ଭୁବନେଶ୍ୱର,୧୨/୧୧: କ୍ୟାପିଟାଲ ହସ୍ପିଟାଲ୍ରେ ମେଡିସିନ୍ ଓପିଡି ସମ୍ମୁଖରେ ଲାଗୁଛି ଲମ୍ବା ଲାଇନ୍ । ସେହିପରି ଶିଶୁ ବିଭାଗ ଓପିଡି ପାଖରେ ଆହୁରି ବିକଳ ଚିତ୍ର ଦେଖିବାକୁ ମିଳୁଛି । ମା'ମାନେ ପିଲାଙ୍କୁ କାଖେଇ ଡାକ୍ତରଙ୍କ ପରାମର୍ଶ ପାଇଁ ଅପେକ୍ଷା କରୁଛନ୍ତି । ପିଲାଙ୍କ କାନ୍ଦରେ ପୂରା ପରିସର କମ୍ପୁଛି । ହସ୍ପିଟାଲ୍ର ଏଭଳି ଦୃଶ୍ୟ ଦର୍ଶାଉଥିଲା ରାଜଧାନୀରେ ଭାଇରାଲ ଫିଭରର ପ୍ରକୋପ । ରାଜଧାନୀର ବିଭିନ୍ନ ହସ୍ପିଟାଲରେ ଭାରଇାଲ ଫିଭର ଜନିତ ରୋଗୀଙ୍କ ସଂଖ୍ୟା ବୃଦ୍ଧି ପାଇଛି । କ୍ୟାପିଟାଲ ହସ୍ପିଟାଲରେ ଗତ ମାସ ଅପେକ୍ଷା ହଠାତ ୪୦ରୁ ୪୫% ରୋଗୀ ବଢ଼ିଛନ୍ତି । ରୋଗୀଙ୍କ ଆଡ୍ମିଶନ ସଂଖ୍ୟା ବୃଦ୍ଧି ପାଇଛି । ପୂର୍ବ ମାସ ଅପେକ୍ଷା ୨୦% ଅଧିକ ରୋଗୀ ଚିକିତ୍ସିତ ଅଛନ୍ତି । ସେହିପରି ଶିଶୁ ୱାର୍ଡରେ ମଧ୍ୟ ସମାନ ପରିସ୍ଥିତି ସୃଷ୍ଟି ହୋଇଛି ବୋଲି ହସ୍ପିଟାଲ୍ କର୍ତ୍ତୃପକ୍ଷ କହିଛନ୍ତି ।
କ୍ୟାପିଟାଲ ହସ୍ପିଟାଲରୁ ମିଳିଥିବା ସୂଚନା ଅନୁଯାୟୀ, ମାସେ ହେଲାଣି ଭାଇରାଲ ଫିଭର ପୀଡ଼ିତଙ୍କ ସଂଖ୍ୟା ବୃଦ୍ଧି ଘଟିଛି । ହେଲେ ଚିନ୍ତିତ ହେବାର କୌଣସି କାରଣ ନାହିଁ । ଯେତିକି ରୋଗୀ ଆସୁଛନ୍ତି ପ୍ରାୟ ୩ରୁ ୪ଦିନ ଭିତରେ ଔଷଧ ଖାଇ ସୁସ୍ଥ ହୋଇଛନ୍ତି । ଯିଏ ସଂକ୍ରମିତ ହୋଇଛନ୍ତି, ଅନ୍ୟମାନଙ୍କଠାରୁ ଦୂରେଇ ରହିବ । ନିଜକୁ ସଙ୍ଗରୋଧ କରି ରଖନ୍ତୁ । ରୋଗୀ ଆଣ୍ଟି ଟେଷ୍ଟିମନି ମେଡିସିନ୍, ପାରାସିଟାମଲ୍, ଭିଟାମିନ୍-ସି ମେଡିସିନ୍ ବ୍ୟବହାର କରିପାରିବେ । ଭିଟାମିନ୍-ସି ଖାଇବା ସହିତ ବଡି ଇମ୍ୟୁନିଟି ବଢ଼ାଇବା ନିତାନ୍ତ ଆବଶ୍ୟକ ବୋଲି ଡାକ୍ତର ପରାମର୍ଶ ଦେଇଛନ୍ତି । ଆରଏମ୍ଆର୍ସି କହିଛି, ଜଳବାୟୁରେ ପରିବର୍ତ୍ତନ ପାଇଁ ଆକ୍ରାନ୍ତଙ୍କ ସଂଖ୍ୟା ବଢ଼ିଛି । କିନ୍ତୁ ଭୟଭୀତ ହେବାର କୌଣସି କାରଣ ନାହିଁ ।
