ଡାବୁଗାଁ, ୦୪/୧୨ : ପରିତ୍ୟକ୍ତ ଘରେ ଖେଳୁଥିଲେ। କଂକ୍ରିଟ୍ କାନ୍ଥ ଭୁସୁଡ଼ି ଜଣେ ଶିଶୁ ମୃତ, ଅନ୍ୟ ଜଣେ ଗୁରୁତର। ନବରଙ୍ଗପୁର ଜିଲ୍ଲା ଡାବୁଗାଁ ସଦର ହାଟପଦା ସାହିରେ ଏଭଳି ଅଭାବନୀୟ ଘଟଣା ଘଟିଛି। ଗୁରୁତରଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।
ସୂଚନା ଅନୁଯାୟୀ, ବୁଧବାର ସକାଳ ୫ଟାରେ ଡାବୁଗାଁ ଥାନା ସଦର ହାଟପଦା ସାହିର ଦୁଇ ଶିଶୁ ମହେଶ ଗୌଡ଼ (୧୨ ବର୍ଷ) ଏବଂ ସାଥୀ ଉମା ଜାନି (୧୦ ବର୍ଷ) ଶୌଚ ପାଇଁ ଘରୁ ବାହାରିଥିଲେ। ଦୁହେଁ ଡାବୁଗାଁ କୃଷି କାର୍ଯ୍ୟାଳୟ ସମ୍ମୁଖରେ ଥିବା ଏକ ନିଛାଟିଆ ପରିତ୍ୟକ୍ତ ଗୃହ ମଧ୍ୟକୁ କୌଣସି କାରଣରୁ ଯାଇଥିଲେ। ହଠାତ୍ ପରିତ୍ୟକ୍ତ ଗୃହ ମଧ୍ୟରେ ଥିବା ଏକ କଂକ୍ରିଟ ଝରକା କାନ୍ଥ ଦୁଇ ଶିଶୁଙ୍କ ଉପରେ ପଡିଯାଇଥିଲା। ମହେଶ ଗୌଡ଼ ଓ ଉମା ଜାନି ଉଭୟ ଝରକାର କଂକ୍ରିଟ କାନ୍ଥ ତଳେ ଚାପି ହୋଇ ଯାଇଥିଲେ। ଫଳରେ ମହେଶ ଗୌଡ଼ର ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଉମା ଜାନି ଗୁରୁତର ହୋଇଥିଲେ। ଉମା ଜାନି ଚିତ୍କାର କରିଥିଲେ ମଧ୍ୟ ନିଛାଟିଆ ସ୍ଥାନ ହୋଇଥିବାରୁ କେହି ଶୁଣିପାରି ନଥିଲେ। ସକାଳ ୭ଟା ବେଳେ କିଛି ଲୋକ ଶିଶୁଟିର ଚିତ୍କାର ଶୁଣି ପୋଲିସ ଓ ଅଗ୍ନିଶମ ବାହିନୀକୁ ଖବର ଦେଇଥିଲେ। ଘଟଣାସ୍ଥଳରେ ଅଗ୍ନିଶମ ବାହିନୀ ଏବଂ ପୋଲିସ ପହଞ୍ଚି ଦୁଇ ଶିଶୁଙ୍କୁ ଉଦ୍ଧାର କରି ଡାବୁଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ତେବେ ସେଠାରେ ଡାକ୍ତର ମହେଶ ଗୌଡ଼କୁ ମୃତ ଘୋଷଣା କରିଥିବା ବେଳେ ଉମା ଜାନିର ଚିକିତ୍ସା ଚାଲିଛି। ତାଙ୍କର ଡାହାଣ ଗୋଡରେ ପ୍ରବଳ ଆଘାତ ଲାଗିଛି। ପୋଲିସ ଘଟଣାର ତଦନ୍ତ କରୁଛି।
