ନୂଆଦିଲ୍ଲୀ,୧୦/୦୯: କିଛି ଘଣ୍ଟାର ଅପେକ୍ଷା । କ୍ରିକେଟ ଫିଭରରେ ଦୁଲୁକିବ ଦୁବାଇ । ଏସିଆ କପ୍ ଟୁର୍ଣ୍ଣାମେଣ୍ଟ ୨୦୨୫ରେ ଭାରତ ତାର ପ୍ରଥମ ମ୍ୟାଚ୍ ଖେଳିବ । ଘରୋଇ ୟୁଏଇ ବିପକ୍ଷରେ ଅଭିଯାନ ଆରମ୍ଭ କରିବ ସୂର୍ଯ୍ୟସେନା । ୨୦୧୬ ଏସିଆ କପ୍ ପରେ ପ୍ରଥମ ଥର ମୁହାଁମୁହିଁ ହେବେ ଭାରତ ଓ ଘରୋଇ ୟୁଏଇ । ମ୍ୟାଚ୍ ପୂର୍ବରୁ ୟୁଏଇ ଦଳର ଅଧିନାୟକ ମହମ୍ମଦ ୱାସିମ ଅଜବ ବୟାନ ଦେଇଛନ୍ତି । ସେ କହିଛନ୍ତି ଭାରତ ବିପକ୍ଷ ମ୍ୟାଚକୁ ବଡ଼ ଭାବୁନାହୁଁ ।
ଭାରତ ବିପକ୍ଷ ମ୍ୟାଚର କିଛି ଘଣ୍ଟା ପୂର୍ବରୁ, UAE ଅଧିନାୟକ ମହମ୍ମଦ ୱାସିମ କହିଛନ୍ତି, "ଆମେ ଏହାକୁ ଏକ ବଡ଼ ମ୍ୟାଚ୍ ବୋଲି ବିବେଚନା କରିବୁ ନାହିଁ, କାରଣ ସମସ୍ତ ଦଳ ଭଲ, ତେଣୁ ସମସ୍ତ ମ୍ୟାଚ୍ ସମାନ ହେବ । ଆମେ ଆମର ଯୋଜନାରେ, କଠିନ ପରିଶ୍ରମରେ ଅଟଳ ରହିବୁ। ଆମେ ଯାହା ଶିଖିଛୁ ଏବଂ ଆମେ ଯାହା କରୁଛୁ ସେହି ଅନୁସାରେ ଆଗକୁ ବଢ଼ିବୁ । ଫଳାଫଳ ଖେଳ ଉପରେ ନିର୍ଭର କରେ । ଆମେ ଏଠାରେ ବହୁତ କ୍ରିକେଟ୍ ଖେଳିଛୁ, ଆପଣ କହିପାରିବେ ଯେ ଭାରତ ଏବଂ ପାକିସ୍ତାନ ମଧ୍ୟ ଏଠାରେ ବହୁତ କ୍ରିକେଟ୍ ଖେଳନ୍ତି, କିନ୍ତୁ ଏହା ଆମର ଘରୋଇ ଗ୍ରାଉଣ୍ଡ, ତେଣୁ ଆମେ ଏହାର ପୂର୍ଣ୍ଣ ଲାଭ ଉଠାଇ ଭଲ କ୍ରିକେଟ୍ ଖେଳିବାକୁ ଯଥାସମ୍ଭବ ଚେଷ୍ଟା କରିବୁ। "
ଏସିଆ କପରେ ୟୁଏଇର ରେକର୍ଡ- ଗତ ୧୨ ମାସ ମଧ୍ୟରେ UAE ୨୬ଟି ଟି-ଟ୍ୱେଣ୍ଟି ଆନ୍ତର୍ଜାତୀୟ ମ୍ୟାଚ୍ ଖେଳିଛି । ଦଳର ରେକର୍ଡ ଭଲ ଥିଲା । ଦଳ ୨୦ଟି ମ୍ୟାଚ୍ ଜିତିଛି ଏବଂ ୬ଟି ହାରିଛି । ତଥାପି, ଏସିଆ କପ୍ ପୂର୍ବରୁ ଅନୁଷ୍ଠିତ ଟ୍ରାଇ-ସିରିଜରେ ୟୁଏଇ ଆଫଗାନିସ୍ତାନ ଏବଂ ପାକିସ୍ତାନ ବିପକ୍ଷରେ ଗୋଟିଏ ବି ମ୍ୟାଚ୍ ଜିତିପାରିନଥିଲା । ୟୁଏଇ ଏସିଆ କପ୍ ଟି-୨୦ରେ ୭ ଟି ମ୍ୟାଚ୍ ଖେଳିଛି । ୩ ଟି ଜିତିଛି ଏବଂ ୪ ଟି ହାରିଛି । ୟୁଏଇ ଦଳ ଏସିଆ କପ୍ (୨୦୧୫/୧୬)ରେ ଆଫଗାନିସ୍ତାନ ବିପକ୍ଷରେ ଗୋଟିଏ ମ୍ୟାଚ୍ ମଧ୍ୟ ଜିତିଛି ।
