହଷ୍ଟେଲ୍ଏବେ ନିଶାଡ଼ିଙ୍କ ପେଣ୍ଠସ୍ଥଳୀ ପାଲଟିଛି । ସଂଧ୍ୟା ହେଲେ ନିଶାର ଆସର ଜମୁଛି । ଗଣ୍ଡଗୋଳ ହେଉଛି । ଅସାମାଜିକ କାର୍ଯ୍ୟକଳାପ ହେଉଛି । ଏହାକୁ ବିରୋଧ କଲେ ଛାତ୍ରଙ୍କ ଉପରେ ଆକ୍ରମଣ ହେଉଛି । ନିକଟରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ ମଧ୍ୟ ସମାନ ଅଭିଯୋଗ ଆଣିଥିଲା । କ୍ୟାମ୍ପସ୍କୁ ଅଣ ଛାତ୍ର ମୁକ୍ତ କରିବାକୁ ଦାବି କରିଥିଲା । ଦାବି ପୂରଣ ନହେଲେ ଆନ୍ଦୋଳନ ଜୋରଦାର ହେବ ବୋଲି ଚେତାବନୀ ଦେଇଥିଲା । ଏପରିକି ଗତବର୍ଷ ମଧ୍ୟ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଓ ପୁଲିସକୁ ନେଇ ଏକ ଟିମ୍ ହୋଇଥିଲା । ଏଥିରେ କ୍ୟାମ୍ପସ୍ ଓ ହଷ୍ଟେଲରୁମ୍ କବ୍ଜା କରି ରଖିଥିବା ପିଲାଙ୍କୁ ବାହାର କରିବାକୁ ଉଦ୍ୟମ ହୋଇଥିଲା । ହେଲେ ପିଲାମାନେ ରୁମ୍ ତାଲା ପକାଇ ପଳାଇଥିଲେ । ଏହାକୁ ନେଇ ଉତ୍ତେଜନା ପ୍ରକାଶ ପାଇଥିଲା । ତେଣୁ ଉଚ୍ଛେଦରେ କର୍ତ୍ତୃପକ୍ଷ ସଫଳ ହୋଇନଥିଲେ । ତେଣୁ ଚଳିତବର୍ଷ ଉଚ୍ଛେଦ ସମୟରେ ଯେପରି କୌଣସି ଅପ୍ରୀତିକର ପରିସ୍ଥିତି ନହୁଏ ସେଥିପାଇଁ ପୁଲିସର କୁଳପତି ଡିଜିଙ୍କ ସହାୟତା ଲୋଡ଼ିଛନ୍ତି ।
