ଭୁବନେଶ୍ୱର,୦୯/୦୨: ଆଜିଠୁ ରାତିରୁ ତାପମାତ୍ରା ପୁଣି ଉପରମୁହାଁ ହୋଇପାରେ । କିଛି ସ୍ଥାନରେ ପାରଦ ୨ରୁ ୪ ଡିଗ୍ରୀ ବଢ଼ିବ ବୋଲି ଭାରତୀୟ ପାଣିପାଗ ବିଭାଗ (ଆଇଏମ୍ଡି) ପୂର୍ବାନୁମାନ କରିଛି । ଗତ ଦୁଇ ଦିନ ଧରି କିଛି ସ୍ଥାନରେ ରାତି ତାପମାତ୍ରା ଖସୁଥିଲା । ଶୁକ୍ରବାର ରାତିରେ ରାଉରକେଲାର ପାରଦ ୧୦ ଡିଗ୍ରୀ ତଳକୁ ଖସି ଆସିଥିଲା । ଝାରସୁଗୁଡ଼ା, କେନ୍ଦୁଝର, ଦାରିଙ୍ଗିବାଡ଼ି, ଭଦ୍ରକ, ଯାଜପୁର ଓ ଢେଙ୍କାନାଳରେ ବି ପାରଦ ଖସିଛି ।
ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ ଆକଳନ କରି କହିଛନ୍ତି, ଏବେ ପଶ୍ଚିମା ବାୟୁ ପ୍ରବାହ ଉତ୍ତର ପୂର୍ବ ଆଡ଼କୁ ଯାଉଛି । ଗୁରୁଚାପର ପ୍ରଭାବ ବି କମିଛି । ଦେଶର ଉତ୍ତର ପଶ୍ଚିମ ଦିଗରୁ ରାଜ୍ୟକୁ ଥଣ୍ଡା ପବନ ଆସୁଛି । ଏଥିପାଇଁ କିଛି ସ୍ଥାନରେ ତାପମାତ୍ରା ଖସିଛି । ଆସନ୍ତା ୫ ଦିନ ଯାଏ ଏଭଳି ସ୍ଥିତି ରହିବ । କିଛି ସ୍ଥାନରେ ୧ରୁ ୨ ଡିଗ୍ରୀ ବଢ଼ିଲେ ଅନ୍ୟ ସ୍ଥାନରେ ସେତିକି କମିବ । ରାତିରେ ପାଗ ଆରାମଦାୟକ ରହିବ ବୋଲି ସେ କହିଛନ୍ତି ।
ରାଉରକେଲାରେ ପାରଦ ୯.୭ ଡିଗ୍ରୀ ରେକର୍ଡ ହୋଇଛି । ଝାରସୁଗୁଡ଼ାରେ ୧୧.୬, ସୁନ୍ଦରଗଡ଼ରେ ୧୨.୭, ଫୁଲବାଣୀରେ ୧୩.୫, କେନ୍ଦୁଝରରେ ୧୩.୮, କୋରାପୁଟରେ ୧୪.୫, ଦାରିଙ୍ଗିବାଡ଼ି, ଭଦ୍ରକ ଓ ନୂଆପଡ଼ାରେ ୧୫, ବାରିପଦାରେ ୧୫.୫, ସମ୍ବଲପୁରରେ ୧୬.୨ ଡିଗ୍ରୀ ରେକର୍ଡ ହୋଇଛି ।
ଶନିବାର ଅନୁଗୁଳରେ ଦିନ ତାପମାତ୍ରା ୩୪.୭ ଡିଗ୍ରୀ ସେଲସିୟସ୍ ରେକର୍ଡ ହୋଇଛି । ଝାରସୁଗୁଡ଼ାରେ ୩୪.୬, ପାରଳାଖେମୁଣ୍ଡିରେ ୩୪, ବୌଦ୍ଧରେ ୩୩.୫, ସମ୍ବଲପୁର ଓ ସୁନ୍ଦରଗଡ଼ରେ ୩୩.୪, ବଲାଙ୍ଗିର ଓ କୋରାପୁଟରେ ୩୩.୨, ନୂଆପଡ଼ାରେ ୩୩, ଟିଟିଲାଗଡ଼ରେ ୩୨.୫ ଡିଗ୍ରୀ ରହିଥିଲ।
