ଭୁବନେଶ୍ୱର,୦୬/୦୬: ମୌସୁମୀ ଯାଇଛି ଯେ ଆଉ ଫେରୁନି । ବର୍ଷା ଗାଏବ । କାଁ ଭାଁ ଛିଞ୍ଚୁଛି । ବିସ୍ତୃତ ଅଞ୍ଚଳ ଶୁଖିଲା ପଡ଼ିଛି । ଗୁଳୁଗୁଳି ନାକେଦମ କରିଦେଲାଣି । ଆଗକୁ ଆହୁରି ସିଝାଇବ, ଛଟପଟ କରିବ । ରାଜ୍ୟରେ ଏବେ ତାପମାତ୍ରା ଆଉ ୨ରୁ ୩ ଡିଗ୍ରୀ ବଢ଼ିବା ସହ ଗୁଳୁଗୁଳି ଜାରି ରହିବ ।
ପାଣିପାଗ ପୂର୍ବାନୁମାନ କହୁଛି, ଜୁନ୍ ୧୨ ଆଗରୁ ମୌସୁମୀ ଫେରିବା ସମ୍ଭାବନା କମ୍ । ଲଘୁଚାପ ହିଁ ଭରସା । ଯଦି ରଜ ବେଳକୁ ଲଘୁଚାପ ସୃଷ୍ଟି ହୁଏ, ତେବେ ଯାଇ ଓଡ଼ିଶାକୁ ମୌସୁମୀ ବର୍ଷା ଫେରିପାରେ । ପ୍ରତିଦିନ ପାଣିପାଗ ବିଭାଗ ପକ୍ଷରୁ ବିଭିନ୍ନ ଜିଲ୍ଲାର ଗୋଟିଏ ଦୁଇଟି ସ୍ଥାନରେ ଘଡ଼ଘଡ଼ି ସହ ବର୍ଷା ସମ୍ଭାବନା ଥିବା ଆକଳନ କରାଯାଉଛି । ମାତ୍ର ବର୍ଷା ହେଉଛି କାଁ ଭାଁ ।
ଗୁରୁବାର ସକାଳରୁ ଅପରାହ୍ନ ସାଢ଼େ ୫ଟା ଭିତରେ ତାଳଚେରରେ ୩୨.୪ ମିଲିମିଟର, ଅନୁଗୁଳରେ ୩ ମିମି, ଛତ୍ରପୁରରେ ୩ ମିମି ବର୍ଷା ହୋଇଥିଲା । ବାକି ସବୁଠି ପାଗ ଶୁଖିଲା ଥିଲା । ଭୁବନେଶ୍ୱରରେ ପାଗ ଆଂଶିକ ମେଘୁଆ ଥିଲେ ବି ବର୍ଷା ଦେଖା ମିଳିଲାନି । ମେ ୨୯ରୁ ମୌସୁମୀ ଫେରାର । ଜୁନ୍ ୧୨ ଆଗରୁ ଫେରିବା ଆଶା କ୍ଷୀଣ । ତା’ ପରେ ବି ଆସିବା ନେଇ ଅନିଶ୍ଚିତତା ରହିଛି ।
ପାଣିପାଗ ବିଭାଗର ବିସ୍ତାରିତ ପୂର୍ବାନୁମାନ ଅନୁସାରେ ୧୧ ତାରିଖ ଭିତରେ ରାଜ୍ୟରେ ବିଶେଷ ବର୍ଷା ନାହିଁ । ଦ୍ୱିତୀୟ ସପ୍ତାହର (୧୨ରୁ ୧୮ ତାରିଖ)ରେ ପୂର୍ବ ଭାରତରେ ସ୍ୱାଭାବିକଠାରୁ କମ୍ ବର୍ଷା ହୋଇପାରେ । ଯଦିଓ ଏହି ଅବଧି ଭିତରେ ପୂର୍ବ ଭାରତକୁ ମୌସୁମୀ ଅଗ୍ରସର କରିପାରେ ।
ଅନୁମାନ କରାଯାଉଛି, ଉତ୍ତର ଓ ପାଶ୍ୱର୍ବର୍ତ୍ତୀ କେନ୍ଦ୍ରୀୟ ବଙ୍ଗୋପସାଗରରେ ୧୨ରୁ ୧୫ ତାରିଖ ଭିତରେ ଏକ ଘୂର୍ଣ୍ଣିବଳୟ କିମ୍ବା ଲଘୁଚାପ ସୃଷ୍ଟି ହୋଇପାରେ । ମାତ୍ର ତାହା ଅଧିକ ଘନୀଭୂତ ହୋଇ ଅବପାତ ରୂପ ନେବା ସମ୍ଭାବନା କମ୍ । ବିଶେଷଜ୍ଞଙ୍କ କହିବାନୁସାରେ ଏହି ସମ୍ଭାବ୍ୟ ଲଘୁଚାପ ପ୍ରଭାବୀ ହେଲେ ହିଁ ମୌସୁମୀ ପୁଣି ସକ୍ରିୟ ହୋଇପାରିବ । ସେପର୍ଯ୍ୟନ୍ତ ମୌସୁମୀ ଫେରିବା ନେଇ ଅନିଶ୍ଚିତତା ରହିଛି
