ଟିକାବାଲି,୧୭/୫: ଗ୍ରୀଷ୍ମ ପ୍ରବାହ ସାଙ୍ଗକୁ ପ୍ରବଳ ଗୁଳୁଗୁଳି ହେଉଥିବା ବେଳେ ଟିକାବାଲି ବ୍ଲକ ପାବୁରିଆ ଅଞ୍ଚଳରେ ଆଘାଷିତ ବିଜୁଳି କାଟ ଲୋକଙ୍କୁ ଅତିଷ୍ଟ କରିଛି। କଳାବୈଶାଖୀ ବର୍ଷା ପରେ ଦୀର୍ଘ ସମୟ ପର୍ଯ୍ୟନ୍ତ ବିଜୁଳି ରହୁନାହିଁ। ଦିନ ଦିନ ଧରି ଆସିବାର ନାଁ ଧରୁନାହିଁ। ପ୍ରତ୍ୟେକ ସନ୍ଧ୍ୟାରେ ବିଜୁଳି ଗାଏବ ହୋଇଯାଉଛି। ଅଭିଯୋଗ ଶୁଣିବା ପାଇଁ କେହି ନାହିଁ।
ସେହିଭଳି ମରାମତି ଓ ରକ୍ଷଣାବେକ୍ଷଣ ଆଳରେ ଘଣ୍ଟା ଘଣ୍ଟା ବିଜୁଳି କାଟ୍ ହେଉଛି। ଫଳରେ ରୋଷେଇଵାସ, ପିଲାଙ୍କ ପାଠପଢା, ବିଭିନ୍ନ ଅନଲାଇନ କାମ ବାଧାପ୍ରାପ୍ତ ହେଉଥିବା ମଧ୍ୟ ଅଭିଯୋଗ ହେଉଛି। ଅନ୍ୟ ପକ୍ଷରେ, ଦେଶ ୫'ଜି ଭଳି ଆଧୁନିକ ଇଣ୍ଟରନେଟ ସେବା ଆଡକୁ ମୁହାଁଉଥିବା ବେଳେ ପାବୁରିଆ ପଞ୍ଚାୟତରେ ଡିଜିଟାଲ ସେବା ପାଇବା କଷ୍ଟ ସାଧ୍ୟ୍ୟ ହୋଇ ପଡିଛି। ଏଠାରେ କେବଳ ବିଏସଏନଏଲର ନେଟୱାର୍କ ଥିବାବେଳେ ତାହା ମଧ୍ୟ କେବେ ରହୁଛି ତ କେବେ ଦିନଦିନ ଧରି କଟି ଯାଉଛି। ତେଣୁ ଫୋନ ଯୋଗେ ମଧ୍ୟ ଯୋଗାଯୋଗ କରିବା ସମ୍ଭବପର ହୋଇପାରୁନାହିଁ। ଜରୁରୀ କାର୍ଯ୍ୟରେ ବାଧା ସହିତ ବ୍ୟାଙ୍କରେ ଲିଙ୍କ ଫେଲ, ଜନସେବା କେନ୍ଦ୍ର ଗୁଡିକରେ ବିଭିନ୍ନ ଅନଲାଇନ କାମ ହେଇ ପାରୁନାହିଁ। ଏହାର ପ୍ରତିବାଦରେ ଆଜି ପାବୁରିଆ ପଞ୍ଚାୟତର ଶତାଧିକ ପୁରୁଷ ଏବଂ ମହିଳା ପଞ୍ଚାୟତ କାର୍ଯ୍ୟାଳୟ ଘେରିଥିଲେ। ସରପଞ୍ଚ ସଞ୍ଜୟ ନାୟକଙ୍କୁ ଅଭିଯୋଗ କରି ତୁରନ୍ତ ପଦକ୍ଷେପ ପାଇଁ ଦାବୀ କରିଛନ୍ତି ଅଞ୍ଚଳବାସୀ।
ଯଦି ଏହି ସମସ୍ୟାର ଶୀଘ୍ର ସମାଧାନ ନହୁଏ ତେବେ ଆଗାମୀ ଦିନରେ ପଞ୍ଚାୟତବାସୀ ରାଜରାସ୍ତାକୁ ଓଲ୍ଲାଇବେ ବୋଲି ଚେତାବନୀ ଦେଇଛନ୍ତି। ଅନ୍ୟପକ୍ଷରେ ସରପଞ୍ଚ ଶ୍ରୀ ନାୟକଙ୍କୁ ପଚାରିବାରୁ, ସେ ବିଭାଗୀୟ ଅଧିକାରୀ ମାନଙ୍କ ସହିତ ଆଲୋଚନା କରିବା ସହ ତୁରନ୍ତ ସମସ୍ୟାର ସମାଧାନ କରିବେ ବୋଲି ଆଶ୍ୱାସନା ଦେଇଛନ୍ତି।
