ଭୁବନେଶ୍ୱର,୧୪/୦୮: ଚିନ୍ତାରେ ଚାଷ ସ୍ଥିତି । ସପ୍ତାହକ ଭିତରେ ଅନେକ ଅଞ୍ଚଳ ଯେମିତି ଶୁଖିଯାଇଛି । ଟାଏଁ ଟାଏଁ ଖରା, କାଁ ଭାଁ ବର୍ଷା । ଜମିରେ ପାଣି ନାହିଁ। ଏବେ ବି ୧୧ ଜିଲ୍ଲାରେ ବର୍ଷା ନିଅଣ୍ଟିଆ ସ୍ଥିତି ରହିଛି । ଗତ ସପ୍ତାହକ ଭିତରେ ଆଉ ୭ ଜିଲ୍ଲା ବି ଶୁଖିବାକୁ ବସିଲାଣି। ଯଦି ଏବେ ଭଲ ବର୍ଷା ନ ହେବ, ଚାଷୀ ମୁଣ୍ଡରେ ଚଡ଼କ ପଡ଼ିବ ।
ପାଣିପାଗ ବିଶେଷଜ୍ଞଙ୍କ ପୂର୍ବାନୁମାନ, ବର୍ତ୍ତମାନର ଲଘୁଚାପ ପ୍ରଭାବରେ ରାଜ୍ୟର ଅଧିକାଂଶ ସ୍ଥାନରେ ବର୍ଷା ହେବ । ବିଶେଷ କରି ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ସମ୍ଭାବନା ଅଛି । ଏହା ପ୍ରଭାବରେ ୧୬ ଯାଏ ବର୍ଷା ଲାଗି ରହିବ । ପୁଣି ୨୨/୨୩ ବେଳକୁ ଆଉ ଏକ ଲଘୁଚାପ ସମ୍ଭାବନା ଅଛି । ଏହି ଡବଲ୍ ଲଘୁଚାପ ଭରସାରେ ରହିଛନ୍ତି ଚାଷୀ । ଭଲ ବର୍ଷା ହେଲେ ନିଅଣ୍ଟିଆ ସ୍ଥିତି ଦୂର ହେବା ସହ ଚାଷ ଆଗକୁ ବଢ଼ିବ ।
ଜୁନ୍ ପହିଲାରୁ ଏଯାବତ୍ ସ୍ଥିତି ଦେଖିଲେ, ରାଜ୍ୟର ୧୧ ଜିଲ୍ଲାରେ ବର୍ଷା କମ୍ ଅଛି । ପୁରୀରେ ୪୦%, ଗଜପତିରେ ୩୯%, ରାୟଗଡ଼ାରେ ୩୫%, କଳାହାଣ୍ଡିରେ ୩୬%, ବଲାଙ୍ଗୀରରେ ୨୮%, ନବରଙ୍ଗପୁରରେ ୨୫%, ନୂଆପଡ଼ାରେ ୨୨%, ଗଞ୍ଜାମରେ ୨୮%, ଖୋର୍ଦ୍ଧାରେ ୨୭%, ଯାଜପୁରରେ ୨୩%, ନୟାଗଡ଼ରେ ୨୦% ବର୍ଷା ନିଅଣ୍ଟିଆ ଅଛି । ସ୍ୱାଭାବିକଠାରୁ ୨୦% ବର୍ଷା କମିଲେ ଏହାକୁ ନିଅଣ୍ଟିଆ କୁହାଯାଏ । ଏବେ କଟକରେ ସ୍ୱାଭାବିକଠାରୁ ୧୮% କମ୍ ଥିବାବେଳେ କନ୍ଧମାଳରେ ୧୨%, ଭଦ୍ରକରେ ୧୩%, ବାଲେଶ୍ୱରରେ ୧୧%, ଜଗତସିଂହପୁରରେ ୧୦%, ଢେଙ୍କାନାଳରେ ୧୨% କମ୍ ହୋଇଛି ବର୍ଷା । ସଙ୍ଗୀନ ଚିତ୍ର ମିଳିଛି ଏଇ ସପ୍ତାହରେ। ଅଗଷ୍ଟ ୭ରୁ ୧୩ ତାରିଖ ଭିତରେ ରାଜ୍ୟରେ ହାରାହାରି ୪୦ ମିଲିମିଟର ବର୍ଷା ହୋଇଛି । ଏହା ସ୍ୱାଭାବିକଠାରୁ ୫୨% କମ୍।
ସାରା ଓଡ଼ିଶାରେ ଏଇ ସପ୍ତାହରେ ବର୍ଷା କମ୍ ହୋଇଛି । ୧୧ଟି ଜିଲ୍ଲାରେ ବର୍ଷା ପରିମାଣ ୬୩%ରୁ ୮୪% ପର୍ଯ୍ୟନ୍ତ ନିଅଣ୍ଟିଆ ରହିଛି । ଭଦ୍ରକରେ ୮୪%, କଟକରେ ୮୩%, ସମ୍ବଲପୁରରେ ୭୯%, କଳାହାଣ୍ଡିରେ ୭୫% ବର୍ଷା କମ୍ ହୋଇଛି । ଏଥିରୁ ଅନୁମାନ କରାଯାଇପାରେ, ସ୍ଥିତି କେତେ ସଙ୍ଗୀନ ହେଲାଣି । ଲଘୁଚାପ ସତ୍ତେ୍ୱ ବୁଧବାର ସନ୍ଧ୍ୟା ଭିତରେ କୋରାପୁଟରେ ୨୪ ମିଲିମିଟର, କଟକରେ ୨୧, ଢେଙ୍କାନାଳରେ ୨୧ ମିମି ବର୍ଷା ହୋଇଥିବାବେଳେ ବାକି ସବୁଠି ଅସରାଏ ଲେଖାଏଁ ବର୍ଷା ହୋଇଛି । ଯଦିଓ ରାତିରେ ବର୍ଷା ବଢ଼ିବା ସମ୍ଭାବନା ଅଛି ।
