ପ୍ରମୂଖ ଖବର
  • ବ୍ରହ୍ମପୁର : ସଦର ଥାନା ଅନ୍ତର୍ଗତ ବୁଢ଼ୀଘରା ନିକଟରେ ଭାରସାମ୍ୟ ହରାଇ ଓଲଟିଲା ଅଟୋ, ଜଣେ ମୃତ ୪ ଆହତ
  • ||
  • ଚିନ୍ତା ବଢ଼ାଇଛି କରୋନାର ନୂଆ ଭାରିଆଣ୍ଟ: ସିଙ୍ଗାପୁର, ହଂକଂରେ ବଢ଼ିଲା ସଂକ୍ରମଣ, ଚୀନ୍‌ ଓ ଥାଇଲାଣ୍ଡକୁ ଆଲର୍ଟ ଜାରି
  • ||
  • IPL 2025 : ଆଜି ସୁପରକିଙ୍ଗ୍‌ସ-ରାଜସ୍ଥାନ ରୟାଲ୍ସ ମୁକାବିଲା
  • ||
  • ଯୁଦ୍ଧବିରତି ପାଇଁ ରାଜି ହେଲା ଋଷ; ପୁଟିନ ଓ ଟ୍ରମ୍ପଙ୍କ ମଧ୍ୟରେ ହେଲା ଫୋନରେ ବାର୍ତ୍ତାଳାପ
  • ||
  • ଆସନ୍ତା ୨୧ରୁ ୨୩ ଯାଏ ବଢ଼ିବ କାଳବୈଶାଖୀ, ଆଜି ୧୮ ଜିଲ୍ଲାକୁ ଆଲର୍ଟ ଜାରି: ଉପକୂଳ ଗରମ ଓ ଗୁଳୁଗୁଳି ଜାରି
  • ||

ରାଜ୍ୟରେ କମିଲା କାଳବୈଶାଖୀ: ୨୫ ଯାଏ ତାତିରୁ ନିସ୍ତାର ନାହିଁ,୪୪ ଡିଗ୍ରୀ ଡେଇଁପାରେ ତାପମାତ୍ରା

Published By : Prameya | April 21, 2025 7:45 AM

ଭୁବନେଶ୍ୱର, ୨୧/୦୪: ପଶ୍ଚିମ ଓଡ଼ିଶାରେ  ଟାଇଁ ଟାଇଁ ଖରା । ଉପକୂଳରେ ଝାଇଁ ମାରି ଦେଉଥାଏ  ଗୁଳୁଗୁଳି ପ୍ରକୋପ । ଝାରସୁଗୁଡ଼ା ୪୩.୫ ଡିଗ୍ରୀ ସେଲସିୟସ୍‌ରେ ଜଳୁଥିଲା । ଉପକୂଳ ଓଡ଼ିଶାର  ଭୁବନେଶ୍ୱରରେ ତାପମାତ୍ରା ୩୭.୫ ଡିଗ୍ରୀ  ଛୁଇଁଥିଲେ ବି ଅନୁଭୂତ ହେଉଥିଲା ୫୨ ଡିଗ୍ରୀ ଭଳି  ତାତି । ଅଚାନକ ଏମିତି ପ୍ରଚଣ୍ଡ ତାତି ମାଡ଼ି ଆସିଥିବାରୁ ଜନଜୀବନ ନାକେଦମ ହୋଇ ପଡ଼ିଛନ୍ତି । 

ପାଣିପାଗ ପୂର୍ବାନୁମାନ କହୁଛି, ଏବେ ଆହୁରି ବଢ଼ିବ ତାତିର ପ୍ରକୋପ । କିଛି ସ୍ଥାନରେ ପାରଦ ୪୪ ଡିଗ୍ରୀ ସେଲସିୟସ୍‌ ଡେଇଁପାରେ । ଗୁଳୁଗୁଳି  ଜାରି ରହିବ । ବଡ଼ କଥା ହେଲା, ଆଶ୍ୱସ୍ତି ଦେଲା ଭଳି  କାଳବୈଶାଖୀ ସମ୍ଭାବନା ଏବେ ଦେଖାଯାଉନି । ଆସନ୍ତା  ୨୫ ତାରିଖ ଭିତରେ ତାପମାତ୍ରା ଖସିବା ସମ୍ଭାବନା କମ୍‌ । ୨୬ ତାରିଖବେଳକୁ କାଳବୈଶାଖୀ ବଢ଼ିପାରେ । ଏମିତି  ହେଲେ ହିଁ ପ୍ରଚଣ୍ଡ ତାତିରୁ ନିସ୍ତାର ଆଶା କମ୍‌ ।  

