ଲକ୍ଷ୍ନୌ: ନେପାଳରେ ଘଟିଥିବା ହିଂସାତ୍ମକ ପ୍ରତିବାଦ ପରେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପ୍ରଥମ ଥର ପାଇଁ ଏହି ପ୍ରସଙ୍ଗରେ ପ୍ରତିକ୍ରିୟା ଦେଇଛନ୍ତି । ପଡ଼ୋଶୀ ଦେଶର ସ୍ଥିତିକୁ ଉଲ୍ଲେଖ କରି ଯୋଗୀ ଆଦିତ୍ୟନାଥ ଶନିବାର (ସେପ୍ଟେମ୍ବର ୧୩) କହିଛନ୍ତି ଯେ, ଯଦି ଛୋଟ ଛୋଟ କଥାକୁ ଅଣଦେଖା କରାଯାଏ, ତେବେ ସେଗୁଡ଼ିକ ବଡ଼ ସମସ୍ୟାରେ ପରିଣତ ହୋଇପାରେ । ଯେପରି ନେପାଳରେ ଦେଖିବାକୁ ମିଳିଛି । ଏହି ପ୍ରସଙ୍ଗଗୁଡ଼ିକୁ ସକ୍ରିୟ ଏବଂ ସମ୍ବେଦନଶୀଳତାର ସହିତ ସମାଧାନ କରାଯିବା ଉଚିତ ।
ଏକ କାର୍ଯ୍ୟକ୍ରମରେ ଉଦବୋଧନ ଦେଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ, ଜନପ୍ରତିନିଧିମାନଙ୍କୁ ମଧ୍ୟ ଲୋକଙ୍କ କ୍ରୋଧର ସାମ୍ନା କରିବାକୁ ପଡ଼ିଥାଏ । ତେଣୁ ସେମାନେ ଧୈର୍ଯ୍ୟର ସହିତ ଜନସାଧାରଣଙ୍କ ଅଭିଯୋଗ ଶୁଣିବା ଉଚିତ । ସେମାନଙ୍କୁ ଏକ ଯୁକ୍ତିଯୁକ୍ତ ସମାଧାନ ଖୋଜିବା ଦରକାର । ରାମ ମନୋହର ଲୋହିଆ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସର ପ୍ରତିଷ୍ଠା ଦିବସ ସମାରୋହରେ ଉଦବୋଧନ ଦେଇ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଯୋଗୀ କହିଛନ୍ତି ଯେ, ଡାକ୍ତରମାନେ ରୋଗୀ ଏବଂ ସେମାନଙ୍କ ପରିବାର ସହିତ ବ୍ୟବହାର କରିବା ସମୟରେ ସମ୍ବେଦନଶୀଳ ହେବ ଆବଶ୍ୟକ । ରାଜନେତା ଭାବରେ ଆମେ ମଧ୍ୟ ସମାନ ପରିସ୍ଥିତିର ସମ୍ମୁଖୀନ ହେଉଛୁ ଏବଂ ସମସ୍ୟାଗୁଡ଼ିକୁ ବୁଝି ଉପଯୁକ୍ତ ସମାଧାନ ଖୋଜିବା ଆମର କର୍ତ୍ତବ୍ୟ।
ସେ କହିଛନ୍ତି ଯେ, ହସ୍ପିଟାଲଗୁଡ଼ିକୁ ରୋଗୀଙ୍କ ଅନେକ ସମସ୍ୟାର ସମାଧାନ କରିବାକୁ ପଡ଼ିଥାଏ । ଆମ୍ବୁଲାନ୍ସ ବ୍ୟବସ୍ଥା ଏବଂ ରକ୍ତର ଉପଲବ୍ଧତା, ଯାହା ଛୋଟ ମନେହୁଏ କିନ୍ତୁ ସମୟ ମଧ୍ୟରେ ସମାଧାନ ନ ହେଲେ ଏହା ଏକ ବଡ଼ ସମସ୍ୟା ହୋଇପାରେ । ଛୋଟ ଛୋଟ କଥା ଆମ ପାଇଁ ବେଳେବେଳେ ବଡ଼ ସମସ୍ୟା ହୋଇଯାଏ। ନେପାଳରେ କ'ଣ ଘଟିଲା ଆପଣମାନେ ଦେଖିଥିବେ । ଲୋକମାନେ ସୋସିଆଲ ମିଡିଆକୁ ଅଣଦେଖା କରିଥିଲେ ଏବଂ ଏହାର ଫଳାଫଳ କ'ଣ ହେଲା ? ବିକାଶ ଏବଂ ପ୍ରଗତି କିପରି ବନ୍ଦ ହୋଇଗଲା ? ଲୋକଙ୍କ ଜୀବନ ସହିତ କିପରି ଖେଳାଗଲା ? ଏପରି ଘଟଣା କିଭଳି ଆଉ କେଉଁଠି ନଘଟେ ତାହା ନିଶ୍ଚିତ କରିବା ପାଇଁ ପ୍ରତ୍ୟେକ ବ୍ୟକ୍ତି ନିଜ ନିଜ ଅଞ୍ଚଳରେ ସତର୍କ ରହିବା ଉଚିତ ବୋଲି କହିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।
