ଫିରିଙ୍ଗିଆ,୦୯/୧୨: କନ୍ଧମାଳ ଜିଲ୍ଲାର ଅନେକ ଅଞ୍ଚଳକୁ ଆଜି ପର୍ଯ୍ୟନ୍ତ ପହଞ୍ଚି ନାହିଁ ମୋବାଇଲ ନେଟୱାର୍କ । ଫଳରେ ଗୁରୁତର ବାଧାପ୍ରାପ୍ତ ହେଉଛି ଅନଲାଇନ କାମ। ପାହାଡ଼ ପର୍ବତ ଅଞ୍ଚଳ ଲୋକ ଆମ୍ୱୁଲାନ୍ସ ଗାଡି ଯୋଗାଯୋଗ କରିବା ପାଇଁ ମଧ୍ୟ ମୌଳିକ ସୁବିଧା ପାଇବାରେ ବଞ୍ଚିତ ହେଉଛନ୍ତି । ବାରମ୍ବାର ଦାବି କରି ମଧ୍ୟ ଫଳ ମିଳୁନାହିଁ । ତେଣୁ ବାଧ୍ୟ ହୋଇ ରାସ୍ତାକୁ ଓହ୍ଲାଉଛନ୍ତି ଲୋକେ। ସୋମବାର ସକାଳୁ ଫିରିଙ୍ଗିଆ ବ୍ଲକ କ୍ରାଣ୍ଡିବାଲି ପଞ୍ଚାୟତ ଲୋକେ ମୋବାଇଲ ନେଟୱାର୍କ ଦାବିରେ ରାସ୍ତାରୋକ କରିଛନ୍ତି । କାମଟଣା ପୋଲ ଉପରେ ଗ୍ରାମବାସୀ ଟାୟାର ଜାଳି ରାସ୍ତା ଅବରୋଧ କରିବା ଫଳରେ ଯାତାୟାତ ବାଧାପ୍ରାପ୍ତ ହୋଇଛି । ପୋଲିସ ଓ ପ୍ରଶାସନିକ ଅଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରିଛନ୍ତି। ତେବେ ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନରୁ ଓହରିବେ ନାହିଁ ବୋଲି ଜିଦ ଧରିଛନ୍ତି ଲୋକେ।
ସୂଚନାଯୋଗ୍ୟ, ପଞ୍ଚାୟତ ମୂଖ୍ୟାଳୟ କ୍ରାଣ୍ଡିବାଲି ଠାରେ ଏକ ବିଏସଏନଏଲ ଟାୱାର ଥିଲେ ମଧ୍ୟ ପ୍ରାୟ ଦଶ ମାସ ହେଲା ତାହା ଅଚଳ ହୋଇ ପଡି ରହିଛି । ସେହିଭଳି କାମଟଣା ଠାରେ ୬ ମାସ ତଳୁ ଏକ ଜିଓ ଟାଓ୍ବାର ସ୍ଥାପନ ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ କାର୍ଯ୍ୟକ୍ଷମ ହେଉନାହିଁ । ଏହି ସମସ୍ୟା ନେଇ ଗ୍ରାମବାସୀ ବାରମ୍ବାର ପ୍ରଶାସନର ଦୃଷ୍ଟି ଆକର୍ଷଣ କରିଛନ୍ତି । ଦୁଇ ଦିନ ତଳେ ସମିତି ସଭ୍ୟ ଜିଲାପାଳଙ୍କୁ ଭେଟି ଦାବି ଜଣାଇବା ସହ ସମସ୍ୟା ସମାଧାନ ନ ହେଲେ ଆନ୍ଦୋଳନ କରାଯିବ ବୋଲି କହିଥିଲେ। ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆ ନ ଯିବାରୁ ସୋମବାର ସକାଳୁ ଶତାଧିକ ଗ୍ରାମବାସୀ କାମଟଣା ପୋଲ ଉପରେ ରାସ୍ତା ଅବରୋଧ କରିଛନ୍ତି।
କାମଟଣା ଗ୍ରାମରେ ଜିଓ ନେଟୱାର୍କ ସ୍ଥାପନ କରାଯାଇଛି । ତାହା ସେଟଲାଇଟ ଲଗେଇ ତୁରନ୍ତ କାର୍ଯ୍ୟକ୍ଷମ କରାଯାଉ ନଚେତ ଜିଓ ନେଟୱାର୍କକୁ ଉଠେଇ ଦିଆଯାଉ । କ୍ରାଣ୍ଡିବାଲୀ ଗ୍ରାମ ପଞ୍ଚାୟତ ହେଡକ୍ରାଟର ଠାରେ ନୂତନ ଜିଓ ନେଟୱାର୍କ କିମ୍ବା ବିଏସଏନଏଲ ନେଟୱାର୍କ ଯୋଗେଇ ଦିଆଯାଉ । କ୍ରାଣ୍ଡିବାଲୀ, କାମଟଣା,କେଉଟମାରି, ସିପାଡ଼ି ଡାଡିଲାଇ, କାଙ୍ଗାପତା ପ୍ରାୟ ୬ଟି ଗ୍ରାମର ଜନସାଧାରଣ ସୁବେରିପଙ୍ଗା ଜିଓ ନେଟୱାର୍କ ଉପରେ ହିଁ ନିର୍ଭର କରିଥାନ୍ତି । ଏଣୁ ଆପଣ ଦୟା ପୂର୍ବକ ଉପର ଲିଖିତ ବିଷୟକୁ ଗୁରୁତ୍ତ୍ୱର ସହ ଗ୍ରହଣ କରି କାମଟଣା ଗ୍ରାମର ଜିଓ ଟାୱାରରେ ସାଟେଲାଇଟ ଲଗାଇ ଚୁରନ୍ତ ଚାଲୁ କରାଯିବା ସହିତ କୁଣ୍ଡିବାଲୀ ହେଡକ୍ୱାଟର ଠାରେ ନୂତନ ଜିଓ ନେଟୱାର୍କ କିମ୍ବା ବିଏସଏନଏଲ ନେଟୱାର୍କ ଯୋଗେଇ ଦେବାପାଇଁ ଦୃଢ କାର୍ଯ୍ୟାନୁଷ୍ଠାନ ନିଆଗଲେ, ଆମ୍ଭେ କ୍ରାଣ୍ଡିବାଲୀ ଗ୍ରାମପଞ୍ଚାୟତ ବାସୀ ଆପଣଙ୍କ ନିକଟରେ ଚିରୋପକୃତ ହେବୁ ବୋଲି ଗାଁ ଲୋକେ ଦାବି ଉପସ୍ଥାପନା କରିଥିଲେ । ଏହା ସତ୍ତ୍ୱେ କୌଣସି ସୁଫଳ ମିଳି ନଥିଲା । ଶେଷରେ ବାଧ୍ୟ ହୋଇ ଲୋକେ ରାସ୍ତାରୋକ କରିଛନ୍ତି ।
