ନୂଆଦିଲ୍ଲୀ,୭।୬: ପଞ୍ଜାବ ପୋଲିସ ଡେଟିଂ ଆପ୍ ‘ଟିଣ୍ଡର’ରୁ ଏକ ଆକଉଣ୍ଟ ବିଷୟରେ ସୂଚନା ମାଗିଛି। ଯାହାକି ଖଲିସ୍ତାନୀ ବିଚ୍ଛିନ୍ନତାବାଦୀ ତଥା ଖଣ୍ଡୁର ସାହିବରୁ ସାଂସଦ ଥିବା ଅମୃତପାଲ ସିଂହର ମାମଲା ସହ ଜଡିତ। ଅମୃତପାଲ ସିଂହ ଉପରେ ଜଣେ ଶିଖ୍ କାର୍ଯ୍ୟକର୍ତ୍ତାଙ୍କୁ ହତ୍ୟା ମାମଲା ରୁଜୁ କାଯାଇଛି। ‘ଟିଣ୍ଡର’କୁ ପଠାଯାଇଥିବା ବାର୍ତ୍ତାରେ ଫରିଦାକୋଟ୍ ପୋଲିସ କହିଛି ଶିଖ୍ କାର୍ଯ୍ୟକର୍ତ୍ତା ଗୁରପ୍ରୀତ ସିଂହ ହରି ନୌ ହତ୍ୟା ମାମଲାରେ ଯାଞ୍ଚ ଚାଲିଛି। ଗୁରପ୍ରୀତ ଗତ ବର୍ଷ ୯ ଅକ୍ଟୋବରରେ ନିଜ ଗାଁର ଗୁରୁଦ୍ବାରରୁ ଫେରିବା ବେଳେ ତାଙ୍କୁ ଗୁଳି କରି ହତ୍ୟା କରାଯାଇଥିଲା।
ଗୁରପ୍ରୀତ ଅତୀତରେ ଅମୃତପାଲ ସିଂହର ନେତୃତ୍ବାଧୀନ କଟ୍ଟରପନ୍ଥୀ ସଂଗଠନ ‘ବାରିସ୍ ପଞ୍ଜାବ ଦେ’ର ସଦସ୍ୟ ଥିଲା। ପଞ୍ଜାବ ପୋଲିସ ମହାନିର୍ଦେଶକ (ଡିଜିପି) ଗୌରବ ଯାଦବ ଗତ ବର୍ଷ ଅକ୍ଟୋବରରେ ଦାବି କରିଥିଲେ ଗୁରପ୍ରୀତ ହତ୍ୟା କଥିତ ଭାବରେ ଅମୃତପାଲ ସିଂହ ଇଶାରାରେ ହୋଇଥିଲା। ଯିଏକି ବର୍ତ୍ତମାନ ରାଷ୍ଟ୍ରୀୟ ସୁରକ୍ଷା ଆଇନ ଅନୁସାରେ ଜେଲ୍ରେ ଅଛି।
ପୋଲିସ ଏହା ମଧ୍ୟ ଦାବି କରିଛି ଯେ, ଗ୍ୟାଙ୍ଗଷ୍ଟରରୁ ଆତଙ୍କବାଦୀ ହୋଇଥିବା ଅର୍ଶଦୀପ ଓରଫ୍ ଅର୍ଶ ଦଲ୍ଲା ଏହି ହତ୍ୟାର ମୁଖ୍ୟ ଅଭିଯୁକ୍ତ।। ତା ଗୋଷ୍ଠୀର ଦୁଇ ସୁଟରକୁ ଭାରତୀୟ ନ୍ୟାୟ ସଂହିତା (ବିଏନ୍ଏସ୍) ଓ ଶସ୍ତ୍ର ଅଧିନିୟମ ସମ୍ପର୍କିତ ଧାରା ଅନୁସାରେ, ରୁଜୁ କରାଯାଇଥିବା ମାମଲାରେ ଗିରଫ କରାଯାଇଛି।
