ସାହାଜପାଲ, ୨୭/୦୫ : ବୌଦ୍ଧ ସଦର ବ୍ଲକ ମୁଣ୍ଡିପଦର ଗ୍ରାମପଞ୍ଚାୟତ ବେତ୍ରାସାହିରେ ପାନୀୟ ଜଳ ସମସ୍ୟା ଅଭିଯୋଗ । ଗ୍ରାମ୍ୟ ଜଳ ଯୋଗାଣ ଓ ମେଗାଜଳ ପ୍ରକଳ୍ପରେ ମିଳୁନି ମୁନ୍ଦେ ପିଇବା ପାଣି। କେଉଁଠି ପାଣି ଆସୁଛି ତ ଆଉ କେଉଁଠି ବିଶୁଦ୍ଧ ପାନୀୟ ଜଳରୁ ବଞ୍ଚିତ ହେଉଛନ୍ତି ଲୋକେ । ଏନେଇ ବାରମ୍ବାର ଅଭିଯୋଗ କରିଛନ୍ତି ସ୍ଥାନୀୟ ବାସିନ୍ଦା, ହେଲେ ଫଳ ଶୂନ୍ୟ ।
ବୌଦ୍ଧ ଜିଲ୍ଲା ମୁଣ୍ଡିପଦର ଗ୍ରାମପଞ୍ଚାୟତ ବେତ୍ରାସାହିବାସୀ ବର୍ଷ ବର୍ଷ ଧରି ପାନୀୟ ଜଳ ସମସ୍ୟା ଭୋଗୁଛନ୍ତି। ବିଶୁଦ୍ଧ ପିଇବା ପାଣି ଏମାନଙ୍କ ପାଇଁ ସାତ ସପନ। ଗାଁରେ ୧୨ ବର୍ଷ ହେଲା ଗ୍ରାମ୍ୟଜଳ ଯୋଗାଣ ପ୍ରକଳ୍ପ ରହିଛି, ମାତ୍ର ଏଥିରେ ଠିକ୍ ଭାବେ ପାଇବା ପାଣି ଆସୁପାରୁନାହିଁ । ଏଲ୍ ଆଣ୍ଡ୍ ଟି କମ୍ପାନୀ ତରଫରୁ ଏକ ମେଗା ଜଳ ଯୋଗାଣ ପ୍ରକଳ୍ପ ରହିଛି । ମାତ୍ର ଏଥିରେ କେଉଁଠି ପାଣି ପହଞ୍ଚୁଛି, ତ ପୁଣି କେଉଁଠି ପାଣି ବିନା ଡହଳ ବିକଳ ହେଉଛନ୍ତି ଲୋକେ । ପୂର୍ବ ସରକାରରେ କେବଳ ପ୍ରତିଶ୍ରୁତି ମିଳିଲା, ହେଲେ ପାଣି ମିଳିଲା ନାହିଁ ବୋଲି ବେତ୍ରାସାହିବାସୀ ଅଭିଯୋଗ କରିଛନ୍ତି । ଏନେଇ ସେମାନେ ସ୍ଥାନୀୟ ସରପଞ୍ଚ, ଏଲ୍ ଆଣ୍ଡ୍ ଟି କମ୍ପାନୀ ଏବଂ ବ୍ଲକ୍ ପ୍ରଶାସନ ନିକଟରେ ବାରମ୍ବାର ଅଭିଯୋଗ କରିଛନ୍ତି, ହେଲେ କୌଣସି ସୁଫଳ ମିଳୁନଥିବା ଲୋକେ କହିଛନ୍ତି । ତେଣୁ ତୁରନ୍ତ ରାଜ୍ୟ ସରକାର ଏ ଦିଗରେ ଦୃଷ୍ଟି ଦେବାକୁ ଦାବି କରିଛନ୍ତି ବେତ୍ରାସାହିବାସୀ।
