ମାଲକାନଗିରି, ୩।୬(ଆପ୍ର ): ସୀମାନ୍ତ ଛତିଶଗଡ଼ ରାଜ୍ୟ ମାଓ ପ୍ରବଣ ସୁକୁମା,ବସ୍ତର,ଦନ୍ତେୱାର୍ଡ, କଣ୍ଡାଗାଁ ଜିଲ୍ଲା ରେ ମାଓବାଦୀଙ୍କୁ ଗ୍ରାମବାସୀମାନେ ଘୋର ବିରୋଧ କରିବା ସହିତ ମାଓମୁକ୍ତ ନେଇ ବିରାଟ ଶୋଭା ଯାତ୍ରା କରିଛନ୍ତି। ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ ପୋଲିସ ପକ୍ଷରୁ ମାଓ ବିରୋଧୀ ଅପରେସନ ଜୋରଦାର କରାଯାଇଥିବା ବେଳେ ଏବେ ମାଓବାଦୀଙ୍କୁ ସିଧା ସଳଖ ବିରୋଧ କରିଛନ୍ତି ବସ୍ତର ଅଞ୍ଚଳବାସୀ ।
ମାଓ ସଂଗଠନ ବିରୁଦ୍ଧରେ ଏକାଠି ହୋଇଛନ୍ତି ସୁକୁମା, ଦନ୍ତେୱାଡା, ବିଜାପୁର, ନାରାୟଣପୁର, କୋଣ୍ଡାଗାଓ ଓ ବସ୍ତର ଜିଲ୍ଲାର ହଜାର ହଜାର ଆଦିବାସୀ ଗ୍ରାମବାସୀ । ଦୀର୍ଘ ବର୍ଷ ପରେ ଆଦିବାସୀ ଲୋକେ ସିଧା ସଳଖ ମାଓବାଦୀଙ୍କୁ ବିରୋଧ କରିବା ସହ ଜଗଦଲପୁର ସହରର ରାଜ ରାସ୍ତାରେ ବିରାଟ ଶୋଭା ଯାତ୍ରା କରିଛନ୍ତି । ଆଦିବାସୀ ମହିଳା ଓ ପୁରୁଷ ସମସ୍ତେ ହାତରେ ଫ୍ଳାଗ୍ କାର୍ଡ ଧରି ଏହି ଶୋଭାଯାତ୍ରାରେ ସାମିଲ୍ ହୋଇଥିଲେ । ନକ୍ସଲ ପୀଡିତ ଓ ନକ୍ସଲ ପନ୍ଥିଙ୍କ ଦ୍ବାରା ନିର୍ଯାତିତ ହୋଇଥିବା ଆଦିବାସୀ ଲୋକେ ମଧ୍ୟ ଏଥିରେ ସାମିଲ ହୋଇଥିଲେ । ଜଗଦଲପୁର ସିରହାସ ଛକ ଠାରୁ ଆରମ୍ଭ ହେଇଥିବା ରାଲିରେ ଲୋକେ ନକ୍ସଲବାଦ ବିପକ୍ଷରେ ଅନେକ ସ୍ଲୋଗାନ ଦେଇଥିଲେ । ଜଗଦଲପୁର ସହରର ସହିଦ ସ୍ମାରକୀ ନିକଟରେ ନକ୍ସଲ ପୀଡିତ ପରିବାରଙ୍କ ସହ ଆଲୋଚନା କରିଛନ୍ତି ଛତିଶଗଡ଼ ଗୃହ ମନ୍ତ୍ରୀ ତଥା ଉପ ମୁଖ୍ୟମନ୍ତ୍ରୀ ବିଜୟ ଶର୍ମା । ନିର୍ଦ୍ଧାରିତ ସମୟ ସୀମା ପୁର୍ବରୁ ମାଓ ମୁକ୍ତ କରିବା ଲାଗି ଛତିଶଗଡ ସରକାର ଅଣ୍ଟା ଭିଡିଥିବା ବେଳେ ଆଦିବାସୀ ଲୋକେ ମଧ୍ୟ ସମର୍ଥନ କରିଛନ୍ତି।