ଏଥର ଦୁଇ ସପ୍ତାହ ଆଗୁଆ ଆସିଥିଲା ମୌସୁମୀ । ମାତ୍ର ଓଡ଼ିଶାରେ ପ୍ରବେଶ କରିବା ପରେ ମୌସୁମୀ ଦୁଇ ସପ୍ତାହ ନିଖୋଜ ରହିପାରେ । ଯଦି ଲଘୁଚାପ ନ ହୁଏ, ତେବେ ରଜବେଳକୁ ଗୁଳୁଗୁଳିରୁ ନିସ୍ତାର ଆଶା କମ୍ । ୨୦୦୯ରେ ମୌସୁମୀ ଓଡ଼ିଶାକୁ ମେ’ ୨୫ରେ ପ୍ରବେଶ କରିଥିଲା । ମାତ୍ର ଏହାପରେ ୩୧ ଦିନ ପାଇଁ ମୌସୁମୀ ଗାଏବ ହୋଇଯାଇଥିଲା । ମୌସୁମୀ ଓଡ଼ିଶାକୁ ପ୍ରବେଶ କରିବା ପରେ ୧୯୮୨ରେ ୨୬ ଦିନ, ୧୯୮୬ରେ ୨୫ ଦିନ, ୧୯୯୧ରେ ୩୧ ଦିନ, ୧୯୯୫ରେ ୧୯ ଦିନ, ୨୦୦୦ରେ ୧୩ ଦିନ, ୨୦୧୪ରେ ୧୪ ଦିନ, ୨୦୦୪ରେ ୧୫ ଦିନ ଓ ୨୦୦୬ରେ ୧୬ ଦିନ ହଜିଯାଇଥିଲା । ଏଥର ଏ ଅବଧି କେତେ ଲମ୍ବିବ, ତାହା ଉପରେ ସଭିଙ୍କ ନଜର ।
ପାଣିପାଗ ବିଭାଗର ଆକଳନ ହେଲା, ଆସନ୍ତା ୨ ଦିନରେ ତାପମାତ୍ରା ୨ରୁ ୩ ଡିଗ୍ରୀ ସେଲସିୟସ୍ ବଢ଼ିପାରେ । କେତେକ ବିଶେଷଜ୍ଞଙ୍କ ମତରେ ତାତି ଆହୁରି ଅଧିକ ବଢ଼ିପାରେ । ଗୁରୁବାର ୯ଟି ସ୍ଥାନରେ ପାରଦ ୩୭ ଡିଗ୍ରୀ ଟପିଥିଲା । ପାରଳାଖେମୁଣ୍ଡି ୩୮, ଝାରସୁଗୁଡ଼ା ୩୮.୪, ଅନୁଗୁଳ ୩୮.୧, ସମ୍ବଲପୁର ୩୭.୬, ହୀରାକୁଦ ୩୭.୧, ଟିଟିଲାଗଡ଼ ୩୭, ମାଲକାନଗିରି ୩୭.୨, ବୌଦ୍ଧ ୩୭.୨, କୋରାପୁଟ ୩୭.୮ ଡିଗ୍ରୀ ଥିଲା । ଆର୍ଦ୍ରତା ୬୦ରୁ ୭୦% ଉପରେ ଥିଲା ଉପକୂଳ ଅଞ୍ଚଳରେ । ଶୁକ୍ରବାର ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତିରେ ଗରମ ଓ ଗୁଳୁଗୁଳି ନାକେଦମ କରିପାରେ । ବର୍ତ୍ତମାନ ଗୁଳୁଗୁଳି ପ୍ରକୋପ ଏଭଳି ରହିବ ।
ପାଣିପାଗ ବିଶେଷଜ୍ଞଙ୍କ ମତରେ ମୌସୁମୀ ଅଗ୍ରସର ହେବାକୁ ପାଗ ଅନୁକୂଳ ନାହିଁ । ପଶ୍ଚିମା ଝଡ଼ ଏଥିରେ ବଡ଼ ପ୍ରତିବନ୍ଧକ ହେଉଛି । ଏଭଳି ସ୍ଥିତି ଲମ୍ବିଲେ ଜୁନ୍ରେ ନିଅଣ୍ଟିଆ ବର୍ଷା ଆଶଙ୍କା ରହୁଛି । ଯଦି ରଜବେଳକୁ ଲଘୁଚାପ ନ ହୁଏ ଏହା ଚାଷ ଆରମ୍ଭ ନେଇ ସମସ୍ୟା ବଢ଼ାଇପାରେ ।