ତାତିଠାରୁ ମାରାତ୍ମକ ହୋଇଥିଲା ଗୁଳୁଗୁଳିର ପ୍ରକୋପ । ଭୁବନେଶ୍ୱରରେ  ସକାଳ ସାଢ଼େ ୮ଟାରେ ପାରଦ ୩୧ ଡିଗ୍ରୀ ସେଲସିୟସ୍‌ ଥିବାବେଳେ ଆର୍ଦ୍ରତା  ଥିଲା ୮୧% । ହିଟ୍‌ ଇଣ୍ଡେକ୍ସ ଅନୁସାରେ- ତାପମାତ୍ରା ଓ ଆର୍ଦ୍ରତା ଯୋଗୁ  ସେତେବେଳେ ଅନୁଭୂତ ହେଉଥିଲା ୪୨ ଡିଗ୍ରୀ ଭଳି ଗରମ । ଦିନ ସାଢ଼େ  ୧୧ଟାରେ ତାପମାତ୍ରା ୩୫.୨ ଡିଗ୍ରୀ, ଆର୍ଦ୍ରତା ୬୭% ଥିଲା । ଅନୁଭୂତ ହେଉଥିଲା  ୪୫ ଡିଗ୍ରୀ ସେଲସିୟସ୍‌ ଭଳି ତାତି । ଦିନ ସାଢ଼େ ୨ଟାବେଳକୁ ଅନୁଭୂତ  ହେଉଥିଲା ୫୨ ଡିଗ୍ରୀ ସେଲସିୟସ୍‌ (ତାପମାତ୍ରା ୩୭, ଆର୍ଦ୍ରତା ୬୧%) ଭଳି ତାପମାତ୍ରା । ସନ୍ଧ୍ୟା ସାଢ଼େ ୫ଟାବେଳେ ଭୁବନେଶ୍ୱରର ଆର୍ଦ୍ରତା ପରିମାଣ  ୭୫% ଥିଲା । ଦିନତମାମ ଭୁବନେଶ୍ୱରରେ ଆର୍ଦ୍ରତା ୬୦% ତଳକୁ ଖସିନଥିଲା ।  ଏଥିରୁ ଅନୁମାନ କରାଯାଇପାରେ, ରାଜଧାନୀବାସୀ ରବିବାର କିଭଳି ଛଟପଟ  ହେଉଥିଲେ ଗରମରେ । ଗମଗମ ଝାଳରେ ନାକେଦମ ହୋଇଥିଲେ ସମସ୍ତେ ।  କେବଳ ଭୁବନେଶ୍ୱର ନୁହେଁ, ସାରା ଉପକୂଳରେ ଏମିତି ସ୍ଥିତି ଥିଲା ରବିବାର । ତାପମାତ୍ରା ବୃଦ୍ଧି ସାଙ୍ଗକୁ ଭୀଷଣ ଗୁଳୁଗୁଳି ଯୋଗୁ କଟକ, ଚାନ୍ଦବାଲି,  ବାଲେଶ୍ୱର, ଜଗତସିଂହପୁର, କେନ୍ଦ୍ରାପଡ଼ାରେ ବି ଦିନ ସାଢ଼େ ୨ଟା ବେଳେ  ୪୭/୪୮ ଡିଗ୍ରୀ ଭଳି ତାତି ଅନୁଭୂତ ହେଉଥିଲା । 

ରବିବାର ରାଜ୍ୟର  ୧୧ଟି ସ୍ଥାନରେ ତାପମାତ୍ରା ୪୦ ଡିଗ୍ରୀ ଅତିକ୍ରମ କରିଛି । ଝାରସୁଗୁଡ଼ା  ସବୁଠୁ ଉତ୍ତପ୍ତ ଥିବାବେଳେ ସ୍ୱାଭାବିକଠାରୁ ୩.୧ ଡିଗ୍ରୀ ଅଧିକ ତାତିରେ  ସିଝିଲା । ବଲାଙ୍ଗୀର ତାପମାତ୍ରା ୪୨.୪ ସେଲସିୟସ୍‌, ଟିଟିଲାଗଡ଼ ୪୨,  ସମ୍ବଲପୁର ୪୧.୯, ସୁନ୍ଦରଗଡ଼ ୪୧.୮, ବୌଦ୍ଧ ୪୧.୫, ହୀରାକୁଦ ୪୧.୩,  ସୋନପୁର ୪୧.୩, ନୂଆପଡ଼ା ୪୧, ଭବାନୀପାଟଣା ୪୦.୮, ରାଉରକେଲା  ୪୦.୧, ପାରଳାଖେମୁଣ୍ଡି ୩୯.୮, ଅନୁଗୁଳ ୩୯.୭, ବରଗଡ଼ ୩୯.୬  ଡିଗ୍ରୀ ଥିଲା । ଉପକୂଳରେ ଚାନ୍ଦବାଲି ୩୮, କଟକ ୩୭ ଡିଗ୍ରୀ ଛୁଇଁଥିଲା । ବର୍ତ୍ତମାନ ପୂର୍ବ ଭାରତରେ ତାପମାତ୍ରା ଆସନ୍ତା ୪ ଦିନ ଭିତରେ ୪ରୁ  ୬ ଡିଗ୍ରୀ ବଢ଼ିପାରେ । ୩ ଦିନ ପରେ ଓଡ଼ିଶାରେ ତାପମାତ୍ରା ୨ରୁ ୪ ଡିଗ୍ରୀ  ବଢ଼ିବା ସମ୍ଭାବନା ଅଛି । 

ବର୍ତ୍ତମାନ କାଳବୈଶାଖୀ ବିସ୍ତୃ୍‌ତ ଅଞ୍ଚଳରେ ହେବନି ।  ସୋମବାର ଦକ୍ଷିଣ ଓଡ଼ିଶାର ମାଲକାନଗିରି, କୋରାପୁଟ, ନବରଙ୍ଗପୁର, ରାୟଗଡ଼ାରେ ଘଡ଼ଘଡ଼ି ସହ ବର୍ଷା, ପବନ (୩୦ରୁ ୪୦ କିମି) ହୋଇପାରେ ।  ମଙ୍ଗଳବାର ମଧ୍ୟ ଦକ୍ଷିଣ ଓଡ଼ିଶାରେ କାଳବୈଶାଖୀ ହୋଇପାରେ ।

Prameya Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.