ନୂଆଦିଲ୍ଲୀ,୬।୮: ଉତ୍ତରାଖଣ୍ଡର ଉତ୍ତରକାଶୀ ଜିଲ୍ଲାର ଧରାଲି ଗାଁରେ ବାଦାଲ ଫଟା ବର୍ଷା ଯୋଗୁଁ ଭୟଙ୍କର ବନ୍ୟା ପରେ ସ୍ଥିତି ।ବର୍ଷା ଏବଂ ତା’ପରେ ମାଟି ଅତଡ଼ା ଖସି ସମ୍ପୂର୍ଣ୍ଣ ଅଞ୍ଚଳକୁ ଛାରଖାର କରିଛି। ମଙ୍ଗଳବାର ଦିନ ପ୍ରାୟ ୨ଟା ସମୟରେ ଥରାଲି ଅଞ୍ଚଳରେ ହଠାତ୍ ଆସିଥିବା ଏହି ବନ୍ୟା ପରେ ଏପର୍ଯ୍ୟନ୍ତ ୫ ଜଣଙ୍କ ମୃତ୍ୟୁ ହୋଇଛି। ସେଭଳି ୧୧ ଜଣ ସେନା ଯବାନ ନିଖୋଜ ଅଛନ୍ତି ବୋଲି ଜଣାପଡ଼ିଛି। ପ୍ରାୟ ୧୯୦ ଜଣଙ୍କୁ ଉଦ୍ଧାର କରାଯାଇ ସାରିଛି। ତଥାପି, ଉଦ୍ଧାରକାରୀ ଦଳ ସମ୍ମୁଖରେ ଅନେକ ଚ୍ୟାଲେଞ୍ଜ ଏବେ ବି ରହିଛି।
ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି କହିଛନ୍ତି, ଧରାଲି ବିପର୍ଯ୍ୟୟ ପରେ ୧୯୦ ଜଣଙ୍କୁ ଉଦ୍ଧାର କରାଯାଇଛି। ସରକାର ଏବଂ ସେନା ମିଳିତ ଭାବରେ ରିଲିଫ୍ କାର୍ଯ୍ୟରେ ନିୟୋଜିତ ଅଛନ୍ତି। ପାଣିପାଗ ଏବେ ଉଦ୍ଧାରକାର୍ଯ୍ୟ ପାଇଁ ବଡ ଚ୍ୟାଲେଞ୍ଜ ହୋଇ ରହିଛି। ଏହି ବିପର୍ଯ୍ୟୟରେ ଏପର୍ଯ୍ୟନ୍ତ ୫ ଜଣଙ୍କର ମୃତ୍ୟୁ ହୋଇଥିବାର ଖବର ଆସିଛି । ଅନେକ ଘର ଏବଂ ହୋଟେଲ ଧ୍ୱଂସ ହୋଇଯାଇଛି । ଏହା ସହିତ ହର୍ସିଲରେ ହେଲିପ୍ୟାଡ୍ ଏବଂ ସେନାର କ୍ୟାମ୍ପ ମଧ୍ୟ ବାଦଲଫଟା ବର୍ଷାରେ କ୍ଷତିଗ୍ରସ୍ଥ ହୋଇଛି ।
ଏନ୍ଡିଆରଏଫ୍ର ଡେପୁଟି ଇନ୍ସପେକ୍ଟର ଜେନେରାଲ (ଅପରେସନ୍) ମହସିନ୍ ଶହେଦିଙ୍କ କହିବା ଅନୁସାରେ ସେନା, ଆଇଟିବିପି ଓ ଏସଡିଆରଏଫ୍ ସହିତ ଅଲଗା ଏଜେନ୍ସି ଘଟଣା ସ୍ଥଳରେ ଉଦ୍ଧାରକାର୍ଯ୍ୟ ଜାରି ରଖିଛି। ତେବେ ରିଷିକେଶ-ଉତ୍ତରକାଶୀ ହାଇଓ୍ବେରେ ଭୂସ୍ଖଳନ କାରଣରୁ ରାସ୍ତା ଅବରୋଧ ହୋଇଯାଇଛି। ଯାହାଫଳରେ ଏନ୍ଡିଆରଏଫ୍ ଟିମ୍ ଧରାଲିରେ ପହଁଞ୍ଚି ସାରିଛି। ଡେରାଡୁନ୍ ଏୟାରଲିଫ୍ଟ ଜରିଆରେ ପଠାଇବାର ଚେଷ୍ଟା ମଧ୍ୟ ଖରାପ ପାଗ ଯୋଗୁଁ ବିଫଳ ହୋଇଛି। ପାଣିପାଗ ବିଭାଗ ଆଗାମୀ ୧୨ ଘଣ୍ଟା ପାଇଁ ଚେତାବନୀ ଜାରି କରିଛି।
