ଉତ୍ତରାଖଣ୍ଡ, ୧।୧୧: ବାହାଘର ହେଉ କିମ୍ୱା ଅନ୍ୟ କୌଣସି ଫଙ୍କସନ୍ ଆଉ ଅଧିକ ସୁନାଗହଣା ପିନ୍ଧିପାରିବେନି ମହିଳା । ସୁନା ହାର, ଚୁଡ଼ି କି ମୁଦି, କିଛି ପିନ୍ଧି ପାରିବେନି । କେବଳ କାନଫୁଲ, ନୋଥ ଓ ମଙ୍ଗଳସୂତ୍ର ପିନ୍ଧିପାରିବେ । ୩ରୁ ଅଧିକ ସଂଖ୍ୟାର ସୁନା ଅଳଙ୍କାର ପିନ୍ଧିଲେ ଜୋରିମାନା ଦେବାକୁ ପଡ଼ିବ । ଏ କଥା ଶୁଣି ଆଶ୍ଚର୍ଯ୍ୟ ହୋଇଯାଉଛନ୍ତି କି ? କହିରଖୁଛୁ ଯେ, ଏଭଳି ନିୟମ ଓଡ଼ିଶାରେ ନୁହେଁ ଉତ୍ତରାଖଣ୍ଡ ରାଜ୍ୟରେ ଲାଗୁ ହୋଇଛି । ସେଠାରେ ଏକ ପଞ୍ଚାୟତ ମହିଳାମାନଙ୍କ ଅଧିକ ସୁନା ଅଳଙ୍କାର ପିନ୍ଧିବା ଉପରେ କଟକଣା ଲଗାଇଛି ।
ଦେଶରେ ଆକାଶ ଛୁଆଁ ସୁନା ରେଟ ଭିତରେ ଏଭଳି ଅଜବ ନିୟମ ଶୁଣି ଯେ କେହି ବି ଆଶ୍ଚର୍ଯ୍ୟ ହେବେ । ତେବେ ଏହି ନିୟମ କାହିଁକି ଲାଗୁ ହୋଇଛି, ଏହି ନିୟମରେ ମହିଳାଙ୍କ ସୁନା ଗହଣା ପିନ୍ଧିବା ଉପରେ ଆଉ କେଉଁ କେଉଁ ପ୍ରତିବନ୍ଧକ ଲାଗୁ ହେବ ଆସନ୍ତୁ ଜାଣିବା । ନିୟମ ଅନୁସାରେ, ଏଠିକାର ମହିଳାମାନେ ୩ରୁ ଅଧିକ ସୁନା ଅଳଙ୍କାର ପିନ୍ଧିଲେ ଜରିମାନା ଲାଗିବ । ବାହାଘର କିମ୍ବା ଅନ୍ୟ କୌଣସି ସାମାଜିକ ସମାରୋହରେ କେବଳ କାନଫୁଲ, ନୋଥ ଓ ମଙ୍ଗଳସୂତ୍ର ପିନ୍ଧିପାରିବେ । ଯଦି ଏହାଠୁ ଅଧିକ ସୁନା ଗହଣା ପିନ୍ଧିଲେ ୫୦ ହଜାର ଜରିମାନା ଦେବାକୁ ପଡ଼ିବ । ସେ ଧନୀ ହୁଅନ୍ତି ଗରିବ ସମସ୍ତଙ୍କ ପାଇଁ ଏହି ନିୟମ ସମାନ । ଯେ କେହି ବି ଏହି ନିୟମ ଭାଙ୍ଗିବେ ସିଏ ତଣ୍ଡ ଗଣିବେ । ଉତ୍ତରାଖଣ୍ଡ ଡେରାଡୁନର କନ୍ଧାର ଓ ଇନ୍ଦ୍ରୋଲି ଗାଁରେ ଏହି ନିଆରା ନିୟମ ଲାଗୁ ହୋଇଛି । ଯାହାକୁ ସମସ୍ତ ଗ୍ରାମବାସୀ ସ୍ୱାଗତ କରିଛନ୍ତି । ବର୍ତ୍ତମାନ ମହିଳାଙ୍କ ସୁନା ପିନ୍ଧିବା ଉପରେ ପ୍ରତିବନ୍ଧକ ଲାଗୁ ହୋଇଛି । ଆଗକୁ ଗାଁରେ ବ୍ରାଣ୍ଡେଡ ମଦ ପିଇବା ଉପରେ ମଧ୍ୟ ରୋକ ଲଗାଇବାକୁ ବିଚାର କରାଯାଉଛି ବୋଲି କହିଛନ୍ତି ଗ୍ରାମବାସୀ ।
ଗୋଟେ ପଟେ ଦେଖିବାକୁ ଗଲେ ଏହି ନିୟମ ଗରିବ ଓ ମଧ୍ୟସ୍ତି ପରିବାରକୁ ଆଶ୍ୱସ୍ତି ଦେଇଛି । କାରଣ ଭାରତରେ ଇଚ୍ଛା ଥାଉ କି ନଥାଉ ଝିଅ ବାହାଘରରେ ନିଜର ସାମର୍ଥ୍ୟଠୁ ଅଧିକ ଖର୍ଚ୍ଚ କରିଥାନ୍ତି ପରିବାର । ସୁନାଗହଣା କିଣିବାରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିଦିଅନ୍ତି । ଆଉ ବିବାହ ପରେ ଗରିବ ପରିବାରଟିଏ ଋଣ ବୋଝ ତଳେ ଦବିଯାଏ । ତେଣୁ ଲୋକଙ୍କୁ ଉପରୁ ସାମାଜିକ ଓ ଆର୍ଥିକ ଚାପ କମାଇବାକୁ ଉତ୍ତରାଖଣ୍ଡର ଏହି ଦୁଇ ଗାଁ ଏଭଳି ପଦକ୍ଷେପ ନେଇଛନ୍ତି । ଏବେ ସୁନା ଦର ଆକାଶଛୁଆଁ ହୋଇଥିବା ବେଳେ ଏଭଳି ପଦକ୍ଷେପ ନିଶ୍ଚିତରୂପେ ସ୍ୱାଗତଯୋଗ୍ୟ ।