କୃଷି ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ କହିଛନ୍ତି, ଆନ୍ଧ୍ର ଉପକୂଳ ସଂଲଗ୍ନ ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହୋଇଛି । ଏହା ଉପରକୁ ଗତି କରି ୧୬ରେ ଓଡ଼ିଶା ଉପକୂଳ ଓ ୧୯ରେ ପଶ୍ଚିମ ଓଡ଼ିଶା ଅତିକ୍ରମ କରି ଛତିଶଗଡ଼ ଦେଇ ମଧ୍ୟପ୍ରଦେଶକୁ ଯିବ । ୧୪ରୁ ୧୯ ଯାଏଁ ରାଜ୍ୟରେ ଏହା ବର୍ଷା କରାଇବ । ପୁରୀ, ନୟାଗଡ଼, ଗଞ୍ଜାମ, ଗଜପତି, ରାୟଗଡ଼ା, କଳାହାଣ୍ଡିରେ ୬ ଦିନ ଧରି ସ୍ପଳ୍ପରୁ ମଧ୍ୟମ ଓ ସ୍ଥାନେ ସ୍ଥାନେ ପ୍ରବଳ ବର୍ଷା ହୋଇପାରେ । ୧୭ରୁ ୧୯ ଉପକୂଳ, ବଲାଙ୍ଗୀର, ସମ୍ବଲପୁରରେ ସ୍ୱଳ୍ପରୁ ମଧ୍ୟମ ବର୍ଷା ସମ୍ଭାବନା ଅଛି। ୨୨ କିମ୍ବା ୨୩ ତାରିଖବେଳକୁ ଓଡ଼ିଶା ଉପକୂଳରେ ଆଉ ଏକ ଲଘୁଚାପ ହୋଇପାରେ । ଏହା ୨୬ ଯାଏ ଓଡ଼ିଶା ଉପକୂଳ ଓ ଆଭ୍ୟନ୍ତରୀଣ ଅଞ୍ଚଳରେ ରହିବ । ଦକ୍ଷିଣ ଓଡ଼ିଶା ସମେତ ସାରା ରାଜ୍ୟରେ ଏହା ବର୍ଷା କରାଇବ । ଅଗଷ୍ଟରେ ନିଅଣ୍ଟିଆ ସ୍ଥିତି ଦୂର ହୋଇଯିବା ସମ୍ଭାବନା ରହିଛି । କେବଳ ମୟୂରଭଞ୍ଜ ଓ କେନ୍ଦୁଝରରେ ବର୍ଷା କମିପାରେ । ଅଗଷ୍ଟ ୧୫ରେ ପୁରୀ, ବ୍ରହ୍ମପୁର, ରାଉରକେଲା, ସମ୍ବଲପୁର, ଜୟପୁରରେ ସକାଳ ବେଳା ପାଗ ଶୁଖିଲା ରହିବ । ଭୁବନେଶ୍ୱରରେ ସକାଳ ୧୦ଟା ପର୍ଯ୍ୟନ୍ତ ପାଗ ଶୁଖିଲା ରହିପାରେ । ଯଦି ବର୍ଷା ହେବ, ତାହା ହାଲୁକା ହୋଇପାରେ । ମଧ୍ୟାହ୍ନରେ ବର୍ଷାର ସମ୍ଭାବନା ଅଧିକ ।
ପାଣିପାଗ ବିଭାଗର ଆକଳନ ହେଲା, ଗୁରୁବାର ରାଜ୍ୟର ଅଧିକାଂଶ ସ୍ଥାନରେ ବର୍ଷା ହେବ । କୋରାପୁଟ, ମାଲକାନଗିରିରେ ପ୍ରବଳରୁ ପ୍ରବଳତର, ନବରଙ୍ଗପୁର, କଳାହାଣ୍ଡି, କନ୍ଧମାଳ, ରାୟଗଡ଼ା, ଗଜପତି, ଗଞ୍ଜାମ, ନୟାଗଡ଼ରେ ପ୍ରବଳ ବର୍ଷା ହୋଇପାରେ । ବିଭିନ୍ନ ସ୍ଥାନରେ ଘଡ଼ଘଡ଼ି ସହ ବର୍ଷା ସମ୍ଭାବନା ଅଛି । ଏଭଳି ବର୍ଷା ୧୭ ତାରିଖ ପର୍ଯ୍ୟନ୍ତ ରହିବ ।
